ŊWED MBON ROME 6 - Efik Old Bible With Sectional Headings

Nnyin Inyene Ndiyirede Ŋkpɔŋ Idiɔk- Ŋkpɔ

1NSO ndien ke nnyin ididɔhɔ? Nte nnyin ikpamana iyire idiɔk-ŋkpɔ, man mfɔn ɔdɔdiɔŋ awak?

2Nsa nnyin O! Nnyin, emi ima ikakpaŋa iwɔrɔ ikpɔŋ idiɔk-ŋkpɔ, idinam didie idu uwem ke esit aba?

3Mme nte mbufo ifiɔkke ite kpukpru nnyin, emi ikanade baptism iduk ke Christ Jesus, ikana baptism iduk ke mkpa Esie?

4Mmɔdo ke baptism nnyin ikɔbuhɔ ye Enye iduk ke mkpa; man, nte Ete akadade ubɔŋ Esie anam Christ eset ke mkpa, kpa ntre ke nnyin ŋko ikpasaŋa ke obufa uwem.

5Koro edieke nnyin ima ikadiana ye Enye ke mkpa eke ebietde mkpa Esie, nnyin iyenyuŋ idi kiet ye Enye ke eriset eke ebietde eriset Esie;

6sia imɔfiɔk emi ite, ema ewot akani owo emi nnyin ikedide ke cross ye Enye, man ebiat ikpɔhidem idiɔk-ŋkpɔ, man nnyin ikudi aba ifin idiɔk-ŋkpɔ;

7koro ikpe idiɔk-ŋkpɔ etebe owo eke ama akakpa.

8Edi edieke nnyin ima ikakpa ye Christ, nnyin iminim ite nnyin iyenyuŋ idu uwem ye Enye.

9Koro nnyin imɔfiɔk ite Christ ikpaha aba ke Enye ama ekeset ke mkpa:

10mkpa ikarake Enye aba. Koro mkpa emi Enye akakpade, ke Enye akpa ini kiet ɔwɔrɔ ɔkpɔŋ idiɔk-ŋkpɔ; edi uwem emi Enye odude, ke Enye odu ɔnɔ Abasi.

11Kpa ntre ŋko ke mbufo ebat ete, ima ikpa iwɔrɔ ikpɔŋ idiɔk-ŋkpɔ, edi ke idu uwem inɔ Abasi ke Christ Jesus.

12Mmɔdo ekuyak idiɔk-ŋkpɔ ada ubɔŋ ke ikpɔhidem mbufo emi edikpade, esin mbufo esuk ibuot enɔ enye ke mme idiɔk udɔŋ esie:

13ekunyuŋ eyak mbak idem mbufo enɔ idiɔk-ŋkpɔ ndida nnam ukwaŋkpɔ; edi eyak idem mbufo enɔ Abasi nte mmɔ emi ema eset ke mkpa, enyuŋ eyak mbak idem mbufo enɔ Abasi ndida nnam edinen ido.

14Koro idiɔk-ŋkpɔ idikarake mbufo; koro mbufo iduhe ke idak ibet, edi edu ke idak mfɔn.

15Nso ndien? nte idinam idiɔk-ŋkpɔ, sia nnyin miduhe ke idak ibet, edi iduhe ke idak mfɔn?

16Ŋwaŋa nsa O! Nte mbufo ifiɔkke ite mme imɔ idi ifin inɔ ŋkpɔ ekededi eke mme imɔ iyakde ekededi eke mme imɔ iyakde idem inɔ ndisuk ibuot nnɔ enye, ye enye edide idiɔk-ŋkpɔ eke ɔsuŋɔde ke mkpa, ye enye edide nsuk-ibout eke ɔsuŋɔde ke edinen ido.

17Edi ekɔm enyene Abasi, koro mbufo, emi ekedide ifin idiɔk-ŋkpɔ, emada ofuri esit esuk ibuot enɔ oruk erikpep emi ekeyakde mbufo esin ke esit;

18ema esio mbufo ke ubɔk idiɔk-ŋkpɔ, mbufo emekabare edi ifin edinen ido.

19Ntiŋ nte owo kabaŋa unana ukeme mbufo ke obukidem. Koro nte mbufo ekeyakde mbak idem mbufo nte ifin enɔ mbubiam ido ye otime-otime ido emi osuk atakde ndikɔkɔri, kpasuk ntre ke emi eyak mbak idem mbufo nte ifin enɔ edinen ido, man mbufo ekabare esana.

20Koro ke adaŋemi mbufo ekedide ifin idiɔk-ŋkpɔ, mbufo isaŋake ŋkpɔ ye edinen ido.

21Nso mfri ke mbufo ekokut adaŋoro ke ŋkpɔ eke enamde mbufo but idahemi? koro utit mme ŋkpɔ oro edide mkpa.

22Edi ke emi ema ekosio mbufo itie-ufin idiɔk-ŋkpɔ, enyuŋ enam mbufo edi ikɔt Abasi, mbufo esioŋo mfri eke ɔwɔrɔde edisana ido ɔnɔ mbufo, utit esie onyuŋ edi nsinsi uwem.

23Koro ŋkpɔ-eyen-utom idiɔk-ŋkpɔ edi mkpa, edi enɔ Abasi edi nsinsi uwem ke Christ Jesus Ɔbɔŋ nnyin.