JOSHUA 6 - Efik Old Bible With Sectional Headings

Ibibene Jericho Ɔduɔ

1(NDIEN Jericho etim esin usuŋ obio ebak nditɔ Israel: baba owo kiet idukke, baba owo kiet inyuŋ iwɔrɔke.)

2Ndien Jehovah ɔdɔhɔ Joshua, ete, Sese, nda Jericho, ye ɔbɔŋ esie, mbon uko oro, nsin fi ke ubɔk.

3Kpukpru mbufo mbon-ekɔŋ, ndien, ekan obio ekuk, esaŋa ekanade obio ini kiet. Enam ntem ke ofuri usen itiokiet.

4Ndien yak oku itiaba ebiom obukpoŋ itiaba ebem ekebe iso; ndien ke ɔyɔhɔ usen itiaba, mbufo ekan obio ekuk utim ikatiaba, mme oku enyuŋ efuri obukpoŋ.

5Ndien ama ekem, adaŋemi efuride obukpoŋ, ke mbufo ekopde uyo ukorowo oro, yak kpukpru owo efiori akamba mfiori; ndien ibibene obio eyeduɔ ke itie esiemɔ, ndien yak kpukpru owo eneŋere iso edɔk.

6Ekem Joshua eyen Nun okot mme oku, onyuŋ ɔdɔhɔ mmɔ ete, Mbufo emen ekebe ediomi, oku itiaba enyuŋ ekama obukpoŋ itiaba ebem ekebe Jehovah iso.

7Ndien mmɔ edɔhɔ kpukpru owo, ete, Mbufo ebe ekanade obio ekuk, ndien yak mmɔ emi ekamade ŋkpɔ-ekɔŋ ebem ekebe Jehovah iso.

8Edikem adaŋemi Joshua ama ɔkɔdɔhɔ ye mmɔ, ndien mme oku itiaba emi ebiomde obukpoŋ itiaba ebem Jehovah iso, enyuŋ efuri obukpoŋ: ndien ekebe Jehovah etiene mmɔ edem.

9Ndien mbon-ekɔŋ ebem mme oku emi efuride obukpoŋ iso, ndien mme mmɔ emi esaŋade ke edem ebine ekebe, ndien mmɔ esaŋa ntre efuri obukpoŋ.

10Edi Joshua ama okowuk kpukpru owo, ete, Mbufo ekufiori, ekunyuŋ eyak ekop uyo mbufo, ekuyuŋ eyak baba ikɔ kiet ɔwɔrɔ mbufo ke inua, tutu osim ke usen emi ndidɔhɔde mbufo, nte, Efiori; ndien mbufo efiori.

11Ntem ke ekebe Jehovah akanade obio okuk ini kiet: ndien mmɔ eduk ke nna, eyuŋ edaŋ ke nna.

12Ekem Joshua abak ke usen-ubɔk adaha ke enyɔŋ, mme oku enyuŋ ebiom ekebe Jehovah.

13Ndien mme oku itiaba ekama obukpoŋ itiaba ebem ekebe Jehovah iso esaŋa, enyuŋ efuri obukpoŋ: mbon-ekɔŋ enyuŋ ebem mmɔ iso esaŋa; mmɔ emi esaŋade ke edem enyuŋ etiene ekebe Jehovah, esaŋa enyuŋ efuri obukpoŋ oro.

14Mmɔ enyuŋ ekanade obio ekuk ini kiet ke udiana-akpa usen, ndien efiak ke nna. Mmɔ enam ntem ke ofuri usen mbitiokiet.

15Edikem ke ɔyɔhɔ usen itiaba, eyo esiere, mmɔ ebak edaha ke enyɔŋ, ndien ekanade obio ekuk nte ekam esinamde, utim ikatiaba; edi mmɔ ekanade obio ekuk utim ikatiaba ke usen oro.

16Ekem ke ɔyɔhɔ utim ikatiaba, mme oku efuri obukpoŋ, ndien Joshua ɔdɔhɔ kpukpru owo, ete, Mbufo efiori: koro Jehovah amada obio ɔnɔ mbufo.

17Ndien yak enim obio ye kpukpru se idude ke esit ke ŋkpɔ nsobo enɔ Jehovah: edi Rahab akpara edidu uwem, ye kpukpru mmɔ eke edude ye enye ke ufɔk esie: koro enye okodipde mme isuŋ utom oro nnyin ikedɔŋde utom.

18Edi mbufo ekpeme ŋkpɔ nsobo, mbak editre ndisobo, enyuŋ eda nkpɔ nsobo, ndien enam nna Israel akabare edi ŋkpɔ nsobo enyuŋ etuhɔ enye.

19Ndien kpukpru silver, ye gold, ye ŋkpɔ okpoho, ye ukwak, edi ndisana ŋkpɔ Jehovah: mmɔ eyeduk ke ebiet unim-ŋkpɔ Jehovah.

20Ndien kpukpru owo efiori, mmɔ enyuŋ efuri mme obukpoŋ; ndien edikem, ke ini kpukpru owo ekopde uyo obukpoŋ, mmɔ efiori akamba mfiori, ndien ibibene ɔduɔ ke itie esiemɔ, ndien kpukpru owo kiet kiet eneŋere iso edɔk eduk ke obio, ndien mmɔ eda obio.

21Ndien mmɔ eda iso ofut esobo kpukpru se idude ke obio, ɔtɔŋɔde ke eren tutu osim ŋwan, ɔtɔŋɔde ke eyenɔwɔŋ tutu osim mbiowo, ye enaŋ, ye ŋkpri ufene, ye mme ass.

22Ndien Joshua ɔdɔhɔ owo iba oro ekeyepde isɔŋ, ete, mbufo eka ke ufɔk akparaŋwan oro, ekesio ŋwan, ye kpukpru se enye enyenede do, kpa nte mbufo ekeŋwɔŋɔde enɔ enye.

23Ndien mkparawa, kpa mbon uyep oro, eka ekesio Rehab, ye ete esie ye eka esie ye nditɔ-eka esie, ye kpukpru se enye enyenede; ntem ke mmɔ esio ofuri oruk esie, eda ekenim ke edem nna Israel.

24Ndien mmɔ efɔp obio, ye kpukpru se idude ke esit ke ikaŋ: edi mmɔ eda silver, ye gold, ye ŋkpɔ okpoho, ye ukwak, esin ke unim-ŋkpɔ ufɔk Jehovah.

25Ndien Joshua onim Rahab akpara, ye ufɔk ete esie, ye kpukpru se enye enyenede, ke uwem; enye onyuŋ odu ke ufɔt Israel tutu osim mfin emi: koro enye okodipde mme isuŋ-utom oro Joshua ɔkɔdɔŋde ekeyep Jericho.

26Ndien Joshua owuk ke ini oro, ete, osuk ɔdɔdiɔk ke iso Jehovah ɔnɔ owo eke edidahade ada ɔbɔp obio Jericho emi: enye eyeda akpan esiemɔ ɔtɔŋɔ ndibɔp, onyuŋ ada ekpere-edem eyen esiemɔ ɔkɔŋɔ mme itim esie.

27Ndien Jehovah odu ye Joshua; ndien etop esie asuana ke ofuri idut.