JEREMIAH 44 - Efik Old Bible With Sectional Headings

Jeremiah Ɔnɔ Mme Jew Emi Edude ke Egypt Etop Emi Otode Abasi

1IKƆ emi okosim Jeremiah abaŋa kpukpru mme Jew emi eduŋde ke isɔŋ Egypt, emi eduŋde ke Migdol, ye ke Tah-panhes, ye ke Noph, ye ke isɔŋ Pathros, ete,

2Ntem ke Jehovah mme udim Abasi Israel ɔdɔhɔ, ete, Mbufo emekut ofuri idiɔk-ŋkpɔ oro ŋkadade ntiene Jerusalem, ye kpukpru mme obio Judah; ndien, sese, mmɔ ebiara mfin, baba owo kiet eke oduŋde mmɔ ke esit inyuŋ iduhe,

3ebaŋa idiɔk ido oro mmɔ ekenamde, ke eriyat mi esit, nnyuŋ ŋka ŋkɔfɔp ŋkpɔ, nnyuŋ nnam ŋkpɔ nnɔ abasi efen, eke mmɔ ye mbufo ye mme ete mbufo mikɔfiɔkke.

4Ndien ŋkɔdɔŋ kpukpru ikɔt mi mme prophet utom ke ɔtɔ mbufo, mbabak ndɔŋ mmɔ, nte, Mbɔk mbufo ekunam ŋkpɔ mbubiam emi ami nsuade.

5Edi mmɔ ikopke, inyuŋ ikpaŋke utɔŋ mmɔ, inyuŋ ikabakede ikpɔŋ mme idiɔk ido mmɔ, inyuŋ itreke ndifɔp ŋkpɔ nnɔ abasi efen.

6Ndien ami ŋkaŋwaŋa ifuresit mi ye iyaresit mi, ndien enye asak ke mme-obio Judah, ye ke mme efak Jerusalem; ndien mmɔ ekabare edi ndon ye ndobo, kpa nte edide mfin emi.

7Ndien kemi ntem ke Jehovah Abasi mme udim Abasi Israel ɔdɔhɔ, ete, Mbufo enam didie enam akamba idiɔk-ŋkpɔ etuk idem mbufo, ke esibe mbufo eren ye ŋwan, eyenɔwɔŋ ye eyen nsek efep ke Judah, ekusuhɔ baba nsuhɔ enɔ idem mbufo?

8Enyuŋ eyat mi esit ke se ubɔk mbufo enamde, enyuŋ efɔp ŋkpɔ enɔ abasi efen ke isɔŋ Egypt emi mbufo edide ndiduŋ do, man esibe idem mbufo efep, man mbufo enyuŋ edi ŋkpɔ isuŋi ye esuene ke otu kpukpru mme idut ke ererimbot?

9Nte mbufo emefre mme idiɔk ido mme ete mbufo, ye mme idiɔk ido ndidem Judah, ye mme idiɔk ido iban mmɔ, ye mme idiɔk ido idem mbufo, ye mme idiɔk ido iban mbufo, emi mmɔ ekenamde ke isɔŋ Judah ye ke mme efak Jerusalem?

10Mmɔ isuhɔkede idem-mmɔ inim tutu osim mfin emi, inyuŋ ifeheke ndik, inyuŋ isaŋake ke mme ewuhɔ mi, ye ke ido mi, emi ŋkonimde ke iso mbufo, ye ke iso mme ete mbufo.

11Mmɔdo ntem ke Jehovah mme udim, Abasi Israel, ɔdɔhɔ ete, Sese, ami mmɔŋ ŋwuk iso mi nse mbufo ke idiɔk, man nnyuŋ nsibe ofuri Judah mfep:

12nyenyuŋ nda Judah emi esuhɔde, emi ewukde iso mmɔ, ete ika isɔŋ Egypt ikoduŋ do, ndien kpukpru mmɔ eyesobo; ke isɔŋ Egypt ke mmɔ ediduɔŋɔ; eyesobo mmɔ ke ofut ye ke biɔŋ; ŋkpri ye ikpɔ eyekpaŋa ke ofut ye ke biɔŋ; enyuŋ ekabare edi ŋkpɔ isuŋi ye nsobo ye itɔk ye esuene.

13Ndien nyeda ufen ntiene mme andiduŋ isɔŋ Egypt, kpa nte ŋkadade ntiene Jerusalem, ke ofut, ye ke biɔŋ, ye ke udɔŋɔ:

14ndien baba owo kiet ke otu nditɔ Judah eke esuhɔde eke ekade do ekeduŋ ke isɔŋ Egypt idibɔhɔke, idinyuŋ isuhɔke, man efiak ke isɔŋ Judah, emi mmɔ edoride esit ndifiak ŋka ŋkoduŋ do; koro mmɔ midifiakke ke midige nte mbon itɔk.

