MATTHEW 16 - Efik Old Bible With Sectional Headings

Mme Pharisee Edɔhɔ Jesus Ete Owut Mmimɔ Idiɔŋɔ(Mk 8.11-13; Lk 12.54-56)

1EKEM mme Pharisee ye mme Sadducee edi edidomo Enye, ebup Enye ete, owut mme imɔ idiɔŋɔ emi otode ke heaven.

2Edi Enye ɔbɔrɔ mmɔ ete, Ke ini mbureyo mbufo ete, Usen eyefɔn, koro enyɔŋ oyibe; ke ini usenubɔk ŋko, mbufo ete,

3Usen eyediɔk, koro enyɔŋ oyibe onyuŋ okpuk. Mbufo emɔfiɔk ndidiɔŋɔ iso ikpa-enyɔŋ, edi mbufo ikemeke ndifiɔk idiɔŋɔ ini.

4Emana eke ediɔkde enyuŋ esaŋade esin efibe eyom idiɔŋɔ; ndien idinɔŋɔ mmɔ baba idiɔŋɔ kiet, ibɔhɔke idiɔŋɔ Jonah. Ekem Enye ɔkpɔŋ mmɔ adaha.

5 Ndien mbet Esie edi ke edem inyaŋ oko, ema enyuŋ efre ndida uyo.

6Edi Jesus ɔdɔhɔ mmɔ ete, Etiŋ enyin ekpeme idem mbak leaven mme Pharisee ye mme Sadducee.

7Edi mmɔ eneni ke otu idem mmɔ ete, Nnyin idaha uyo idi.

8Edi ke ini Jesus ɔfiɔkde emi, Enye ɔdɔhɔ mmɔ ete, O mbufo nditɔ ekpri mbuɔtidem, nsinam mbufo enenide ke otu idem mbufo koro mbufo minyeneke uyo?

9Nte mbufo itimke ifiɔk ŋkpɔ kaŋa, inyuŋ itihi uyo ition emi thousand owo ition ekadiade, ye ibat akpan eke mbufo ekataŋde?

10Inyuŋ itihi uyo itiaba emi thousaŋd owo inaŋ ekadiade ye ibat akpasa eke mbufo ekataŋde?

11Nsidi ntak eke mbufo mitimke ifiɔk ite, idige uyo ke ntiŋ ye mbufo mbaŋa? Edi ndɔhɔ mbufo nte, ekpeme idem mbufo mbak leaven mme Pharisee ye mme Sadducee.

12Ntre ke mmɔ efiɔk ete, Enye idɔhɔke mme imɔ ikpeme idem mme imɔ ke leaven uyo, edi ɔdɔhɔ ikpeme idem mme imɔ ke se mme Pharisee ye mme Sadducee ekpepde.

13Edi ke ini Jesus edide ke ŋkaŋ Caesarea Philippi, Enye obup mbet Esie ete, Mme owo edɔhɔ ete Eyen Owo edi anie?

14Mmɔ ete, Ndusuk owo ete, John Baptist; ndusuk ete, Elijah; mmɔ efen ete, Jeremiah; midige, owo kiet ke otu mme prophet.

15Enye ɔdɔhɔ mmɔ ete, Edi mbufo edɔhɔ ete Ami ndi anie?

16Simon Peter ɔbɔrɔ Enye ete, Afo edi Christ, Eyen Abasi uwem.

17Jesus ɔbɔrɔ enye ete, Ɔfɔfɔn ɔnɔ fi Simon eyen Jonah, koro midige obuk ye iyip akayarare ŋkpɔ emi ɔnɔ fi, edi edi Ete Mi emi odude ke Heaven.

18Ami mmonyuŋ ndɔhɔ fi nte, Afo edi Peter, ndien nyebɔp ufɔk Mi ke enyɔŋ itiat emi, mme inua-etop Hades idinyuŋ ikanke enye.

19Nyeda mme ukpɔhɔre Obio Ubɔŋ Heaven nsin fi ke ubɔk; ndien se ededi eke afo edibɔpde ke isɔŋ, ke eyebɔp ke heaven, se ededi afo editatde ke isɔŋ ke eyenyuŋ etat ke heaven.

20Ekem Enye owuk mbet Esie ete mmɔ ekutiŋ enɔ ndomo owo kiet ete Imɔ idi Christ.

21Toto ke ini oro Jesus ɔtɔŋɔ ndiwut mbet Esie ete, Imɔ inyene ndika ke Jerusalem ŋkokut ediwak ukut ke ubɔk mbiowo ye ikpɔ oku ye mme scribe; mmɔ eyenyuŋ ewot Imɔ, ndien ke ɔyɔhɔ usen ita Abasi eyenam Imɔ iset.

22Edi Peter ada Enye ɔtɔŋɔ ndisua nnɔ Enye, ete, Idiɔk ŋkpɔ aka nsan-nsan ye Afo, Ɔbɔŋ; utɔ ŋkpɔ emi idiwɔrɔke Fi.

23Edi Jesus ɔwɔŋɔre ada ɔdɔhɔ Peter ete, Da ke edem Mi, Satan. Afo edi ŋkpɔ iduɔ ɔnɔ Mi; koro afo ukereke ŋkpɔ Abasi, edi ekere ŋkpɔ owo.

24Ekem Jesus ɔdɔhɔ mbet Esie ete, Edieke owo ekededi oyomde nditiene Mi, yak enye otuk idem esie, onyuŋ emen cross esie, etiene Mi.

25Koro owo ekededi eke ediyomde ndinyaŋa uwem esie eyeduɔk enye, edi owo ekededi eke ediduɔkde uwem esie kabaŋa mi eyeda uwem esie enyene.

26Koro nso udori ke owo edikut, edieke enye adiade ofuri ererimbot, ndien ada uwen esie osio isop? mme nso ke owo edinɔ ke ibuot uwem esie?

27Koro Eyen Owo ɔmɔŋ edidi ke ubɔŋ Ete Esie ye mme angel Esie, ndien ke ini oro Enye eyenɔ owo kiet kiet nte utom esie edide.

28Ke akpanikɔ ke ndɔhɔ mbufo nte, ndusuk owo edu ke otu mmɔ emi edade mi, emi miditabike mkpa, tutu mmɔ ekut Eyen Owo edide ndida ubɔŋ.