2 SAMUEL 2 - Efik Old Bible With Sectional Headings

Eyet David Aran Nte Edidem ke Judah

1EDIKEM ke ŋkpɔ oro ebede, David obup Jehovah, ete, Mme nyedɔk ŋka ke obio Judah kiet? Ndien Jehovah ɔdɔhɔ enye, ete, Dɔk. Ndien David obup, ete, Ndidɔk ŋka mmɔŋ? Ndien enye ɔdɔhɔ ete,Ke Hebron.

2Ndien David ɔdɔk aka do, ye iban esie iba ŋko, Ahinoam aŋwan a Jezreel, ye Abigail, ŋwan Nabal, Carmelite.

3Ndien David ada ikɔt esie oro edude ye enye ɔdɔk, kpukpru owo ye ufɔk mmɔ; ndien mmɔ eduŋ ke mme obio Hebron.

4Ndien nditɔ Judah eka ekeyet David aran do, enim ke edidem ufɔk Judah.

Ekem etiŋ enɔ David, ete ke edi mbio - obio Jabesh - Gilead ekebuk Saul.

5Ndien David ɔdɔŋ mme isuŋutom ke ɔtɔ mbio-obio Jabesh-Gilead, ekedɔhɔ mmɔ, ete, Yak Jehovah osuk ɔdiɔŋ mbufo, emi ekenamde ufɔn emi enɔ ete mbufo, kpa Saul, ke emi mbufo ebukde enye.

6Ndien yak Jehovah osuk anam ufɔn ye akpanikɔ ɔnɔ mbufo ŋko: ami ŋko nyesio mbufo usiene ufɔn emi, koro mbufo ekenamde ŋkpɔ emi.

7Mbufo esɔŋɔ ubɔk, ndien, enyuŋ edi mbon uko: koro ete mbufo Saul amakpa, ufɔk Judah ŋko ema enyuŋ eyet mi aran enim ke edidem mmɔ.

8Edi Abner eyen Ner, etubom mbon-ekɔŋ Saul, ada Ish-bosheth eyen Saul, asaŋa ebe aka ke Mahanaim;

9onyuŋ onim enye ke edidem Gilead, ye eke mme Ashurite, ye eke Jezreel, ye eke Ephraim, ye eke Benjamin, ye eke ofuri Israel.

10Ish-bosheth eyen Saul osim isua aba ke ini enye adade ubɔŋ Israel, enye onyuŋ edi edidem ke isua iba. Ufɔk Judah ikpɔŋ-ikpɔŋ etiene David.

11Ndien ibat isua emi David edide edidem ufɔk Judah ke Hebron edi isua itiaba ye ɔfiɔŋ itiokiet.

12Ekem Abner eyen Ner ye ikɔt Ish-bosheth eyen Saul eto ke Mahanaim edi ke Gibeon.

13Joab eyen Zeruiah ye ikɔ David enyuŋ ewɔŋɔ, eka ekesobo ye mmɔ ɔtɔ kiet ke mben mkpɔdiɔhɔ-mmɔŋ Gibeon: ndien mmɔ etie do, mme mmɔ emi ke edem mkpɔdiɔhɔ-mmɔŋ emi, ye mmɔ eken ke edem mkpɔdiɔhɔ-mmɔŋ eken.

14Ndien Abner ɔdɔhɔ Joab, ete, Yak mkparawa emi edaha ke enyɔŋ ebre mbre ke iso nnyin. Joab onyuŋ ɔdɔhɔ ete, Yak mmɔ edaha ke enyɔŋ.

15Ndien mmɔ edaha ke enyɔŋ ebe ke ibat, eke Benjamin, ye eke Ish-bosheth eyen Saul owo duopeba, ye eke ikɔt David owo duopeba.

