MATTHEW 22 - Efik Old Bible With Sectional Headings

Jesus Otop Ŋke Abaŋa Usɔrɔ Ndɔ(Lk 14.15-24)

1EKEM Jesus ɔbɔrɔ onyuŋ ɔtɔŋɔ ntak otop ŋke ɔnɔ mmɔ ete,

2Obio Ubɔŋ Heaven ebiet edidem kiet, emi anamde udia-ndɔ ɔnɔ eyen esie;

3enye onyuŋ ɔdɔŋ ikɔt esie edidɔhɔ mmɔ emi ekokotde edi udia: ndien mmɔ inyimeke ndidi.

4Enye ɔtɔŋɔ ntak ɔdɔŋ ikɔt esie efen, ete, Edɔhɔ mmɔ oro ekokotde ete, Sese mmanam udia mma, ewot enaŋ mi ye munam eke esehede, enyuŋ enam kpukpru ŋkpɔ ema: edi udia-ndɔ.

5Edi mmɔ ikereke, enyuŋ edaha eduk ke afaŋ mmɔ, kiet aka iŋwaŋ esiemɔ, efen aka urua:

6ndien mmɔ emi esukde emum ikɔt esie, enam mmɔ ido esuene, enyuŋ ewot mmɔ.

7Edi edidem ayat esit, onyuŋ osio mbon-ekɔŋ esie ɔdɔŋ, ete esobo mbio obio oro, enyuŋ efɔp obio mmɔ ke ikaŋ.

8Ekem enye ɔdɔhɔ ikɔt esie ete, Ema enam udia-ndɔ ema, edi mmɔ emi ekekotde idotke.

9Mbufo eka ndien ke ŋwaŋa usuŋ ekekot kpukpru mmɔ eke edikutde edidi udia-ndɔ,

10Ndien ikɔt esie ewɔŋɔ eka ke ɔkpɔusuŋ ekataŋ kpukpru owo, adaŋa nte mmɔ ekutde, mme idiɔk ye nti ŋko, edibon ɔtɔ kiet: ndien ubet udia ɔyɔhɔ ye mmɔ emi etiede ke okpokoro.

11Edi ke adaŋemi edidem odukde ndise mmɔ emi etiede, enye okut owo do eke misineke ɔfɔŋidem-ndɔ:

12onyuŋ ɔdɔhɔ enye ete, Ufan, afo anam didie oduk mi ke musineke ɔfɔŋidem-ndɔ? Edi enye inyeneke se ɔbɔrɔde.

13Ekem edidem ɔdɔhɔ ikɔt esie ete, Ebɔp enye ubɔk ye ukot, enyuŋ etop enye eduɔk ke ekim ke esien; do ke eritua eyet ye erita edet eyedu.

14Koro mmɔ eke ekotde ewak, edi mmɔ eke emekde iwakke.

15Ekem mme Pharisee eka ekoduk odu, nte mmɔ edikɔkde afia emum Enye ikɔ-inua.

16Ndien mmɔ esio mbet mmɔ ye mme Herodian edɔŋ ke ɔtɔ Esie, ete, Andikpep, nnyin imɔfiɔk ite Afo edi akpanikɔ, onyuŋ ekpep owo usuŋ Abasi ke akpanikɔ, unyuŋ ukereke owo; koro Afo uteŋeke owo enyin.

17Sian nnyin ndien; Afo ese didie? nte enen ndinɔ Caesar utomo mme inenke?

18Edi Jesus ɔfiɔk ibak mmɔ, onyuŋ ɔdɔhɔ ete, Nsinam edomode Mi, mbufo mbio mbubik?

19ewut Mi okuk utomo. Ndien mmɔ eda okuk kiet esɔk Enye.

20Ndien Jesus obup mmɔ ete, Mbiet ye ŋwed emi enyene anie?