15Ndien kpukpru owo eke efiɔkde ete ke iban mmimɔ efɔp ŋkpɔ enɔ abasi efen, ye kpukpru iban emi edade do, akamba otu owo, ye kpukpru owo emi eduŋde ke isɔŋ Egypt ke Pathros, ebɔrɔ Jeremiah, ete,

16Nnyin idikopke uyo fo emi abaŋade ikɔ emi afo ɔdɔhɔde nnyin ke enyiŋ Jehovah:

17koro nnyin miditreke ndinam kpukpru ikɔ eke etode nnyin ke inua, nnyuŋ mfɔp ŋkpɔ nnɔ ɔbɔŋ-aŋwan ikpa-enyɔŋ, nnyuŋ ntɔhɔ uwa ediŋwɔŋ ŋkpɔ nnɔ enye, kpa nte nnyin, ye mme ete nnyin, ye ndidem nnyin, ye mbɔŋ nnyin ikenamde ke mme obio Judah, ye ke mme efak Jerusalem, ndien idia udia iyuhɔ, inyuŋ ikut ufɔn, inyuŋ ikwe baba idiɔk-ŋkpɔ kiet.

18Edi toto ke ini nte nnyin iketre ndifɔp ŋkpɔ nnɔ ɔbɔŋ-aŋwan ikpa-enyɔŋ, nnyuŋ ŋwaŋa uwa ediŋwɔŋ ŋkpɔ nnɔ enye, kpukpru ŋkpɔ enana nnyin, nnyin inyuŋ isobo ke ofut ye ke biɔŋ.

19Ndien emi nnyin ikɔfɔpde ŋkpɔ inɔ ɔbɔŋ-aŋwan ikpa-enyɔŋ, inyuŋ iŋwaŋade uwa ediŋwɔŋ ŋkpɔ inɔ enye, nte nnyin ima ikpɔŋ mme ebe nnyin inam mfefere uyo inɔ enye, man ituak ibuot inɔ enye, inyuŋ iŋwaŋa uwa ediŋwɔŋ-ŋkpɔ inɔ enye?

20Ndien Jeremiah ɔdɔhɔ kpukpru owo, iren owo, ye iban, ye kpukpru owo eke ebɔrɔde enye ikɔ ntre, ete,

21Nte idige ufɔp ŋkpɔ oro mbufo ekefɔpde ke mme obio Judah ye ke mme efak Jerusalem, mbufo, ye mme ete mbufo, ye ndidem mbufo, ye mbɔŋ mbufo, ye mbio-obio, ke Jehovah eketi mmɔ, onyuŋ onim ke esit esie?

22Ndien Jehovah ikemeke aba ndiyɔ idiɔk ido mbufo, ye ŋkpɔ mbubiam emi mbufo enamde; ndien isɔŋ mbufo amakabare edi nsobo, ye ndobo, ye isuŋi, ndien owo eke oduŋde iduhe du, kpa nte edide mfin emi.

23Koro mbufo ekefɔpde ŋkpɔ, koro enyuŋ enamde idiɔk ye Jehovah, minyuŋ ikopke uyo Jehovah, minyuŋ isaŋake ke mbet esie, ye ke mme ewuhɔ esie, ye ke mme item esie; mmɔdo idiɔk-ŋkpɔ emi osimde mbufo, kpa nte edide mfin emi.

24Jeremiah onyuŋ ɔdɔhɔ kpukpru owo ye kpukpru iban, ete, Mbufo ofuri Judah emi edude ke isɔŋ Egypt, ekop uyo Jehovah:

25ntem ke Jehovah mme udim, Abasi Israel, ɔdɔhɔ, ete, Mbufo ye iban mbufo edɔhɔ ke inua mbufo, enyuŋ eda ubɔk mbufo ŋko ema, ete, Nnyin iditreke ndinam mme akaŋa nnyin eke nnyin ikakaŋade, ndifɔp ŋkpɔ nnɔ ɔbɔŋ-aŋwan ikpa-enyɔŋ, nnyun ŋwaŋa uwa ediŋwɔŋ-ŋkpɔ nnɔ enye; mbufo iban iditreke ndisɔŋɔ nnim mme akaŋa mbufo.

26Mbufo ekop ndien uyo Jehovah, ofuri Judah emi etiede ke isɔŋ Egypt; sese, Jehovah ɔdɔhɔ, ete, Mmotomo akwa enyiŋ mi, nte ke inua baba owo Judah kiet eke odude ke ofuri isɔŋ Egypt idikotde aba enyiŋ mi, ite, Ma uwem Ɔbɔŋ Jehovah.

27Sese, ami nyekpeme mmɔ nnɔ idiɔk, ŋkpemeke nnɔ eti ŋkpɔ: ndien ofut ye biɔŋ eyesobo kpukpru nditɔ Judah, emi edude ke isɔŋ Egypt, tutu mmɔ ekure.

28Ndien esisit eke ebɔhɔde ofut eyeto ke isɔŋ Egypt efiak ke isɔŋ Judah, ndien ofuri Judah eke esuhɔde, eke edide ke isɔŋ Egypt ndiduŋ do eyefiɔk ikɔ eke edidade, mme okim, mme eke mmɔ.

29Jehovah ɔdɔhɔ ete, Emi eyenyuŋ edi idiɔŋɔ mbufo, ete ke ami nyeda ufen ntiene mbufo ke ebiet emi, man mbufo efiɔk ete ke uyo mi iditreke ndiwɔrɔ idiɔk ye mbufo:

30ntem ke Jehovah ɔdɔhɔ ete, Sese ami nyeda Pharaoh Hophra edidem Egypt nsin ke ubɔk mme asua esie, ye ke ubɔk mmɔ eke eyomde uwem esie; kpa nte ŋkadade Zedekiah edidem Judah nsin ke ubɔk Nebuchadrezzar edidem Babylon, asua esie, ye andiyom uwem esie.