1 CHRONICLES 23 - Efik Old Bible With Sectional Headings

Edidem David Anam Ndutim Ɔnɔ mme Levites Ndinam utom ke Temple

1EKEM adaŋemi David ɔsɔŋde, onyuŋ ɔyuhɔde usen, enye onim Solomon eyen esie ke edidem Israel.

2Ndien enye obon kpukpru mbɔŋ Israel, ye mme oku, ye mme Levite.

3Ndien mmɔ ebat mme Levite, ɔtɔŋɔde ke owo isua edip ye duop, ye mmɔ eke ebede oro; ndien ibat mmɔ nte ibuot mmɔ edide, iren-owo, iren-owo, edi tɔsin owo edip ye efureta.

4Tɔsin edip ye inaŋ ke otu mme mmɔ emi enyene nditiŋ enyin nse utom ufɔk Jehovah; tɔsin itiokiet enyuŋ edi mme ewet ŋwed ye mme ekpe ikpe:

5ndien tɔsin inaŋ edi mme etie-usuŋ; tɔsin inaŋ enyuŋ edi mme nditoro Jehovah ke ŋkpɔ emi ami (David) ŋkanamde, nte eda etoro.

6Ndien David abahare mmɔ esin ke udim, nte nditɔ Levi esaŋade, kpa Gershon, ye Kohath, ye Merari.

7Eke nditɔ Gershon, Ladan Ye Shimei.

8Nditɔ Ladan, etubom edi Jehiel, ye Zetham, ye Joel, ita.

9Nditɔ Shimei; Shelomith, ye Haziel, ye Haran, ita. Mme mmɔ emi edi mme etubom mme ete Ladan.

10Ndien nditɔ Shimei; Jahath, ye Zina, ye Jeush, ye Beriah.

11Mbinaŋ emi edi nditɔ Shimei. Jahath onyuŋ edi etubom, Zizah onyuŋ edi udiana: edi Jeush ye Beriah ibonke ediwak nditɔ; ndien etim mmɔ esin ke ufɔk ete kiet.

12Nditɔ Kohath; Amram, Izhar, Hebron, ye Uzziel, Inaŋ. Nditɔ Amran; Aaron ye Moses:

13ndien ekedianare Aaron, man enye ye nditɔ esie ŋko ke nsinsi ekpenam ata edisana ŋkpɔ esana, enyuŋ efɔp uwa enɔ Jehovah, enyuŋ enam ŋkpɔ esie, enyuŋ eda enyiŋ esie ediɔŋ owo ke nsinsi.

14Ama edi Moses owo Abasi, ekot nditɔ esie edian ye esien Levi.

15Nditɔ-iren Moses edi Gershom ye Eliezer.

16Shebuel edi etubom nditɔ Gershom.

17Ndien nditɔ Eliezer edi Rehabiah etubom. Edi Eliezer ibonke eyen efen; edi nditɔ Rehabiah ewak ekan.

18Nditɔ Izhar; Shelomith, etubom.

19Nditɔ Hebron; Jeriah, akpan, Amariah udɔ, Jahaziel ududɔ, ye Jekameam ɔyɔhɔ inaŋ.

20Nditɔ Uzziel; Micah akpan, ye Isshiah udɔ.

21Nditɔ Merari; Mahli ye Mushi: nditɔ Mahi; Eleazar ye Kish.

22Ekem Eleazar akpa, inyuŋ ibonke nditɔ-iren, edi obon nditɔ-iban; ndien nditɔ-ete mmɔ kpa nditɔ Kish, eda mmɔ edɔ.

23Nditɔ Mushi; Mahli, ye Eder, ye Jeremoth, ita.

24Mme mmɔ emi edi nditɔ Levi nte ufɔk mme ete mmɔ esaŋade; kpa mme etubom mme ete mmɔ, nte ibat mmɔ edide, ke ibat enyiŋ, nte ibuot mmɔ edide, eke enamde utom, enyuŋ esaŋade ŋkpɔ ufɔk Jehovah, ɔtɔŋɔde ke owo isua edip, ye mmɔ eke ebede oro.

25Koro David ɔdɔhɔde, ete, Jehovah Abasi Israel ama ɔnɔ ikɔt esie nduɔk-odudu, ndien enye eyeduŋ ke Jerusalem ke nsinsi;

26mme Levite ŋko inyeneke aba ndibiom efe iduŋ, ye kpukpru ŋkpɔ unam utom esie.

27Koro ke ukperedem ikɔ David, mmɔ oro edi ibat nditɔ-iren Levi, ɔtɔŋɔde ke owo isua edip, ye mmɔ eke ebede oro;

28koro mmɔ edade ebet nditɔ Aaron, ke erinam ŋkpɔ ufɔk Jehovah, ke okure, ye ke ubet, ye ke erinam kpukpru edisana ŋkpɔ esana, ye ke erinam utom, ye ke erisaŋa ŋkpɔ ufɔk Abasi; ye ke uyo emi ediɔŋde enim,

29ye ke edifɔn ndom-uyo inuak-udia, ye ke mfefere uyo eke leaven miduhe, ye ke erikaŋ, ye ke erifɔp, ye ke kpukpru oruk idomo ye ubom:

30ndinyuŋ nda kpukpru usenubɔk ntoro, nnyuŋ ŋkwɔ nnɔ Jehovah, ye ke mbubreyo ŋko kpa ntre;

31ndinyuŋ ŋwa kpukpru edifɔp uwa nnɔ Jehovah, ke mme sabbath, ye ke mbufa ɔfiɔŋ, ye ke ini eke ekedoride, nte ibat mmɔ, ye ido mmɔ edide kpukpru ini ke iso Jehovah:

32man mmɔ enyuŋ ekpeme ukpeme efe esop, ye ukpeme edisana ebiet, ye ukpeme nditɔ Aaron, nditɔ-ete mmɔ, ke erisaŋa ŋkpɔ ufɔk Jehovah.