21Mmɔ ete, Enyene Caesar. Ekem Enye ɔdɔhɔ mmɔ ete, Enɔ Caesar ndien ŋkpɔ eke enyenede Caesar; enyuŋ enɔ Abasi ŋkpɔ eke enyenede Abasi.

22Ndien ke ini mmɔ ekopde, idem akpa mmɔ eti-eti, mmɔ enyuŋ ekpɔŋ Enye enyɔŋɔ.

23Usen oro mme Sadducee, emi edɔhɔde ete eriset ke mkpa iduhe, etiene Enye, ebup Enye

24ete, Andikpep, Moses ɔkɔdɔhɔ ete, Edieke owo akpade, ndien minyeneke eyen, yak eyen-ete esie ada ŋwan esie ɔdɔ, asiak ubon ɔnɔ eyen-ete esie.

25Nditɔ-ete itiaba ekodu ye nnyin: akpan ɔdɔ ŋwan, akpa, ndien, sia enye minyeneke eyen, ɔkpɔŋ ŋwan esie ɔnɔ eyenete esie.

26Ɔwɔrɔ kpasuk ntre ye udiana, ye ɔyɔhɔ ita, tutu osim ɔyɔhɔ itiaba.

27Ndien ke akpatre ŋwan nde akpa.

28Mmɔdo ke eriset ke mkpa, enye eyedi ŋwan anie ke otu mmɔ mbitiaba, koro kpukpru mmɔ ekadade enye nte ŋwan?

29Edi Jesus ɔbɔrɔ mmɔ ete, mbufo emedue, koro mbufo mifiɔkke ŋwed Abasi ye odudu Abasi.

30Koro ke eriset ke mkpa mmɔ idɔhɔ ndɔ inyuŋ idaha mmɔ inɔ ke ndɔ, edi mmɔ etie nte mme angel ke heaven.

31Edi kabaŋa eriset ke mkpa, nte mbufo ikotke se Abasi ɔkɔdɔhɔde ete,

32Ami ndi Abasi Abraham ye Abasi Isaac, ye Abasi Jacob? Enye idige Abasi mme akpa-mkpa, edi edi eke mme odu-uwem.

33Ndien ke mme otu owo oro ekopde, idem akpa mmɔ ye ukpep-ŋkpɔ Esie.

34Edi ke ini mme Pharisee ekopde ete Enye ama okokibi mme Sadducee inua, mmɔ esop idem ɔtɔ kiet.

35Ndien owo kiet ke otu mmɔ, emi edide ɔfiɔk-ibet, odomo Enye, obup Enye mbume, ete,

36Andikpep, ewe edi akamba item ke mbet?

37Jesus ɔdɔhɔ enye ete, Ma Jehovah Abasi fo ke ofuri esit fo, ye ke ofuri ukpɔŋ fo, ye ke ofuri ekikere fo.

38Emi edi akamba ye ebe-iso item.

39Udiana onyuŋ ebiet enye, ete, Ma mbɔhiduŋ fo nte idem fo.

40Ofuri mbet ye mme prophet esine ke mme item iba oro.

41Ke ini mme Pharisee ebonode ɔtɔ kiet, Jesus obup mmɔ mbume ete, Mbufo ekere nso ebaŋa Christ? Enye edi Eyen anie?

42Mmɔ ete Enye, Eke David.

43Enye ɔdɔhɔ mmɔ ete, Nsinam David ke Spirit okotde Enye, ete, Ɔbɔŋ, ete,

44 Jehovah ɔdɔhɔ ye Ɔbɔŋ Mi ete,

Tie ke ubɔk nnasia Mi,

Tutu nda mme asua fo nnim Fi ke idak ukot?

45 Edieke David ndien okotde Enye ete, Ɔbɔŋ, didie ke Enye edi eyen esie?

46Ndien ndomo owo kiet ikemeke ndibɔrɔ Enye ikɔ, ndien ɔtɔŋɔde ke usen oro aka iso, baba owo kiet idehede ibup Enye aba mbume efen.