2 NDIDEM 22 - Efik Old Bible With Sectional Headings

Josiah Akara ke Judah

1JOSIAH ekedi eyen isua itiaita ke ini enye adade ubɔŋ, enye onyuŋ edi edidem ke Jerusalem ke isua edip ye duopekiet. Enyiŋ eka esie onyuŋ ekere Jedidah, eyen Adaiah a Bozkath.

2Ndien enye anam se inende ke iso Jehovah, onyuŋ asaŋa ke kpukpru usuŋ David ete esie, inyuŋ iwahake iduk nnasia inyuŋ iduk ufien.

3Edikem ke ɔyɔhɔ isua Josiah edidem efureta, edidem ɔdɔŋ Shaphan eyen Azaliah, eyen Meshullam, andiwet ŋwed, utom ke ufɔk Jehovah,

4ete, Dɔk ke ɔtɔ Hilkiah akwa oku, ete enye ɔnɔ silver emi edade esɔk ufɔk Jehovah, emi mme ekpeme-inua-otop ebɔde mbio-obio ebon:

5ndien yak mmɔ eda enye esin ke ubɔk mbon-utom emi edude ke ufɔk Jehovah, ndidiɔŋ ŋwure ufɔk oro, enɔ mme carpenter,

6ye mme ɔbɔp-ufɔk, ye mme ɔsɔi-itiat, man enyuŋ edep eto ye edisɔi itiat, man enam ufɔk ɔsɔŋɔ.

7Edi inamke mmɔ ebat ibat silver oro ekenɔde mmɔ ke ubɔk, koro mmɔ enamde ŋkpɔ ke akpanikɔ.

8Ndien Hikiah akwa oku ɔdɔhɔ Shaphan andiwed ŋwed, ete, Mmokut ŋwed ibet ke ufɔk Jehovah. Hilkiah onyuŋ emen ŋwed oro ɔnɔ Shaphan, ndien enye okot.

9Ndien Shaphan andiwet ŋwed afiak etiene edidem, editiŋ ikɔ ɔnɔ enye, ete, ikɔt fo emesio silver emi ekutde ke ufɔk, emenyuŋ eda enye esin ke ubɔk mbon-utom emi esede ŋkpɔ ufɔk Jehovah.

10Shaphan andiwet ŋwed onyuŋ etiŋ ɔnɔ edidem, ete, Hilkiah oku ɔmɔnɔ mi ŋwed. Shaphan onyuŋ okot enye ke iso edidem.

11Edikem adaŋemi edidem okopde ikɔ ŋwed ibet oro, enye awai edisine-ŋkpɔ esie.

12Ndien edidem eteme Hilkiah oku, ye Ahikam eyen Shaphan, ye Achbor eyen Micaiah, ye Shaphan andiwet ŋwed, ye Asaiah owo edidem kiet, ete,

13Mbufo eka ekebup Jehovah enɔ mi, ye mbio emi, ye ofuri Judah, ebaŋa ikɔ ŋwed emi ekutde: koro iyaresit Jehovah emi asakde ye nnyin omokpon eti, koro mme ete nnyin mikokopke ikɔ ŋwed emi, mikonyuŋ inamke kpukpru se ewetde ebaŋa nnyin.

14Ndien Hilkiah oku, ye Ahikam, ye Achbor, ye Shaphan, ye Asaiah, eka ke ɔtɔ Huldah prophet aŋwan, ŋwa Shallum eyen Tikvah, eyen Harhas, emi akamade edisine-ŋkpɔ; (ndien enye oduŋ ke Jerusalem, ke edem obio eken); ndien mmɔ eneme nneme ye enye.

15Ndien enye ɔdɔhɔ mmɔ, ete, Ntem ke Jehovah Abasi Israel ɔdɔhɔ, ete, Mbufo edɔhɔ owo emi ɔkɔdɔŋde mbufo utom ke ɔtɔ mi, ete,

16Ntem ke Jehovah ɔdɔhɔ ete, Sese, mmɔŋ nda idiɔk-ŋkpɔ ntiene ebiet emi ye mme andiduŋ ke esit, kpa kpukpru ikɔ ŋwed oro edidem Judah okokotde:

17ke usiene emi mmɔ ekekpɔŋde mi, enyuŋ efɔpde incense enɔ abasi efen, man eyat mi esit ke kpukpru utom ubɔk mmɔ; oro esin iyaresit mi asak ye ebiet emi, idinyuŋ inimeke.

18Edi ama edi edidem Judah emi ɔkɔdɔŋde mbufo, ete ebup uyo Jehovah, mbufo edɔhɔ enye ntem, ete, Ntem ke Jehovah Abasi Israel ɔdɔhɔ, ete, Ama edi ikɔ oro afo okopde;

19koro esit fo ememde, afo onyuŋ ɔsuhɔrede idemfo onim ke iso Jehovah, ke ini afo okopde se nkɔdɔhɔde mbaŋa ebiet emi, ye mme andiduŋ ke esit, nte ke mmɔ edidi ŋwure ye isuŋi, ndien afo ama onyuŋ awai edisine-ŋkpɔ fo, onyuŋ atua eyet ke iso mi; ami ŋko mmokop, Jehovah ɔdɔhɔ.

20Mmɔdo, sese, nyeyak fi obono ye mme usɔ, eyenyuŋ emen fi esin ke udi ke ifure; enyin fo idinyuŋ ikwe kpukpru mme idiɔk-ŋkpɔ eke ami ndidade ntiene ebiet emi. Ndien mmɔ emen ikɔ oro, efiak eketiŋ enɔ edidem.