JEREMIAH 6 - Efik Old Bible With Sectional Headings

Mme Asua Ekan Ekanare Jerusalem Ekuk

1MBUFO nditɔ Benjamin ewɔŋɔ ke ufɔt Jerusalem efeŋe, enyuŋ efuri ukorowo ke Tekoa, enyuŋ emenere ŋkpɔ idiɔŋɔ ke enyɔŋ ke Beth-haccherem: koro idiɔk-ŋkpɔ ye akwa ŋwure etiede ke edem edere ese.

2Mmosobo adiaha Zion ediye ye edinem aŋwan oro.

3Mme ekpemerɔŋ ye mme udim mmɔ eyedi ke ebiet esie; eyewuk tent mmɔ ekan enye ekuk:

4kpukpru mmɔ kiet kiet eyebɔk ufene ke ebiet mmɔ. Mbufo etim ŋkpɔ uŋwana-ekɔŋ ye enye; edaha ke enyɔŋ, (eyak) nnyin idɔk ke ufɔt uwemeyo. Ɔdɔdiɔk ye nnyin: koro eyo ɔkɔhɔrede itɔŋ, koro mme ukpɔŋ mbubreyo ewɔrɔde uniɔŋ.

5Mbufo edaha ke enyɔŋ, nnyin idɔk ke okoneyo, inyuŋ isobo ikpɔ ufɔk esie.

6Koro ntem ke Jehovah mme udim ɔdɔhɔ, ete, Mbufo ekpeŋe eto, enyuŋ ekubi akwa ibombom ke ɔtɔ Jerusalem: emi edi obio eke edidade ufen; ŋkanubɔk ɔyɔhɔ enye kpukpru.

7Kpa nte iso idim otopde mmɔŋ esiemɔ, kpa ntre ke enye otop idiɔk ido esie: mmɔ ekop enye ŋkanubɔk ye mbume ke esit; ubiak ye unan esuk edudu ke iso mi kpukpru ini.

8Yak eteme fi, O Jerusalem, mbak ukpɔŋ mi ediwɔŋɔre ɔkpɔŋ fi; mbak ndinim fi ke desert, ke isɔŋ eke owo miduŋke ke esit.

9Ntem ke Jehovah mme udim ɔdɔhɔ, ete, Mmɔ eyetim etaŋ nsuhɔ Israel nte vine; tɔŋɔ ntak da ubɔk fo sin ke akpasa, nte owo eke etetde mfri vine.

10Ndidɔhɔ anie, nnyuŋ nteme anie, man mmɔ ekop? sese, utɔŋ mmɔ odoro edut, ndien mmɔ ikemeke ndikop: sese, mmɔ ebat uyo Jehovah ke ŋkpɔ but; enye inemke mmɔ esit.

11Ndien iyaresit Jehovah ɔyɔhɔ mi ke idem; idem emem mi ke mmum-ŋkama: nyeŋwaŋa enye ke idem eyenɔwɔŋ ke esien, ye ke otu mkparawa ini kiet: koro eyeda ebe ye ŋwan ŋko, ye mbiowo ye owo eke uwem ɔyuhɔde enye.

12Ndien mme ufɔk mmɔ, ye iŋwaŋ mmɔ ye iban mmɔ ɔtɔ kiet eyekabare enyene owo efen: koro nyenyanare ubɔk mi ntuk mme andiduŋ isɔŋ: uyo Jehovah edi emi.

13Koro kpukpru mmɔ, ɔtɔŋɔde ke ŋkpri, tutu osim ikpɔ, esin enyin; kpukpru mmɔ, ɔtɔŋɔde ke prophet, tutu osim oku,

14Mmɔ enyuŋ ekɔk unam adiaha ikɔt mi enyɔŋ-enyɔŋ, ete, “Emem, emem;” ndien baba emem iduhe.

