2 CHRONICLES 23 - Efik Old Bible With Sectional Headings

Oku Jehoiada ye Edidem Joash

1EKEM ke ɔyɔhɔ isua itiaba Jehoiada ɔsɔŋ esit odiomi ye mme etubom mme ikie, Azariah eyen Jeroham, ye Ishmael eyen Jehohanan, ye Azariah eyen Obed, ye Maaseiah eyen Adaia, ye Elishaphat eyen Zichri.

2Ndien mmɔ ekanare Judah ekot mme Levite ke kpukpru obio Judah, ye mme etubom mme ete Israel, ndien mmɔ edi ke Jerusalem.

3Ofuri esop enyuŋ ediomi ediomi ye edidem ke ufɔk Abasi. Ndien enye ɔdɔhɔ mmɔ, ete, Sese, eyen edidem eyeda ubɔŋ, kpa nte Jehovah ɔkɔdɔhɔde abaŋa nditɔ David.

4Emi edi se mbufo edinamde; mbufo mme oku ye mme Levite emi edukde ke sabbath, ebahare idem mbufo ke mbak ita;

5ubak kiet etie usuŋ; ubak efen etie ke ufɔk edidem; ye ɔyɔhɔ ubak ita efen ke enyin-usuŋ Jesod: ndien kpukpru owo edidu ke okure ufɔk Jehovah.

6Ndien ekuyak baba owo kiet oduk ke ufɔk Jehovah, ke mibɔhɔke mme oku ye mme Levite eke esaŋade ŋkpɔ; mmɔ ediduk, koro mmɔ esanade: ndien kpukpru owo edikpeme ukpeme Jehovah.

7Yak mme Levite enyuŋ ekan edidem ekuk, kpukpru owo ye ŋkpɔ-ekɔŋ mmɔ ke ubɔk; ndien owo efen eke edukde ke ufɔk edikpa: mbufo enyuŋ edu ye edidem ke ini enye odukde, ye ke ini enye ɔwɔrɔde.

8Ndien mme Levite, ye ofuri Judah enam kpukpru se Jehoiada oku eketemede, kpukpru owo enyuŋ eda ikɔt mmɔ eke edukde ke sabbath, ye mmɔ eke ewɔrɔde ke sabbath: koro Jehoiada oku miyakke mme ŋka esuana.

9Ndien ŋko Jehoiada oku ada eduat, ye ŋkpri otu-ekɔŋ, ye ikpɔ otu-ekɔŋ, eke ekenyenede edidem David, enyuŋ edude ke ufɔk Abasi, ɔnɔ mme etubom mme ikie.

10Ekem enye otim kpukpru owo, ye ŋkpɔ-ekɔŋ ke ubɔk, ɔtɔŋɔde ke ŋkaŋ ufɔk nnasia, tutu osim ŋkaŋ ufɔk ufien, ekpere itie-uwa ye ufɔk, ekan edidem ekuk.

11Ndien mmɔ esio eyen edidem, eyara enye anyanya, enyuŋ enɔ enye ŋwed ibet, enyuŋ enim enye ke edidem: ntre ke Jehoiada ye nditɔ-iren esie eyet enye aran, enyuŋ edɔhɔ, ete, Yak itɔŋ uwen akam ɔsɔŋ edidem.

12Ekem ke ini Athaliah okopde ntim emi kpukpru owo efeŋede etoro edidem, enye ebine mmɔ ke ufɔk Jehovah.

13Ndien ke enye okutde, sese, edidem ke ada ke ŋkaŋ adaha esie, ke ebiet eke edukde, mme etubom ye mme ukorowo enyuŋ eda edidem ke ŋkaŋ: kpukpru mbio-obio enyuŋ enam idara, enyuŋ efuri ukorowo, ye mme andikwɔ eke ekamade ŋkpɔ mbre, ye mmɔ eke etemede ndikwɔ itoro. Ndien Athaliah awai edisine-ŋkpɔ esie, ete, Odu! odu!

14Ndien Jehoiada oku osio mme etubom mme ikie, emi ekarade mbon-ekɔŋ, onyuŋ ɔdɔhɔ mmɔ, ete, Mbufo emum enye esio ke mme udim efep: enyuŋ eda ofut ewot owo eke etienede enye ke edem. Koro oku ɔkɔdɔhɔde, ete, Mbufo ekuwot enye ke ufɔk Jehovah.

15Ntre ke mmɔ enɔ enye ufaŋ; ndien ke ini enye osimde inua-otop emi horse edukde ke ebiet edidem, mmɔ ewot enye do.

16Ekem Jehoiada anam ediomi ke ufɔk idem esie, ye kpukpru mbio-obio, ye edidem, ete edi ikɔt Jehovah.

17Ndien kpukpru owo eka ufɔk Baal, ekewuri enye, ye mme itie-uwa esie, enyuŋ enuak mbiet esie, enyuŋ ewot Mattan oku Baal ke iso mme itie-uwa oro.

18Ndien Jehoiada ɔdiɔŋ itie-unam ŋkpɔ ufɔk Jehovah esin ke ubɔk mme oku, mme Levite, nte David akabaharede onim ke ufɔk Jehovah, man ewa edifɔp uwa Jehovah, kpa nte ewetde ke ŋwed ibet Moses, ke idara ye ke ikwɔ, nte David eketemede.

19Enye onyuŋ onim mme itie-usuŋ ke enyin-usuŋ ufɔk Jehovah, man owo eke edehede ke ŋkpɔ ekededi okuduk.

20Enye onyuŋ ada mme etubom mme ikie, ye ikpɔ owo, ye mme andikara mbio-obio, ye kpukpru mbio-obio, ndien ada edidem ke ufɔk Jehovah ɔsuhɔre: ndien mmɔ ebe eduk ke edikoŋ inua-otop ufɔk edidem, ekedori edidem ke ebekpo ubɔŋ.

21Ndien kpukpru mbio-obio edat esit: obio onyuŋ etie suŋ. Ntem ke mmɔ ewot Athaliah ke ofut.