16Ndien kpukpru mmɔ kiet kiet omum kiet ke ibuot, kiet onyuŋ otudi kiet ofut ke ŋkaŋ; ndien mmɔ eduɔŋɔ ke ɔtɔ kiet: ndien esio ebiet oro enyiŋ Helkath-hazzurim emi odude ke Gibeon.

17Ndien ata ɔkpɔsɔŋ ekɔŋ odu ke usen oro; ndien Abner ye mbon Israel esuana ke iso ikɔt David.

18Nditɔ Zeruiah ita enyuŋ edu do ŋko, Joab, ye Abishai, ye Asahel: Asahel onyuŋ ɔsɔp ukot nte edop kiet ke otu edop ikɔt.

19Ndien Asahel ebine Abner, inyuŋ iwahake iduk ke nnasia, inyuŋ iduk ke ufien, itre ndibine Abner.

20Ekem Abner akabare ese edem, onyuŋ ɔdɔhɔ ete, Nte oro idige afo Asahel?

21Ndien enye ɔbɔrɔ ete, Edi ami. Ndien Abner ɔdɔhɔ enye, ete, Waha ke nnasia fo, mme ke ufien fo, komum akparawa kiet, nyuŋ da mbume esie ke idemfo. Edi Asahel inyimeke ndiwɔŋɔre ntre ndibine enye.

22Ndien Abner ɔtɔŋɔ ntak ɔdɔhɔ Asahel, ete, Wɔŋɔre kpɔŋ mi: ke didie ke nditɔ fi nduɔk ke isɔŋ? Ndien ndinam didie ŋkeme ndimenere iso mi nse Joab eyen-uka?

23Edi enye inyimeke ndiwɔŋɔre: ndien Abner ada etak eduat okim enye ke idibi, eduat onyuŋ oyuɔwɔrɔ enye ke edem; ndien enye ɔduɔ ke isɔŋ do, onyuŋ akpa ke ɔtɔ oro: ndien edikem kpukpru owo eke esimde ebiet oro Asahel ɔduɔde ke isɔŋ akpa, etuak eda.

24Ntre ke Joab ye Abishai ebine Abner: ndien utin osop ke ini mmɔ esimde obot Ammah, emi asakde iso ese Giah ke usuŋ wilderness Gibeon.

25Ekem nditɔ Benjamin esop idem etiene Abner, enyuŋ ekabare edi udim kiet, ndien mmɔ etuak eda ke ibuot obot kiet.

26Ndien Abner ofiori okot Joab, ete, Nte ofut edisuk atata ke nsinsi? Nte ufiɔkke ete ke edidoro ke akpatre? Adaŋa ini ewe ndien ke afo editre ndidɔhɔ mbon oro, ete efiak edem etre ndibine nditɔ-ete mmɔ?

27Ndien Joab ɔdɔhɔ, ete, Ma uwem Abasi, ke afo mukpɔdɔhɔke, kpukpru mbon emi ikpetreke ndikpɔŋ nditɔ-ete mmɔ ndɔk ke idem usenubɔk emi.

28Ekem Joab ofuri ukorowo, ndien kpukpru owo etuak eda, inyuŋ ibineke aba Israel, inyuŋ iŋwanake aba ekɔŋ.

29Ndien Abner ye ikɔt esie esaŋa ke itihere Jordan ke ofuri okoneyo oro, ebe Jordan, enyuŋ esaŋa ebe ke ofuri Bithron, ndien ediwɔrɔ ke Mahanaim.

30Joab onyuŋ etre ndibine Abner, afiak edem, onyuŋ obon kpukpru owo; ndien owo David efurenaŋ ye Asahel iduhe.

31Edi ikɔt David ema ekekpeŋe nditɔ Benjamin, ye ikɔt Abner, owo ikie ita ye ata, ewot.

32Ndien mmɔ emen Asahel eka ekebuk enye ke udi ete esie, emi odude ke Bethlehem. Ekem Joab ye ikɔt esie esaŋa ofuri okoneyo oro ekesim Hebron ke usiere.