JOEL 3 - Efik Old Bible With Sectional Headings

Abasi Eyekpe Ikpe Ɔnɔ Kpukpru Idut

1KORO, sese, ke eyo oro, ye ke ini oro ndidade nditɔ Judah ye eke Jerusalem emi eketaŋde efep, nnyɔŋ ndi,

2ndien nyebon kpukpru mme idut, nda mmɔ nsuhɔre ke itihere Jehosha-phat, nnyuŋ ŋkpe ikpe ye mmɔ do, mbaŋa ikɔt mi ye Israel udeme mi, emi mmɔ ekesuande ke otu mme idut, ndien ebahare isɔŋ mi.

3Mmɔ ekenyuŋ esin afia ebaŋa ikɔt mi; enyuŋ enɔ eyen-eren ke akpara, enyuŋ enyam eyen-aŋwan ke wine eke ekpeŋwɔŋde.

4Ndien ŋko mbufo esaŋa nso ŋkpɔ ye ami Tyre, ye Zidon, ye ofuri edem Philistia? Nte mbufo esio usiene ye ami? Ndien edieke mbufo esiode usiene ye ami, nyesɔp nda usiene mbufo iwiwa ndori mbufo ke ibuot.

5Koro mbufo ekemende silver mi ye gold mi efep, enyuŋ emen ndiye ŋkpɔ-uto mi, ekesin ke mme temple mbufo.

6Mbufo ekenyuŋ enyam nditɔ Judah ye nditɔ Jerusalem enɔ nditɔ Greece, man emen mmɔ ke adaŋa mmɔ efep, enim anyan ebiet.

7Sese, nyedemere mmɔ ke ebiet emi mbufo ekenyamde mmɔ do mfep, nnyuŋ nda usiene mbufo ndori mbufo ke ibuot:

8ndien nyenyam nditɔ-iren mbufo ye nditɔ mbufo iban nsin ke ubɔk nditɔ Judah; ndien mmɔ eyeda mmɔ enyam enɔ mbon Sheba ke anyan idut koro edi Jehovah ɔdɔhɔ.

9Mbufo etaŋa emi ke otu mme idut: etim ŋkpɔ-ekɔŋ: edemere mbon-uko: yak kpukpru mbon-ekɔŋ esaŋa ekpere edɔk edi:

10mbufo eda ŋkpɔ ufuŋ-isɔŋ mbufo edom ofut, enyuŋ eda ikwa udiɔŋ-eto mbufo edom eduat: yak owo mmem-idem ɔdɔhɔ ete, Ami ndi ɔkpɔsɔŋ.

11Mbufo kpukpru mme idut emi ekande ekuk, ewara eto edi, enyuŋ esop idem; da mbon-uko fo, O Jehovah, suhɔre ka do.

12Yak mme idut edemere enyuŋ edɔk edi ke ebedeŋ Jehoshaphat: koro nyetie do ŋkpe ikpe kpukpru mme idut emi ekande ekuk.

13Mbufo esin ikwa ukpeŋe-ibokpot koro se ekpeŋede amadat: mbufo esuhɔre edi, koro ebiet unuak-wine ɔmɔyɔhɔ: abaŋ wine ɔyɔhɔ ɔduɔhɔ: koro mme ukwaŋ-ŋkpɔ mmɔ ekponde.

14Udim! udim! ke itihere ikpe: koro usen Jehovah emekpere ke itihere ikpe.

15Utin ye ɔfiɔŋ eyebire, ntantafiɔŋ eyenyuŋ enime uyama mmɔ.

16Ndien Jehovah eyetie ke Zion ofiori, onyuŋ etie ke Jerusalem osioro uyo esie: ndien enyɔŋ ye isɔŋ eyenyek: Jehovah eyenyuŋ edi ubɔhɔ ikɔt esie, edi odudu nditɔ Israel.

17Ndien mbufo eyefiɔk ete ke ami ndi Abasi mbufo, ke nduŋ ke Zion, edisana obot mi: ndien Jerusalem eyedi edisana, isen owo idinyuŋ isaŋake aba ke esit ibe.

18Ndien ama ekem ke usen oro, ikpɔ obot eyetɔi obufa wine, ŋkpri obot eyenyuŋ efiɔrɔ mmɔŋ-eba; kpukpru akpa mmɔŋ Jerusalem eyefiɔrɔ mmɔŋ, idim eyenyuŋ oto ke ufɔk Jehovah ekebit itihere Shittim.

19Egypt eyekabare edi obukpo, Edom eyenyuŋ akabare edi ikpikpu wilderness, oto ke afai emi mmɔ ekenamde nditɔ Judah, koro mmɔ ekeduɔkde iyip owo eke miduehe isop ke isɔŋ mmɔ.

20Ndien Judah eyetie ke nsinsi, Jerusalem eyenyuŋ etie ke ofuri emana.

21Ndien nyedahado ke iyip mmɔ emi mmeŋkedahakedo ke esit: koro Jehovah oduŋde ke Zion.