1 CHRONICLES 12 - Efik Old Bible With Sectional Headings

Mmɔ Emi Eketienede David Tɔŋɔ ke Wilderness

1NDIEN edi mme mmɔ emi eketiene David ke Ziklag, adaŋoro enye okukde idem esie abak Saul eyen Kish: mmɔ enyuŋ edu ke otu mbon uko oro eke-nyaŋade ke ekɔŋ:

2mmɔ edi ata-utiga ke ubɔk nnasia ye ke ubɔk ufien, efiɔk nditop itiat, enyuŋ efiɔk nditop idaŋ ke utiga, mmɔ enyuŋ eto ke nditɔ ete Saul eyen Benjamin.

3Etubom mmɔ edi Ahiezer, ye Joash, nditɔ Shemaah a Gibeathite; ye Jeziel, ye Pelet, nditɔ Azmaveth; ye Beracah, ye Jehu Anathothite,

4Ye Ishmaiah Gibeonite, ɔkpɔsɔŋ owo ke otu edip ye duop, onyuŋ akan edip ye duop oro; ye Jeremiah, ye Jahaziel, ye Johanan, ye Jozabad

5Gederathite, Eluzai, ye Jerimoth,

6ye Bealiah, ye Shemariah, ye Shephatiah Haruphite, Elkanah, ye Isshiah, ye Azarel, ye Joezer,

7ye Jashobeam, mme Korahite, ye Joelah, ye Zebadiah, ye nditɔ Jeroham a Gedor.

8Ekem ndusuk nditɔ Gadite, mbon uko, mbon udim-ekɔŋ emi etimde efiɔk otu-ekɔŋ ye eduat, emi iso mmɔ ebietde eke lion, enyuŋ esɔp ukot nte edop ke ikpɔ obot, edianare idem mmɔ etiene David ke ɔkpɔsɔŋ ebiet ke wilderness;

9Ezer etubom, Obadiah udiana-akpa, Eliab ɔyɔhɔ ita;

10Mishmannah ɔyɔhɔ

11inaŋ, Jeremiah ɔyɔhɔ ition, Attai

12itiokiet, Eliel itiaba, Johanan

13itiaita, Elzabad usukkiet, Jeremiah duop, Machbannai duopekiet.

14Mme mmɔ emi edi nditɔ Gad, mme etubom udim-ekɔŋ, kiet eke ekpride akara ikie, ndien andikpon ŋkan akara tɔsin.

15Edi mme mmɔ emi ekebe Jordan ke akpa ɔfiɔŋ, ke ini enye ɔyɔhɔde ada mben esie kpukpru; mmɔ enyuŋ esuan mme andiduŋ mme itihere, ke edem usiaha-utin, ye ke edem usop-utin.

16Ndusuk nditɔ Benjamin ye Judah enyuŋ etiene David ke ɔkpɔsɔŋ ebiet oro.

17Ndien David ɔwɔrɔ edisobo ye mmɔ, onyuŋ ɔbɔrɔ mmɔ, ete, Edieke mbufo etienede mi ke emem ndinyaŋa mme asua mi, ke ini idiɔk-ŋkpɔ miduhe mi ke ubɔk, Abasi mme ete nnyin eyese, onyuŋ ekpe.

18Ndien spirit oduk ke idem Amasai, etubom mme ndidaha (ndien enye ɔdɔhɔ), ete, O David, nnyin idi okuomɔ, nnyin ida ke edem fo, O eyen Jesse; emem, emem akam odu ye afo, emem akam onyuŋ odu ye mmɔ eke eŋwamde fi; koro Abasi aŋwamde fi. Ndien David ada mmɔ, onyuŋ onim mmɔ ke mme etubom udim esie.

19Ndusuk owo Manasseh ŋko edianare idem mmɔ etiene David, ke ini enye etienede mme Philistine aka ndiŋwana ekɔŋ ye Saul; edi iŋwamke mmɔ: koro mbɔŋ mme Philistine ekoide koi edɔŋ enye ɔnyɔŋ, ete, Enye eyeda ibuot nnyin adianare idemesie etiene ete esie Saul.

20Ke ini enye akade ke Ziklag, ndusuk mme Manassite edianare idem mmɔ etiene enye, kpa Adnah, ye Jozabad, ye Jediael, ye Michael, ye Jozabad, ye Elihu, ye Zillethai, mme etubom mme tɔsin Manasseh.

