ISAIAH 49 - Efik Old Bible With Sectional Headings

Israel Edi Uŋwana Enɔ Mme Idut

1MBUFO mme isuo ekop uyo mi: mbufo mme idut nyom-usuŋ, ekpaŋ utɔŋ enɔ mi; Jehovah okokot mi ke itie-eyen; eketiŋ enyiŋ mi ke idibi eka mi.

2Enye onyuŋ anam inua mi ebiet edisɔp ofut; omodip mi ke mfut ubɔk esiemɔ, onyuŋ anam mi ndi edisɔp idaŋ; odip mi ke odibe-idaŋ esie.

3Onyuŋ ɔdɔhɔ mi, ete, O Israel, afo edi owo mi, emi ndidade fi ubɔŋ ke idem.

4Ndien ami ndɔhɔ, nte, Mmanam utom ke ikpikpu, mmɔduɔk nsɔŋidem mi ke se miduhe du, ye ke ikpikpu; ke akpanikɔ ikpe mi odu ye Jehovah, ŋkpɔ-eyen-utom mi onyuŋ odu ye Abasi mi.

5Ndien ke emi, emi edi uyo Jehovah emi okobotde mi ke itie-eyen onim ke owo esiemɔ, man nda Jacob mfiak nsɔk enye; edi iditaŋke Israel ibon; edi ami nyennyene ukpono ke iso Jehovah, Abasi mi omonyuŋ edi odudu mi.

6Ndien enye ɔdɔhɔ, ete, Emi afo edide owo mi emi edinamde mme esien Jacob edaha ke enyɔŋ, onyuŋ adade nditɔ Israel emi enimde, afiak edi, ekpekpri, ami nyenyuŋ nnim fi ke uŋwana mme idut, man afo ekpedi erinyaŋa mi tutu osim ke utit ererimbot.

7Ntem ke Jehovah, andifak Israel, Edisana Abasi esie, ɔdɔhɔ ye enye emi kpukpru owo esede ke ndek, ye enye emi obio asuade, ye ofin mbɔm, ete, Ndidem eyekut enyuŋ edaha ke enyɔŋ, mbɔŋ ŋko eyekut enyuŋ etuak ibuot: ebaŋa Jehovah emi anamde ŋkpɔ ke akpanikɔ, Edisana Abasi Israel emi ekemekde fi.

8Ntem ke Jehovah ɔdɔhɔ, ete, Mma nyere fi ke ini mfɔnido, mma nnyuŋ nnyaŋa fi ke usen erinyaŋa; ndien ami nyenyuŋ ŋkpeme fi, nnyuŋ nnim fi ke ediomi mbio-obio, man afo eneŋere ererimbot onim, onyuŋ edeme udeme eke ebiarade;

9man afo ɔdɔhɔ mbon ŋkpɔkɔbi, ete, Mbufo ewɔŋɔ; ye mmɔ eke edude ke ekim, ete, Eyarare idem mbufo. Mmɔ eyeta mbiet ke ɔkpɔ-usuŋ, mbiet mmɔ eyenyuŋ odu ke kpukpru iferi obot.

10Biɔŋ ididɔŋke mmɔ, itɔŋ idinyuŋ isatke mmɔ; eyo ye utin idibɔŋke mmɔ: koro anditua mmɔ mbɔm eyeda mmɔ usuŋ, eyeda mmɔ aka ke ɔtɔ eke mmɔŋ otopde ɔwɔrɔ.

11Ndien nyenim kpukpru ikpɔ obot mi ke usuŋ, ndien ɔkpɔ-usuŋ mi eyekoŋ.

12Sese, mme mmɔ emi eyeto ke anyan idut edi: sese, mmɔ emi ŋko eto ke edem edere, ye ke edem inyaŋ; mme mmɔ emi ŋko enyuŋ eto ke idut Sinim.

