1NDIEN adaŋemi mbufo edemede isɔŋ emi ke afia, mbufo eyenim ubak nte edimenere uwa enɔ Jehovah, kpa edisana ubak isɔŋ: uniɔŋ esie tɔsin eto edip ye ition, ye ubom tɔsin eto duop. Enye edidi edisana ke ofuri adaŋa esie akan okuk.
2Ubak isɔŋ emi edidi ke eke edisana ebiet, ikie ition ke uniɔŋ ye ikie ition ke ubara, ukem-ukem ke edem mbinaŋ akan okuk; ibio-idomo-okuk aba ye duop eyenyuŋ edi mben esie akan okuk.
3Ndien domo uniɔŋ tɔsin edip ye ition, ye ubom tɔsin duop, sio ke idomo emi: ndien edisana ubet ye ata edisana ubet edidu ke esit.
4Edisana ubak isɔŋ emi edinyene mme oku emi enamde ŋkpɔ edisana ebiet, emi esaŋade ekpere edinam ŋkpɔ Jehovah; ndien enye eyedi ebiet mmɔ ke eke ufɔk; onyuŋ edi edisana ebiet ke eke edisana ubet.
5Ndien tɔsin edip ye ition ke uniɔŋ ye tɔsin duop ke ubom eyenyene mme Levite emi enamde ŋkpɔ ufɔk, mme eyeda enyene ke eke ubet edip.
6Mbufo enyuŋ enim se obio edidade, tɔsin ition ke ubom, ye tɔsin edip ye ition ke uniɔŋ, ana ekem ye ubak emi emenerede enɔ edisana ebiet: enye eyenyene ofuri ufɔk Israel.
7(Mbufo enyuŋ enim) eke ɔbɔŋ ke edem mbiba (ke edem) eke emenerede enɔ edisana ebiet, ye ke edem eke obio adade, ke iso se emenerede enɔ edisana ebiet, ye ke iso se obio adade ke edem usop-utin ese usop-utin, ye ke edem usiaha-utin ese usiaha-utin; uniɔŋ esie onyuŋ ana ekem ye mme ubak oro kiet, ɔtɔŋɔde ke adaŋa usop-utin tutu osim ke adaŋa usiaha-utin.
8Se enye edidade ke Israel eyena ɔnɔ enye ke isɔŋ emi: ndien mbɔŋ mi ekutuk aba ikɔt mi. Yak mmɔ enyuŋ eda isɔŋ enɔ ufɔk Israel nte mme esien mmɔ esaŋade.
9Ntem ke Ɔbɔŋ Jehovah ɔdɔhɔ ete, Yak ekem ye mbufo, mbɔŋ Israel; mbufo esioŋo ŋkanubɔk ye utuk efep, enyuŋ ekpe edinen ikpe: edorore ikɔt mi nnama mbufo efep: emi edi uyo Ɔbɔŋ Jehovah.
10Mbufo enyene balance eke enende, ye ephah ye bath eke enende.
11Yak ephah ye bath edi idomo kiet, yak bath oduk ɔyɔhɔ ubak homer duop; yak ephah onyuŋ edi ɔyɔhɔ ubak homer duop; idomo esie asaŋa ye homer.
12Yak shekel ekem ye gerah edip; shekel edip ye ition, ye shekel efut edidi maneh mbufo.
13Emi edi se mbufo edimenerede enɔ, ɔyɔhɔ ubak ephah itiokiet ke homer wheat; mbufo enyuŋ enɔ ɔyɔhɔ ubak ephah itiokiet ke homer barley.
14Ndien ama edi aran eke enimde ke bath aran kiet, (enɔ) ɔyɔhɔ ubak bath duop ke cor (emi ekemde) ye homer bath duop: koro homer edide bath duop.
15Ye eyen ŋkpri ufene kiet ke itie ikie iba, eke etode ke mbiet Israel eke awakde mmɔŋ, ke eke inuak-udia, ye ke eke edifɔp uwa, ye ke eke uwa emem, eke esiode isop mmɔ: Ɔbɔŋ Jehovah ɔdɔhɔ.
16Yak ofuri mbio-obio esaŋa ke utomo emi enɔde ɔbɔŋ ke Israel.
17Ndien mme edifɔp uwa, ye inuak-udia, ye uwa ediŋwɔŋ-ŋkpɔ ke mme usɔrɔ, ye ke mbufa ɔfiɔŋ, ye ke mme sabbath, ke kpukpru esop ufɔk Israel, eyedoro ɔbɔŋ oro: enye eyetim uwa idiɔk ido, ye inuak-udia, ye edifɔp uwa, ye mme uwa emem, onyuŋ osio isop abaŋa nditɔ Israel.
18Ntem ke Ɔbɔŋ Jehovah ɔdɔhɔ, ete, Ke akpa ɔfiɔŋ, ke akpa usen ɔfiɔŋ, ke afo edida abak-enaŋ, eyen ufene, eke ɔfɔnde ama, onyuŋ osio isop edisana ebiet efep:
19ndien yak oku ada ndusuk iyip uwa idiɔk ido, eyet ke obubɔk enyin-usuŋ ufɔk, ye ke inuk ledge itie-uwa mbinaŋ, ye ke obubɔk inua-otop esa.
20Ntem ke afo edinam ke ɔyɔhɔ usen ɔfiɔŋ itiaba abaŋa kpukpru owo eke eduede, enyuŋ edide mme ɔkɔi, ndien mbufo esio isop ufɔk efep.
21Mbufo enim passover ke akpa ofiɔŋ, ke ɔyɔhɔ usen ɔfiɔŋ duop-enaŋ, usɔrɔ usen itiaba; mbufo eta uyo eke mifutke.
22Ndien ke usen oro ke ɔbɔŋ editim enaŋ uwa idiɔk ido abaŋa idem esie ye kpukpru mbio-obio.
23Ndien ke ofuri usen usɔrɔ mbitiaba ke enye editim edifɔp uwa ɔnɔ Jehovah, enaŋ itiaba ye okukim itiaba eke efɔnde ema ke kpukpru usen mbitiaba kiet kiet; ye okpo ebot uwa idiɔk ido kpukpru usen.
24Enye eyenyuŋ otim inuak-udia ephah kiet ke enaŋ kiet, ye ephah kiet ke okukim kiet, hin aran onyuŋ asaŋa ye ephah kiet.
25Ke ɔyɔhɔ ɔfiɔŋ itiaba, ke ɔyɔhɔ usen ɔfiɔŋ efut, ke ederi, ke enye edinam kpasuk ntem, ke mme usen mbitiaba emi; nte eke ekemde ke uwa idiɔk ido ye ke edifɔp uwa, ye inuak-udia, ye aran.
Who We AreWhat We EelieveWhat We Do
2025 by iamachristian.org,Inc All rights reserved.
