NUMBERS 24 - Efik Old Bible With Sectional Headings

Balaam Afiak Ɔnɔ Balak Etop Abaŋa Nditɔ Israel

1NDIEN adaŋemi Balaam okutde nte Jehovah amade ndidiɔŋ Israel, enye ikaha idiɔŋ, nte akakade ke ini efen, edi owuk iso esie ese wilderness.

2Ndien Balaam emenere enyin esiemɔ okut Israel etiede ke ataya ke ubon, ke ubon: ndien spirit Abasi oduk enye ke idem.

3Ndien enye emen uyo esie, onyuŋ ɔdɔhɔ ete, Uyo Balaam eyen Beor, uyo owo emi enyin esie etarade:

4Uyo andikop ikɔ Abasi, emi okokutde ŋkukut Ata Ɔkpɔsɔŋ, nte enye ɔduɔde, ke enyin anana:

5Ho, sese, nte mme ataya fo eyede, O Jacob! ye iduŋ fo, O Israel!

6Mmɔ enyanare ena nte mme ebedeŋ, ye nte ndiye iŋwaŋ ke mben inyaŋ, nte eto aloe eke Jehovah ɔtɔde, ye nte cedar ke mben mmɔŋ.

7Mmɔŋ eyeto ke mme abaŋ esie ɔduɔ, ubon esie onyuŋ odu ke mben ediwak mmɔŋ; edidem esie eyenyuŋ oforo akan Agag, ubɔŋ esie eyenyuŋ okpon.

8Abasi okosio enye ke Egypt; enye enyene odudu nte editim. Enye eyedia mme idut mme asua esie, onyuŋ anuak mme ɔkpɔ mmɔ, onyuŋ etiga mmɔ ke idaŋ esie.

9Enye ɔkubɔ, ana nte lion, ye nte abak lion: anie edimenere enye? ɔfɔfɔn ɔnɔ owo eke ɔfɔnde ye afo, onyuŋ ɔdɔdiɔk ɔnɔ owo eke osuŋide fi.

10Ndien Balak ayat esit ye Balaam, onyuŋ amia ubɔk esiemɔ: ndien Balak ɔdɔhɔ Balaam, ete, Ŋkokot fi edi nte afo edisuŋide mme asua mi, ndien, sese, afo ama ɔdiɔŋ mmɔ utim ikata emi.

11Daha ndien, fehe, nyɔŋ ebiet fo: ŋkaduak ndikpono fi eti-eti; ndien, sese, Jehovah iyakke fi okut ukpono.

12Ndien Balaam ɔdɔhɔ Balak, ete, Nte ŋkɔdɔhɔke nde ye mme isuŋ-utom fo emi afo ɔkɔdɔŋde utom ke ɔtɔ mi, nte,

13Edieke Balak edinɔde mi adaŋa silver ye gold nte ɔyɔhɔde ufɔk esie, ndikwe nte mbede uyo Jehovah, ndinam eti ŋkpɔ mme idiɔk eke otode ke esit mi: edi se Jehovah edidɔhɔde, oro ke nditiŋ?

14Ndien, sese, ami mmɔŋ nnyɔŋ ntiene oruk mi: yak nsian fi ndien se mbon emi edinamde mbon fo ke ini iso.

15Ndien enye emen uyo esie, onyuŋ ɔdɔhɔ ete, Uyo Balaam eyen Beor, ye uyo owo emi enyin esie etarade:

16Uyo andikop ikɔ Abasi, ye eke andifiɔk ifiɔk Ata Edikoŋ, emi okokutde ŋkukut Ata Ɔkpɔsɔŋ, nte enye ɔduɔde, ke enyin anana:

17Ŋkut enye, edi idige ke emi: nsese enye, edi ikpereke: ntantafiɔŋ asaŋa oto ke Jacob, esaŋ onyuŋ adaha ke enyɔŋ ke Israel, ndien enye eyenuak mme adaŋa Moab, onyuŋ asuan kpukpru mbon ndutime.

18Ndien Edom eyedi se edidade, Seir eyenyuŋ edi se mme asua esie edidade; ndien Israel eyenam uko.

19Ndien (ɔbɔŋ emi otode) ke Jacob eyeda ubɔŋ, onyuŋ osobo mme mmɔ emi efeŋede ke obio ebɔhɔ.

20Ndien enye ese Amalek, onyuŋ emen uyo esie, ete, Amalek ekedi mbemiso idut; edi utit esie eyedi nsinsi nsobo.

21Ndien enye ese mme Kenite, onyuŋ emen uyo esie, ɔdɔhɔ ete, Iduŋ fo ɔsɔsɔŋ, afo omonyuŋ odori efɔk fo ke akamba itiat;

22Koro nte Kain eyedi se edidiade, tutu Asshur edimen fi efep?

23Ndien enye emen uyo esie, ete, Ho! anie edidu uwem ke ini Abasi edinamde ntem?

24Ndien ubom mbakara eto ke edem Kittim, edifik Asshur, enyuŋ efik Eber, ndien eyesobo enye ŋko ke nsinsi.

25Ekem Balaam adaha ke enyɔŋ, ɔnyɔŋ ke ebiet esie: Balak onyuŋ ɔnyɔŋ esie ŋko.