21Ndien mmɔ eŋwam David ke eriŋwana ye udim oro, koro kpukpru mmɔ edide mbon uko, mmɔ enyuŋ edi mbon udim ekɔŋ.

22Koro owo osuk etiene David kpukpru usen ndiŋwam enye, tutu mmɔ ekabare edi akamba nna-ekɔŋ, ebiet nna-ekɔŋ Abasi.

23Ndien mme mmɔ emi edi ibat mme etubom mmɔ eke ebɔbɔde mbɔbɔ-ekɔŋ, etiene David ke Hebron, ndida ubɔŋ Saul ŋkabare nnɔ enye, ke uyo Jehovah.

24Nditɔ Judah eke ekamade otu ekɔŋ ye eduat, tɔsin owo itiokiet ye owo ikie itiaita emi ebɔbɔde mbɔbɔ-ekɔŋ.

25Nditɔ Simeon, mbon-uko ke ekɔŋ, tɔsin owo itiaba ye owo ikie.

26Nditɔ Levi tɔsin owo inaŋ ye owo ikie itiokiet.

27Ndien Jehoiada edi etubom nditɔ Aaron, tɔsin owo ita ye owo ikie itiaba enyuŋ edu ye enye;

28ye Zadok akparawa kiet, owo uko, ye ufɔk ete esie, ndidaha edip ye iba.

29Ndien nditɔ Benjamin nditɔ ete Saul, tɔsin owo ita; koro akamba ubak mmɔ esuk ekekpeme ufɔk Saul, tutu osim ini oro.

30Nditɔ Ephraim ŋko tɔsin owo edip, ye owo ikie itiaita, mbon-uko ye mbon etop ke ufɔk mme-ete mmɔ.

31Eke ibio esien Manasseh ŋko, tɔsin owo efureta emi ekesiakde mmɔ enyiŋ, ete mmɔ eka ekenim David ke edidem.

32Nditɔ Issachar ŋko-ŋko emi efiɔkde ifiɔk ini, ndifiɔk se Israel ekpenamde; mme etubom mmɔ edi ikie iba; ndien kpukpru nditɔ ete mmɔ enam ke uyo mmɔ.

33Eke Zebulun ŋko eke ewɔŋɔde eka ekɔŋ, mbon asian ke ekɔŋ, ke ekama kpukpru ŋkpɔ-ekɔŋ, tɔsin owo aba ye duop, emi etimde ndida ke udim, idige ye esit iba.

34Ndien eke Naphtali tɔsin mme ndidaha, tɔsin owo edip ye efureba, emi ekamade otu-ekɔŋ ye eduat, enyuŋ edu ye mmɔ.

35Ndien eke mme Danite mbon-asian ke ekɔŋ, tɔsin owo edip ye itiaita ye owo ikie itiokiet.

36Nditɔ Asher ŋko eke ewɔŋɔde eka ekɔŋ, enyuŋ edide mbon-asian ke ekɔŋ, tɔsin owo aba.

37Ndien mme mmɔ emi eketode ke edem Jordan oko, kpa nditɔ Reubenite, ye eke Gadite, ye ibio esien Manasseh eke ekamade kpukpru oruk ŋkpo udim-ekɔŋ, edi tɔsin owo ikie, ye tɔsin edip.

38Kpukpru mme mmɔ emi, mbon ekɔŋ emi edade ke udim ke ofuri esit, eka ke Hebron ekenim David ke edidem ofuri Israel: ndien ŋko ofuri Israel emi esuhɔde, ekem esit kiet ndinim David ke edidem.

39Ndien mmɔ edu do ye David ke usen ita, ke edia ŋkpɔ enyuŋ eŋwɔŋ: koro nditɔ-ete mmɔ ekebeŋede mmɔ.

40Ndien ŋko mmɔ eke ekperede mmɔ, tutu osim ke Issachar, ye Zebulun ye Naphtali, eda uyo, ye udia, ye ndom-uyo, ye ebok fig, ye edisat grape, ye wine, ye aran, edori ke edem ass, ye camel, ye mule, ye enaŋ, eda edi, enyuŋ eda enaŋ ye ediwak ŋkpri ufene edi: koro idaresit odude ke Israel.