EZRA 6 - Efik Old Bible With Sectional Headings

Etɔŋɔ Ntak Edemere Ewuhɔ Darius

1EKEM Darius edidem owuk ewuhɔ, ndien mmɔ eduŋɔre ufɔk unim-ŋwed emi enimde ŋkpɔ-uto do ke Babylon.

2Ekem mmɔ ekut ikpa kiet ke Achmetha, ke ufɔk ubɔŋ emi odude ke province Media, emi ewetde ŋwed ke esit ntem:

3“Ke akpa isua Cyrus edidem, edidem Cyrus owuk ewuhɔ ufɔk Abasi ke Jerusalem, ete, Yak ebɔp ufɔk oro ke ebiet oro ekewade uwa, esɔŋɔ ewuk ibibene esie; idaha esie ibio-idomo-okuk ata, ye ubom esie ibio-idomo-okuk ata;

4enyene udim ikpɔ itiat ita, ye udim obufa eto kiet; ndien yak mmɔ esio ekɔm-urua ke ufɔk edidem enɔ:

5ndien ŋko yak eda mkpoduoho ufɔk Abasi o-gold ye silver oro Nebuchadnezzar oko-sioŋode ke temple emi odude ke Jerusalem, ada edi ke Babylon, efiak eka ke temple ke Jerusalem ke itie mmɔ, yak enyuŋ enim mmɔ ke ufɔk Abasi.”

6“Mmɔdo, Tattenai, andikara edem akpa oko, Shethar-bozenai, ye mme nsaŋa mmɔ, mme Apharsachite emi edude ke edem akpa oko, mbufo edaha ekpɔŋ ebiet oro anyan usuŋ:

7eyak utom ufɔk Abasi emi etie suŋ; yak ɔbɔŋ mme Jew, ye mbiowo mme Jew ebɔp ufɔk Abasi emi ke itie esie.

8Ami mmonyuŋ ŋwuk ewuhɔ mbaŋa se mbufo edinamde ye mbiowo me Jew emi, man ebɔp ufɔk Abasi emi: nte emen idem esio inyene ke utip edidem utomo edem akpa oko, enɔ mbio emi, man ekudop.

9Ndien ke se mmɔ enanade, ke abak enaŋ, ye okukim erɔŋ ye nditɔ-erɔŋ, ke eke edifɔp uwa Abasi enyɔŋ, ye wheat, ye inuŋ, ye wine, ye aran, kpa nte mme oku ke Jerusalem esiakde, yak ekutre ndinɔ mmɔ kpukpru usen:

10man mmɔ ewa uwa eti utebe enɔ Abasi enyɔŋ, enyuŋ enam mkpe-ubɔk enɔ uwem edidem, ye eke nditɔ esie.

11Ami mmonyuŋ ŋwuk ewuhɔ, nte, Yak esio eto ke ufɔk owo ekededi eke ɔkpuhɔrede ikɔ emi, ewuk, enyuŋ eyiri enye ke esit; enyuŋ enim ufɔk esie ke ufɔk ekwe, ebaŋa ŋkpɔ emi.

12Ndien yak Abasi emi akanamde enyiŋ esie oduŋ do, osobo kpukpru ndidem ye obio eke edimenerede ubɔk mmɔ ndikpuhɔre, nnyuŋ ŋwuri ufɔk Abasi emi odude ke Jerusalem. Ami Darius mmowuk ewuhɔ: yak emen idem enam.”

13Ekem Tattenai andikara edem akpa emi, ye Shethar-bozenai, ye mme nsaŋa mmɔ emen idem enam ntem, kpa nte Darius edidem eketemede.

14Ndien mbiowo mme Jew ebɔp, enyuŋ ekut unen, ke uyo prophecy Haggai prophet, ye eke Zachariah eyen Iddo. Mmɔ enyuŋ ebɔp ema ke uyo Abasi Israel, ye ke uyo Cyrus, ye eke Darius, ye eke Artaxerxes, edidem Persia.

15Ntre ke mmɔ ema ufɔk emi ke ɔyɔhɔ usen ita ke ɔfiɔŋ Adar, emi edide ɔyɔhɔ isua ubɔŋ Darius edidem itiokiet.

16Ekem nditɔ Israel, ye mme oku, ye mme Levite, ye mmɔ efen emi eketode ke itie ntaŋ-mfep enim usɔrɔ uberere usuŋ ufɔk Abasi emi ke idara.

17Ndien ke eriberere ufɔk Abasi emi mmɔ ewa enaŋ ikie, ye okukim ikie iba, ye nditɔ-erɔŋ ikie inaŋ; ye okpo ebot duopeba ke uwa idiɔk ido ofuri Israel, ekem ye ibat mme esien Israel.

18Mmɔ enyuŋ etim mme oku esin ke ŋka mmɔ, ye mme Levite ke udim mmɔ, ke utom Abasi emi odude ke Jerusalem, kpa nte ekewetde ke ŋwed Moses.

19Ndien mme mmɔ oro eketode ke itie ntaŋ-mfep enim passover ke ɔyɔhɔ usen akpa ɔfiɔŋ duop-enaŋ.

20Koro mme oku ye mme Levite ekenamde idem mmɔ esana ini kiet, kpukpru mmɔ edi edisana, ndien mmɔ ewot passover enɔ kpukpru mmɔ eke eketode ke itie ntaŋ-mfep, ye nditɔete mmɔ mme oku, ye idem mmɔ.

21Ndien nditɔ Israel oro eketode ke itie ntaŋmfep efiak edi, ye kpukpru mmɔ eke ekedianarede idem mmɔ efep ke mbubiam ido mbon idut oro, ediana ye mmɔ eyom Jehovah Abasi Israel, edia,

22mmɔ enyuŋ enim usɔrɔ uyo eke leaven miduhe, ke usen itiaba ke idara: koro Jehovah akanamde esit adat mmɔ, okonyuŋ akabarede esit edidem Assyria ama mmɔ, onyuŋ ɔsɔŋ mmɔ ubɔk ke utom ufɔk Abasi, Abasi Israel.