13Mbufo enyɔŋ, ekwɔ; isɔŋ, nyuŋ dara; mbufo ikpɔ obot ebumere ekwɔ: koro Jehovah ɔdɔŋde ikɔt esiemɔ esit, eyenyuŋ atua ikɔt esie emi etuhɔde, mbɔm.

14Edi Zion ɔdɔhɔ, ete, Jehovah ɔmɔkpɔŋ mi, Ɔbɔŋ mi omonyuŋ efre mi.

15Nte ŋwan ekeme ndifre eyen-nsek esiemɔ, nnyuŋ ntre nditua eyen emi enye amande mbɔm? Idem mmɔ ekeme ndifre, edi ami ndifreke fi.

16Sese, mmakap fi nsin ke eka-ubɔk mi: ibibene fo esuk edu mi ke iso kpukpru ini.

17Nditɔ fo ewara edi; mmɔ eke ewuride enyuŋ ebiatde fi eyeto fi ke esit ewɔŋɔ.

18Menere enyin fo kanare kuk, nyuŋ se; kpukpru mmɔ esop idem, edi ke ɔtɔ fo. Jehovah ɔdɔhɔ ete, Ma uwem mi, afo udutreke ndisine mmɔ kpukpru, nte ŋkpɔ mbana, nnyuŋ mbɔbɔ mmɔ ke idem nte ŋwan ndɔ.

19Koro mme ebiet fo emi ewurede enyuŋ esomode, ye isɔŋ fo emi abiarade, eyefaha ke emi ekan mme andiduŋ; mmɔ eke ediade fi eyenyuŋ eyom usuŋ.

20Nditɔ itie-unana fo eyetɔŋɔ ntak edɔhɔ fi ke utɔŋ, ete, Ebiet afaha mi akan: sehere nɔ mi, man nduŋ.

21Ndien afo eyedɔhɔ ke esit fo, ete, Anie akaman mme mmɔ emi ɔnɔ mi, ndien ami ŋkanana nditɔ, nnyuŋ ndi ada, ndi ibuot-ekɔŋ, ye owo eke etaŋde efep? Anie ɔkɔbɔk mme mmɔ emi? Sese, ami nsuk ikpɔŋ ke idem mi: mme mmɔ emi eto mmɔŋ?

22Ntem ke Ɔbɔŋ Jehovah ɔdɔhɔ, ete, Sese, nyenyanare ubɔk mi nnɔ mme idut; nnyuŋ mmenere banner nnɔ mme obio: ndien mmɔ eyekama nditɔ-iren fo ke ikpanesit edi, enyuŋ ebiom nditɔ-iban fo ke afara.

23Ndien ndidem eyedi mme andikɔ fi, iban mmɔ eyenyuŋ enɔ fi eba: mmɔ eyetuk iso ke isɔŋ enɔ fi, enyuŋ edei ɔkɔp ukot fo; ndien afo eyefiɔk ete ke ami ndi Jehovah, emi but midinamke mmɔ eke eberede idem ye ami.

24Nte edibɔ ɔkpɔsɔŋ owo mbume? nte mbuot ekɔŋ edinen owo edibɔhɔ? (Ih:)

25koro ntem ke Jehovah ɔdɔhɔ, ete, Eyebɔ idem ɔkpɔsɔŋ owo mbuot ekɔŋ esie, mbume owo ndik eyenyuŋ ɔbɔhɔ: ndien edi ami nditɔhɔ ye mmɔ eke etɔhɔde ye afo, edi ami ndinyuŋ nnyaŋa nditɔ fo.

26Ndien nyenɔ mmɔ eke efikde fi obuk idem mmɔ eta; ndien mmɔ eyeŋwɔŋ iyip idem mmɔ ekpa, nte ke obufa wine: ndien ofuri obukidem eyefiɔk, ete ke ami Jehovah ndi andiyaŋa fi, ke andifak fi onyuŋ edi Ɔkpɔsɔŋ Abasi Jacob.