EZEKIEL 8 - Efik Old Bible With Sectional Headings

Nditɔ Israel Esabade Temple

1EDIKEM ke ɔyɔhɔ isua itiokiet, ke ɔyɔhɔ ɔfiɔŋ itiokiet, ke ɔyɔhɔ usen ɔfiɔŋ ition, ami ntie ke ufɔk mi, mbiowo Judah enyuŋ etie mi ke iso; ndien ubɔk Ɔbɔŋ Jehovah ɔduɔ mi ke idem do.

2Ndien ami nse, ndien, sese, ŋkut mbiet kiet emi etiede nte ikaŋ: ikaŋ ɔtɔŋɔ ke se ibietde isin esie ɔsuhɔre: uyama ebiet edisem okpoho onyuŋ ɔtɔŋɔ ke isin esie ɔdɔk.

3Enye onyuŋ anyan se ibietde ubɔk, omum mi ke idet ibuot mi: ndien spirit emenere mi esin ke ufɔt isɔŋ ye enyɔŋ, onyuŋ ada mi ke ŋkukut Abasi edi ke Jerusalem, ke inua-otop esit-esit usuŋ emi esede edere, emi mbiet ufup emi esinde efibe ufup odude do.

4Ndien, sese, ubɔŋ Abasi Israel odu do, ebiet ŋkpɔ oro ŋkokutde ke itihere ebiet oko.

5Ndien enye ɔdɔhɔ mi, ete, Eyen owo, menere ndien enyin fo se usuŋ edem edere. Ndien ami mmenere enyin mi nse usuŋ edem edere. Ndien, sese, mbiet ufup emi odu ke edem edere inua-otop itie-uwa ke ebiet nte edukde.

6Ndien enye ɔdɔhɔ mi, ete, Eyen owo, nte afo omokut se mmɔ enamde? ikpɔ mbubiam ŋkpɔ emi ufɔk Israel enamde mi, man ŋkpɔŋ edisana ebiet mi anyan usuŋ? edi tɔŋɔ ntak kabare, ndien afo eyekut ikpɔ mbubiam ŋkpɔ efen.

7Ndien enye ada mi aka ke inua-otop okure, ndien ŋkut, ndien, sese, odudu kiet mmɔ do ke ibibene.

8Ndien enye ɔdɔhɔ mi, ete, Eyen owo, tibi ndien ibibene; ndien adaŋemi ntibide ibibene, sese, usuŋ kiet.

9Ndien enye ɔdɔhɔ mi, ete, Duk kokut mme idiɔk mbubiam emi mmɔ enamde mi.

10Ndien ami nduk, ndien sese, mbiet kpukpru mme andinyɔni, ye mme unam mbubiam, ye kpukpru ibɔk ufɔk Israel ekaba ke ofuri ibibene ekanare ekuk.

11Owo ata ye duop emi etode ke mbiowo ufɔk Israel enyuŋ eda ke iso mmɔ, Jaazaniah eyen Shaphan onyuŋ ada ke otu mmɔ, kpukpru owo enyuŋ ekama censer mmɔ ke ubɔk mmɔ; ndien incense ɔdɔk nte akamba nsuŋikaŋ.

12Ndien enye obup mi, ete, Eyen owo, nte afo omokut se mbiowo Israel enamde ke ekim, kpukpru kiet kiet ke ubet mbiet ŋkpɔ mmɔ? koro mmɔ edɔhɔde, ete, Jehovah ikwe nnyin; Jehovah ɔmɔkpɔŋ edem emi.

13Enye onyuŋ ɔdɔhɔ mi, ete, Tɔŋɔ ntak se akwa mbubiam emi mmɔ enamde.

14Ndien enye ada mi aka usuŋ inua-otop ufɔk Jehovah emi esede edem edere; ndien, sese, iban ke etie do etua eyet ebaŋa Tammuz.

15Ndien enye ɔdɔhɔ mi, ete, Eyen owo, nte afo omokut? Tɔŋɔ ntak kabare se mbubiam ŋkpɔ eke ekponde ekan mme mmɔ emi.

16Ndien enye ada mi oduk ke esit esa okure ufɔk Jehovah, ndien, sese, ubɔk owo edip ye ition ke enyin-usuŋ temple Jehovah eda ke ufɔt etehe ye itie-uwa, ekpa edem enɔ temple Jehovah, iso mmɔ enyuŋ ese edem usiaha-utin: ndien mmɔ etuak ibuot enɔ utin ese edem usiaha-utin.

17Ndien enye obup mi, ete, Eyen owo, nte afo omokut? Nte ufɔk Judah ese erinam mbubiam emi mmɔ enamde mi ke ekpri ŋkpɔ? koro mmɔ edade ŋkanubɔk eyɔhɔ ke isɔŋ, enyuŋ efiak edem eyat mi esit: ndien, sese, mmɔ ke edian ikɔŋ ke ibuo mmɔ.

18Ndien ami ŋko nyenam ke ifuresit: enyin mi idinyeneke mbɔm, ndinyuŋ nyakke: ndien mmɔ eyefiori mi ɔkpɔsɔŋ uyo ke utɔŋ, edi ndikopke uyo mmɔ.