NUMBERS 23 - Efik Old Bible With Sectional Headings

Se Balaam Eketiŋde Ɔnɔ Balak Abaŋa Nditɔ Israel

1NDIEN Balaam ɔdɔhɔ Balak, ete, Nam itie-uwa itiaba mi nɔ mi, nyuŋ diɔŋ enaŋ itiaba ye okukim itiaba ŋko nɔ mi ke ebiet emi.

2Ndien Balak anam kpa nte Balaam ɔkɔdɔhɔde; Balak ye Balaam enyuŋ ewa enaŋ kiet, ye okukim kiet, ke itie-uwa kiet kiet.

3Ndien Balaam ɔdɔhɔ Balak, ete, Da mi ke ɔtɔ ufɔp uwa fo, ndien ami nyeka: ndusuk Jehovah eyedi edisobo ye ami: ndien ŋkpɔ eke enye ediwutde mi, oro ke nditiŋ nnɔ fi. Ndien enye aka ke ibuot obot kiet.

4Ndien Abasi edisobo ye Balaam: ndien enye ɔdɔhɔ Enye, ete, Mmɔdiɔŋ itie-uwa itiaba, mmonyuŋ ŋwa enaŋ kiet ye okukim kiet ke itie-uwa kiet kiet.

5Ndien Jehovah esin Balaam ikɔ ke inua, onyuŋ ɔdɔhɔ ete, Fiak edem tiene Balak, nyuŋ dɔhɔ ntem.

6Ndien enye afiak etiene enye, ndien, sese, enye ke adada ke ɔtɔ uwa esie, enye, ye kpukpru mbɔŋ Moab.

7Ndien enye (Balaam) emen uyo esie, onyuŋ ɔdɔhɔ ete, Balak edidem Moab ada mi ke Aram, ke ikpɔ obot edem usiaha-utin, edi ete, “Di disuŋi Jacob nɔ mi, nyuŋ di ditɔk Israel.”

8Ami ndisuŋi didie se Abasi misuŋike?

9Ndinyuŋ ntɔk didie se Jehovah mitɔkke? Koro ntiede ke enyɔŋ mbuot ikpɔ itiat ŋkut enye, nnyuŋ ntie ke ikpɔ obot nse enye: sese, edi mbio emi editiede ikpɔŋ ke idem mmɔ: idinyuŋ ibatke mmɔ isin ke otu mme idut.

10Anie abat obu Jacob, ye ibat ɔyɔhɔ Israel inaŋ? Ŋkpakam mkpa mkpa eti owo, utit mi akam onyuŋ etie nte esie!

11Ndien Balak ɔdɔhɔ Balaam, ete, Nso ŋkpɔ ke afo anam emi ye ami? Ŋkada fi ndi nte edisuŋi mme asua mi, ndien, sese, afo amakabare ɔdiɔŋ mmɔ.

12Ndien enye ɔbɔrɔ, ete, Nte nnyeneke nditim ndɔhɔ se Jehovah esinde mi ke inua?

13Ndien Balak ɔdɔhɔ enye ete, Mbɔk, kam tiene mi di ke ebiet efen, emi afo edikutde mmɔ do: afo ukwe mmɔ uma, ibɔhɔke ubak, ukwe mmɔ kpukpru: ndien da do suŋi mmɔ nɔ mi.

14Ndien enye ada enye aka iŋwaŋ Zophim, ke enyɔŋ ibuot Pisgah, ndien anam itie-uwa itiaba, onyuŋ awa enaŋ kiet, ye okukim kiet, ke itie uwa kiet kiet.

15Ndien enye ɔdɔhɔ Balak, ete, Da mi ke ɔtɔ ufɔp-uwa fo, ndien ami mmɔŋ ŋka ko ŋkosobo (ye Jehovah).

16Ndien Jehovah edisobo ye Balaam, onyuŋ esin enye ikɔ ke inua, onyuŋ ɔdɔhɔ ete, Fiak tiene Balak, nyuŋ tiŋ ntem.

17Ndien adaŋemi enye osimde enye, sese, enye ke adada ke ɔtɔ ufɔp uwa eise, ye mbɔŋ Moab ŋko. Ndien Balak obup enye, ete, Jehovah ɔdɔhɔ didie?

18Ndien enye emen uyo esie, onyuŋ ɔdɔhɔ ete,

Daha ke enyɔŋ, Balak, kop; kpaŋ utɔŋ ke ikɔ mi, O eyen Zippor:

19Abasi idige owo eke enye okposude nsu, inyuŋ idige eyen owo eke enye ɔkpɔkpuhɔre. Nte enye ɔdɔhɔ, ndien etre ndinam?

20Nte enye ɔŋwɔŋɔ, ndien etre ndinam osu? Sese, ewuk mi ete ndɔdiɔŋ: enye omonyuŋ ɔdiɔŋ; ndien ami ŋkwe nte ŋkabarede enye.

21Enye isehe idiɔk ke Jacob, inyuŋ ikwe ŋkwaŋa ke Israel: Jehovah Abasi esie odu ye enye, mkpo edidem onyuŋ odu ke otu mmɔ.

22Abasi okosio mmɔ ke Egypt; enye enyene odudu nte editim.

23Koro idiɔŋ miduhe ke Jacob, mfa inyuŋ iduhe ke Israel; ke ekem ini mmɔ emen se Abasi anamde, etiŋ ɔnɔ Jacob ye Israel.

24Sese mbon emi edaha ke enyɔŋ nte lion, enyuŋ emen idem nte abak lion: enye idisuhɔkede ina, tutu ata se awaide, onyuŋ ɔŋwɔŋ iyip ŋkpɔ eke enye owotde.

25Ndien Balak ɔdɔhɔ Balaam, ete, Kusuŋi aba mmɔ, kunyuŋ udɔdiɔŋ aba mmɔ.

26Ndien Balaam ɔbɔrɔ Balak, ete, Nte Ŋkɔdɔhɔke fi, nte, Kpukpru se Jehovah edidɔhɔde, oro ke ndinam?

27Ndien Balak ɔdɔhɔ Balaam, ete, Mbɔk, kam di, nyeda fi ŋka ebiet efen; ndusuk eyenen ke iso Abasi nte afo osuŋi mmɔ do ɔnɔ mi.

28Ndien Balak ada Balaam aka ke enyɔŋ ibuot Peor, emi esede edem wilderness.

29Ndien Balaam ɔdɔhɔ Balak, ete, Nam itie-uwa itiaba mi nɔ mi, nyuŋ diɔŋ enaŋ itiaba ye okukim itiaba mi ŋko nɔ mi.

30Ndien Balak anam kpa nte Balaam ɔkɔdɔhɔde enye onyuŋ awa enaŋ kiet ye okukim kiet ke itie-uwa kiet kiet.