ŊWED MBON ROME 4 - Efik Old Bible With Sectional Headings

Yak Abraham Edi Uwut-Ŋkpɔ Ɔnɔ Nnyin

1NSO ndien ke nnyin ididɔhɔ ibaŋa Abraham, emi edide akwa ete nnyin ke obukidem?

2Edieke ekadade erinam utom etebe Abraham ikpe, enye ekpenyene ntak ndibure mbure Edi enye ikenyeneke ntak mbure ke iso Abasi.

3Koro ŋwed Abasi ɔdɔhɔ didie? ete, Edi Abraham ɔbuɔtidem ye Abasi, ndien ebat oro enɔ enye ke edinen ido.

4Edi ye owo emi anamde utom, ibatke utip eke enɔde enye nte ŋkpɔ mfɔn, edi ebat nte isɔn.

5Edi ye owo eke minamke utom, edi ɔbuɔtde idem ye Enye emi anamde ikpe etebe mme idiɔk owo, ebat mbuɔtidem esie ke edinen ido.

6Kpa nte David ŋko etiŋde ikɔ eridiɔŋ abaŋa owo oro Abasi abatde edinen ido eke misaŋake ye erinam utom ɔnɔ enye,

7ete,

Ɔfɔfɔn ɔnɔ mmɔ emi efende mme idiɔk ido mmɔ,

Enyuŋ efukde mmɔ.

8Ɔfɔfɔn ɔnɔ owo emi Jehovah midibatke mme ukwaŋkpɔ inɔ enye.

9Nte ke etiŋ ikɔ eridiɔŋ emi enɔ mmɔ emi enade mbobi, mme etiŋ enɔ mmɔ emi minaŋa mbobi ŋko? nnyin idɔhɔ ite, Ekebat mbuɔtidem Abraham enɔ enye nte edinen ido.

10Ekebat edidie? Ndi ke ini eke enye anade mbobi, mme ke ini eke minaŋa mbobi? idige ke ini eke enye anade mbobi, edi ke ini eke enye minaŋa;

11ndien enye ɔkɔbɔ mbobi nte idiɔŋɔ, ndinam edinen ido mbuɔtiden emi enye ekenyenede ke ini enye minaŋa mbobi kaŋa ɔsɔŋɔ ada; man oto do enye ekpedi ete kpukpru mmɔ emi ebuɔtde idem, okposuk edi nte mmɔ minaŋa mbobi, man ebat edinen ido enɔ mmɔ;

12okponyuŋ edi ete mbobi ɔnɔ mmɔ emi midige mbon mbobi ikpɔŋ-ikpɔŋ, edi enyuŋ esaŋade ke nde ikpat mbuɔtidem, emi ete nnyin Abraham ekenyenede ke ini enye minaŋa mbobi kaŋa.

13Koro itoho ke ibet ke ekenɔ Abraham ye nditɔ esie uŋwɔŋɔ, ete enye edida ererimbot enyene, edi oto ke edinen ido eke mbuɔtidem adade edi.

14Koro edieke edide mbon ibet eda ererimbot enyene, mbuɔtidem ama akabare edi ikpikpu, uŋwɔŋɔ ama onyuŋ akabare okpu:

15koro ibet anam ifuresit odu; edi ɔtɔ nte ibet miduhe, eribiat ibet inyuŋ iduhe ŋko.

16Ke ntak emi uŋwɔŋɔ asaŋa ye mbuɔtidem, man edi ŋkpɔ mfɔn; man oto do uŋwɔŋɔ ɔkpɔsɔŋɔ ada ɔnɔ kpukpru nditɔ esie; ikpɔsɔŋɔke ida inɔ mbon ibet ikpɔŋ, edi ɔnɔ mmɔ nde emi enyenede mbuɔtidem Abraham,

17emi edide ete nnyin kpukpru (nte ewetde ete, Mmanam fi edi ete ediwak mme idut) ke enyin Esie emi enye ɔbuɔtde idem ye Enye, kpa Abasi, emi anamde mme akpa-mkpa edu uwem, onyuŋ okotde se miduhe nte ŋkpɔ eke edude.

18Abraham osuk odori enyin onim ke akpanikɔ ke ini idori-enyin miduhe, man enye ekpedi ete ediwak mme idut, kpa nte ekedɔhɔde enye ete, Ntem ke ubon fo editie.

19Enye ese ikpɔhidem esiemɔ, emi etiede adaŋaro nte ŋkpɔ eke ama akpa (sia enye adaŋde isua ikie ke uwem), onyuŋ okut nte Sarah ebede idaha uman;

20edi mbuɔtidem ibɔhɔke enye: enye owuk enyin ese uŋwɔŋɔ Abasi, inyuŋ iyikke ke unana mbuɔtidem, edi akabare enyene odudu oto ke mbuɔtidem, ɔnɔ Abasi ubɔŋ:

21onyuŋ otim obure ɔfiɔk ete, Abasi ekeme ŋko ndinam se Enye ɔkɔŋwɔŋɔde.

22Emi edi ntak eke ebatde mbuɔtidem esie enɔ enye ke edinen ido.

23Edi ikewetke ite ekebat enɔ enye kabaŋa idem esie ikpɔŋ;

24ekewet kabaŋa nnyin ŋko; edibat mbuɔtidem enɔ nnyin, emi ibuɔtde idem ye Enye emi akanamde Jesus Ɔbɔŋ nnyin eset ke mkpa;

25emi ekeyakde enɔ kabaŋa ndudue nnyin, ekenyuŋ enamde Enye eset, man ikpe etebe nnyin.