15But akpanam mmɔ, koro mmɔ enamde oburobut ido; edi but inamke mmɔ baba, mmɔ inyuŋ ifiɔkke ndikop but: mmɔdo mmɔ eyeduɔŋɔ ke otu mmɔ eke eduɔŋɔde: ke ini eke ndinɔde mmɔ ufen mmɔ eyeduɔŋɔ; Jehovah ɔdɔhɔ.

16Ntem ke Jehovah ɔdɔhɔ ete, Mbufo eda ke mme usuŋ, enyuŋ ese, enyuŋ ebup ebaŋa mme ɔkpɔ-usuŋ eset, ete, Eti usuŋ, enye? ndien mbufo esaŋa ke esit, enyuŋ ekut nduɔk-odudu ukpɔŋ mbufo. Edi mmɔ edɔhɔ ete, “Nnyin idisaŋake.”

17Ami ŋkonyuŋ ndemere mbon-ukpeme eke esede mbufo, nnim, nte, Mbufo ekpaŋ utɔŋ enɔ uyo ukorowo.

18Ndien mmɔ edɔhɔ ete, “Nnyin idikpaŋke.” Mbufo mme idut, ekop ndien! mbon esop, mbufo enyuŋ efiɔk se idude ke otu mmɔ!

19Ererimbot, kop: sese, ami mmɔŋ nda idiɔk-ŋkpɔ ntiene mbio emi, kpa mfri ekikere mmɔ: koro mmɔ mikpaŋke utɔŋ ke ikɔ mi ye mbet mi, edi esin enye.

20Frankincense anam didie oto ke Sheba edi ke ɔtɔ mi, eti mbɔkɔk ke anyan idut ŋko? Ndifɔp uwa mbufo inemke nem, mme uwa emem mbufo inyuŋ idatke mi esit.

21Mmɔdo ntem ke Jehovah ɔdɔhɔ, ete, Sese, ami mmɔŋ nda ŋkpɔ ntuaha-nduɔ nnim nnɔ mbio emi, ndien mme ete ye nditɔ eyetuaha ke esit eduɔŋɔ ɔtɔ kiet, mbɔhiduŋ ye ufan esie eyetak.

22Ntem ke Jehovah ɔdɔhɔ, ete, Sese, idut kiet oto ke edem edere edi, akamba idut eyenyuŋ edemere ke ŋkaŋ ererimbot.

23Mmɔ ekama utiga ye eduat; mmɔ ewai enyin, inyuŋ ituaha owo mbɔm: uyo mmɔ oyomo nte inyaŋ; mmɔ enyuŋ edoro horse, etim idem nte mbon-ekɔŋ ebaŋa fi O adiaha Zion.

24Nnyin imokop etop esie: ubɔk nnyin emekabare emem: nnanenyin omomum nnyin, ubiak ebiet eke aŋwan uman.

25Kuwɔrɔ uka iŋwaŋ, kunyuŋ usaŋa ke usuŋ: koro mme asua ekamade ofut: ndik akan okuk.

26O adiaha ikɔt mi, bɔbɔ ɔfɔŋ-ikpo ke idem, nyuŋ duɔŋɔ ke ntɔŋ: nam ntua-eyet ikpɔŋ eyen; seme ata ndot-ndot eseme: koro owo eke osobode eyebuat nnyin ke isɔrɔ kiet.

27Mmonim fi ke owo eke odomode ke otu ikɔt mi, etie nte ufɔk ekɔŋ, ndien afo eyefiɔk onyuŋ odomo usuŋ mmɔ ese.

28Kpukpru mmɔ edi ata mbon nsɔŋ-ibuot, mme asaŋa mbia; edi okpoho ye ukwak; kpukpru mmɔ edi owo eke ebiatde.

29Ibit utim asak, ŋket omosobo ke ikaŋ; anditara atara ikpikpu: koro mmɔ midianakede mme idiɔk owo ifep.

30Eyekot mmɔ, ete obukpo silver, koro Jehovah esede mmɔ ke mbukpo.