ISAIAH 59 - Efik Old Bible With Sectional Headings

Oku Abasi Asua Ɔnɔ Ukwaŋ Ido ke Obio

1SESE, ubɔk Jehovah ikabakede imuhɔ ikan nte enye anyaŋade; utɔŋ esie inyuŋ idobike ikan nte enye okopde;

2edi mme idiɔk ŋkpɔ mbufo emedianare mbufo ye Abasi mbufo, mme oburobut ido mbufo emenyuŋ edip mbufo iso esie, esin enye okukop.

3Koro iyip asabarede mbufo ubɔk, idiɔk ido onyuŋ asabare mbufo nnuenubɔk; mkpɔk-inua mbufo ededɔhɔ nsu, edeme mbufo etetiŋ ukwaŋ-ŋkpɔ.

4Baba owo kiet ikotke (owo) ke edinen ido, baba kiet inyuŋ ikpehe ikpe ke akpanikɔ: mmɔ ebuɔt idem mmɔ ke se idide ikpikpu, enyuŋ edɔhɔ nsu; eyomo ibak, enyuŋ eman ukwaŋ-ŋkpɔ.

5Mmɔ ekubɔ nsen uruk-ikɔt, enyuŋ edɔk mkpaŋ utue: owo eke adiade nsen mmɔ eyekpa; se inuahade eyenyuŋ ɔwɔrɔ ibɔm.

6Mkpaŋ mmɔ idikabakede idi ɔfɔŋ-idem, ndien mmɔ ididaha se mmɔ enamde ifuk idem: se mmɔ enamde mmɔ enam ke ibak, utom afai onyuŋ odu mmɔ ke ubɔk.

7Ukot mmɔ efeŋe enam se idiɔkde; enyuŋ ewara ndiduɔk iyip owo eke miduehe: ekikere mmɔ edi ekikere ibak; nsobo ye nwure edu ke ɔkpɔ-usuŋ mmɔ.

8Mmɔ ifiɔkke usuŋ emem; eti ido inyuŋ iduhe ke ɔkpɔ-usuŋ mmɔ: emekwaŋa usuŋ mmɔ ke idem mmɔ: baba owo kiet eke asaŋade ke esit ifiɔkke emem.

9Oro esin edinen ikpe oyom usuŋ ye nnyin, edinen ido idinyuŋ isimke nnyin: nnyin ibet uŋwana ndien sese ekim; ibet uyama, ndien sese, isaŋa ke mbubreyo.

10Nnyin ifefiɔŋɔ ibibene nte nnan, ifiɔŋɔ nte mme anana enyin: ituak ukot iduɔ ke ufɔt uwemeyo, kpa nte ke mfuŋ-mfuŋ mbubreyo; ke ata ekim kpa nte mme akpaŋa mkpa.

11Kpukpru nnyin ikuni nte bear, inyuŋ imum mmum nte ibiom; ibet edinen ikpe, edi iduhe du; itie ibet erinyaŋa, edi oyom usuŋ ye nnyin.

12Koro mme idiɔk ido nnyin ewakde ke iso fo, mme ukwaŋ-ŋkpɔ nnyin enyuŋ ebɔrɔ ebaŋa nnyin: koro mme idiɔk ido nnyin edude ye nnyin; ndien ama edi mme ukwaŋ-ŋkpɔ nnyin imɔfiɔk mmɔ.

13Ke inam idiɔk, isu nsu, ibaŋa Jehovah, ikabare ikpɔŋ Abasi nnyin, idɔhɔ ufik ye nsɔŋ-ibuot, iyomo inyuŋ itiŋ ikɔ nsu ke esit.

14Enyuŋ ebin edinen ido afiak edem, eti ido onyuŋ ada nsan-nsan: koro akpanikɔ ɔmɔduɔ ke aŋwa, se inende inyuŋ ikemeke ndiduk.

15Ndien akpanikɔ anana; owo eke akabarede ɔkpɔŋ idiɔk onyuŋ onim idem esie ke ŋkpɔ mbume.

Ndien Jehovah okut, ndien ɔdiɔk enye ke enyin, koro edinen ikpe miduhe.

16Ndien enye okut ete ke owo baba kiet iduhe, onyuŋ eyik koro baba esine-ufɔt miduhe: ndien ubɔk esie anyaŋa ɔnɔ enye: edinen ido esiemɔ onyuŋ omum enye akama.

17Ndien enye esine edinen ido ke idem nte edisine-ŋkpɔ, onyuŋ ayara ndun erinyaŋa ke ibuot: onyuŋ esine ɔfɔŋ-idem usiene ke edisine-ŋkpɔ, onyuŋ ada ufup ofuk idem nte ekura.

18Kpa nte ido mmɔ asaŋade, kpa ntre ke enye edinɔ, ɔnɔ mme usua esie iyat esit, ɔnɔ mmɔ eke etɔhɔde ye enye se mmɔ edotde; eyenɔ mme isuo se mmɔ edotde.

19Ndien owo eyeto ke edem usop-utin edibak enyiŋ Jehovah, eto ke edem usiaha edibak ubɔŋ esie. Ke ini usua odukde nte akpa mmɔŋ, spirit Jehovah eyemenere banner ke enyɔŋ abaŋa enye.

20Ndien andifak eyedi ke Zion, onyuŋ etiene mmɔ eke ekabarede ekpɔŋ mme idiɔk ido ke Jacob: emi edi uyo Jehovah.

21Ndien Jehovah ɔdɔhɔ ete, Ama edi ami, emi edi ediomi mi ye mmɔ: spirit mi emi odorode fi ke idem, ye ikɔ mi emi nsinde fi ke inua, idikpɔŋke inua fo, ye inua nditɔ fo, ye inua nditɔ nditɔ fo, ke emi ye ke nsinsi: emi edi uyo Jehovah.