ECCLESIASTES 9 - Efik Old Bible With Sectional Headings

Ŋkpa, Uwem ye Ifiɔk

1KORO ŋkenimde ibuot mi ke ofuri ŋkpɔ emi, ŋkonyuŋ ntim ndomo ofuri ŋkpɔ emi (mfiɔk): nte ke nti owo, ye mme enyene-ibuot owo, ye utom mmɔ, edu ke ubɔk Abasi; baba owo kiet inyuŋ ifiɔkke ima ye usua: ofuri ŋkpɔ odu mmɔ ke ini iso.

2Kpukpru ŋkpɔ ewɔrɔ kpukpru owo ukem-ukem: ŋkpɔ kiet ɔnɔmɔ nti owo, ye mme idiɔk owo, ye owo eke ɔfɔnde, ye ndisana, ye ndidehe, ye owo eke awade uwa, ye owo eke miwaha; nte eti owo etiede, kpa ntre ke idiɔk owo etie: owo eke otomode etie nte owo eke abakde eritomo.

3Emi ɔdiɔk ke kpukpru se mmɔ enamde ke idak utin, emi ŋkpɔ kiet ɔnɔmɔde kpukpru: ndien ŋko idiɔk ɔyɔhɔ nditɔ owo ke esit, idat onyuŋ odu mmɔ ke esit, ke uwem mmɔ; ndien ke ini oro ebede, mmɔ eka mkpa.

4Koro anie owo eke ɔbɔhɔde odu? Kpukpru mme odu-uwem enyene mbuɔtidem. Koro ebua eke odude uwem ɔfɔn akan okpo lion.

5Koro mme odu-uwem efiɔkde ete ke mmimɔ inyene ndikpa: edi ama edi mme akpa-mkpa, mmɔ ifiɔkke baba ŋkpɔ kiet: mmɔ inyuŋ inyeneke aba ŋkpɔ-eyen-utom: koro owo mitihi aba enyiŋ mmɔ.

6Ndien ŋko ima mmɔ, ye usua mmɔ, ye ufup mmɔ emetak ema; mmɔ idinyuŋ inyeneke aba udeme ke nsinsi ke ŋkpɔ baba kiet eke enamde ke idak utin.

7Ka kadia udia fo ke idaresit, nyuŋ ŋwɔŋ wine fo ke inemesit: koro utom fo ama enem Abasi esit ama.

8Yak edisine-ŋkpɔ fo edi edisana kpukpru ini; kunyuŋ uyak ibuot fo anana aran.

9Afo ye ŋwan emi afo amade, dia uwem kpukpru usen ikpikpu uwem fo, emi Enye ɔnɔde fi ke idak utin, kpa kpukpru usen ikpikpu uwem fo: koro enye emi edide udeme fo ke uwem, ye ke utom fo eke afo anamde ke idak utin.

10Da odudu fo nam kpukpru se ubɔk fo okutde ndinam: koro baba erinam, baba uduak, baba ifiɔk, baba mbufiɔk miduhe ke obio ekpo emi afo akade do.

11Ntie ke idak utin ŋkabare, nnyuŋ ŋkut nte ke idige mbon nsɔp-itɔk ekan ke mbuba, inyuŋ idige mbon-uko ekan ke ekɔŋ, nte ke idige mbon eti ibuot enyene udia, inyuŋ idige mbon ikike ekut inyene, inyuŋ idige mme ɔfiɔkŋkpɔ owo enyene itoro: koro ini ye unɔmɔ etibede enɔ mmɔ kpukpru.

12Koro owo minyuŋ ifiɔkke ini esie oro; kpa nte iyak eke emumde ke idiɔk iyire, ye nte ntarusuŋ eke emumde ke afia; kpa ntre ke nditɔ owo esike ke idiɔk ini, ke adaŋemi ɔduɔde mmɔ ke idem ini kiet.

13Ŋkokut emi ŋko ke idak utin, kpa eti ibuot, ndien nse enye ke akamba ŋkpɔ.

14Ekenyene ekpri obio kiet, ndien mbio eke edude ke esit iwakke; ndien akamba edidem kiet aka ekɔŋ ye enye, onyuŋ akan enye okuk, onyuŋ anam akamba tower ekem ye enye.

15Ndien enyene-ibuot eyen ubuene odu ke esit, ndien enye ada eti ibuot esie anyaŋa obio oro: edi baba owo kiet itihi eyen ubuene oro.

16Ndien ami ndɔhɔ, nte ke eti ibuot ɔfɔn akan uko; edi mmɔ ese eti ibuot eyen-ubuene oro ke ndek, inyuŋ ikopke uyo esie.

17Uyo mbon eti ibuot eke ekopde suŋ (ɔfɔn) akan mfiori etubom ke otu mbon ndisime.

18Eti ibuot ɔfɔn akan ŋkpɔ-ekɔŋ, ndien anam-idiɔk kiet abiat ediwak nti ŋkpɔ.