1O ABASI, nyaŋa mi; koro mmɔŋ odukde tutu osim ukpɔŋ mi.
2Mmɔbuhɔ ke okpuk, emi owo mikemeke ndida ke esit: mmoduk udem mmɔŋ, mme idim emenyuŋ efuk mi.
3Eseme mi esin mi ŋkpa mba: itɔŋ amasat mi: enyin okim mi ke ini mbetde Abasi mi.
4Mmɔ eke esuade mi ke ikpikpu ewak ekan idet ibuot mi: nsu nsu mme asua mi emi eyomde ndisobo mi, esɔŋɔ: ndien mmenyene ndiyak se mmeŋkobumeke.
5O Abasi, afo ɔmɔfiɔk ndisime ido mi; mme ukwaŋa-ŋkpɔ mi inyuŋ idibeke fi.
6Kuyak mmɔ eke ebetde fi ekut but ebaŋa mi, O Ɔbɔŋ Jehovah mme udim. O Abasi Israel, kuyak mmɔ eke eyomde fi edi ŋkpɔ esuene ebaŋa mi.
7Koro mmokut but mbaŋa fi; esuene omofuk mi iso.
8Mmakabare nte esen owo ye nditɔ-ete mi, ye nte eyen idut ke otu nditɔ-eka mi.
9Koro ufup ufɔk fo adiade mi; esuene mmɔ eke esuenede fi onyuŋ ɔduɔ mi ke idem.
10Ndien ntua eyet ŋwot ukpɔŋ mi ke utre-udia,
11oro onyuŋ akabare edi se edade esuene mi. Nnyuŋ nda ɔfɔŋ-ikpo nsine ke idem mi; nnyuŋ ŋkabare ndi ufiet mmɔ.
12Mmɔ eke etiede ke inua-otop etiŋ ebaŋa mi; nnyuŋ ndi se mbon mmin ekwɔde.
13Edi ama edi ami, mkpe-ubɔk mi osim fi, O Jehovah, ke ini ufɔn, O Abasi, ke ediwak ima fo; yere mi ke akpanikɔ erinyaŋa fo.
14Sio mi ke okpuk, kunyuŋ uyak mi mbuhɔ: yak enyaŋa mi ebɔ mme asua mi, enyuŋ esio mi ke edituŋɔ mmɔŋ.
15Kuyak mme akpa-mmɔŋ efuk mi: kunyuŋ uyak udem emen mi; obube okunyuŋ okubi inua esie abaha mi.
16Yere mi, O Jehovah; koro ima fo ɔfɔnde kabare se mi ke akamba ufɔn fo.
17Kunyuŋ udip owo fo iso fo; koro ntiede ke itie-ukut: wara di yere mi.
18Di kpere ukpɔŋ mi, nyuŋ fak enye: nyaŋa mi mbak mme asua mi.
19Afo ɔmɔfiɔk esuene mi, ye but mi ye esari mi: kpukpru mme asua mi edu fi ke iso. Esuene ɔmɔbuŋ mi esit;
20udɔŋɔ anam mi: mmonyuŋ ntie mbet owo eke atuade mi mbɔm, edi iduhe; nnyuŋ mbet mme ɔdɔŋ esit, edi ŋkwe.
21Ndien mmɔ enɔ etidot ke udia mi; enyuŋ enɔ mi vinegar ŋŋwɔŋ ke nsatitɔŋ mi.
22Yak okpokoro mmɔ ana mmɔ ke iso nte afia: onyuŋ edi mfine mmɔ eke etiede ke ifure.
23Nam enyin okim mmɔ, man ekukut ŋkpɔ; nyuŋ nam isin enyek mmɔ kpukpru ini.
24Ŋwaŋa iyaresit fo duɔk mmɔ ke idem, nyuŋ nam ifiopesit fo osim mmɔ.
25Yak ebiet mmɔ etie ndon, owo okunyuŋ odu ke ataya mmɔ.
26Koro mmɔ ekɔbɔde owo eke afo amiade; enyuŋ ebukde ubiak mmɔ eke afo okimde.
27Dori idiɔk ido ke idiɔk ido mmɔ: kunyuŋ uyak mmɔ eduk ke utebe-ikpe fo.
28Yak esɔhi mmɔ ke ŋwed uwem efep, ekunyuŋ ewet mmɔ esin ke otu mbon utebe-ikpe.
29Ndien ami ndi eyen ubuene ye mfuhɔ: yak erinyaŋa fo, O Abasi, emenere mi onim ke enyɔŋ.
30Nyetoro enyiŋ Abasi ke ikwɔ, nnyuŋ ŋkpono enye ke ekɔm.
31Ndien emi eyenem Jehovah akan ayara, akan abak enaŋ, eke enyenede nduk ye ikpat.
32Mbon nsukidem ekut enyuŋ edaresit: ndien yak esit mbufo emi eyomde Abasi, akam odu uwem.
33Koro Jehovah okopde ɔnɔ mme ubuene, ndien isinke mbon ŋkpɔkɔbi esie ke ndek.
34Yak enyɔŋ ye isɔŋ etoro enye, yak inyaŋ ye kpukpru se isaŋade ke esit.
35Koro Abasi edinyaŋade Zion, edinyuŋ ɔbɔpde mme obio Judah, ndien mmɔ eyeduŋ do enyuŋ eda mmɔ enyene.
36Ndien ubon ikɔt esie eyedia enye; mmɔ eke emade enyiŋ esie eyenyuŋ eduŋ ke esit.
Who We AreWhat We EelieveWhat We Do
2025 by iamachristian.org,Inc All rights reserved.
