ECCLESIASTES 7 - Efik Old Bible With Sectional Headings

Enyene-ibuot owo ye Ndisime Owo

1ETI enyiŋ ɔfɔn akan eti aran; kpa ntre ke usen mkpa owo akan usen emana owo.

2Ɔfɔn ndika ufɔk ntuaŋa, akan ndika ufɔk udia: koro oro edide utit kpukpru owo: ndien owo uwem eyekere ke esit.

3Mfuhɔ ɔfɔn akan imam: koro mfuhɔ iso anamde esit akabare ɔfɔn.

4Esit mbon eti-ibuot odu ke ufɔk ntuaŋa; edi esit owo ndisime odu ke ufɔk mbre.

5Ɔfɔn owo ndikop nduari owo eti ibuot, akan owo ndikop ikwɔ mbon ndisime.

6Koro nte ndak akprakde ke idak eso, kpa ntre ke imam owo ndisime etie. Emi ŋko edi ikpikpu.

7Koro ufik anamde enyene-ibuot owo akabare edi ndisime; enɔ onyuŋ abiat owo esit.

8Utit ŋkpɔ ɔfɔn akan eritɔŋɔ ŋkpɔ: ndien ime esit ɔfɔn akan mkponesit.

9Kuyak spirit fo ɔsɔp iyaresit: koro iyaresit atakde ke ikpanesit mbon ndisime.

10Kudɔhɔ ete, Nsinam eyo oko ɔfɔnde akan emi? Koro afo mudaha eti ibuot ubup ubaŋa ŋkpɔ emi.

11Eti ibuot ɔfɔn akan akpa (eke owo adiade); akpan-akpan (ɔfɔn) ye mmɔ ekutde utin.

12Koro eti ibuot edide se ikpemede, inyene onyuŋ edi se ikpemede, edi ata ifiɔk ye eti ibuot eyenam mme andinyene enye edu uwem.

13Se ŋkpɔ emi Abasi anamde: koro anie ekeme ndineŋere se enye akwaŋde?

14Dat esit ke usen unen, nyuŋ kere ekikere ke usen nnanenyin: Abasi ama onyuŋ anam emi adian ye oro, man owo okukut baba ŋkpɔ kiet eke editienede enye edem.

15Mma ŋkere kpukpru ŋkpɔ emi ke ikpikpu mme usen mi; enyene eti owo eke esobode enye ke eti ido esie, onyuŋ enyene idiɔk owo eke ebigide uwem ke idiɔk ido esie.

16Kunim idem fo ke eti owo ukan: kunyuŋ unim idem fo ke enyene-ibuot ukaha: afo edinam didie abiara?

17Kunam idiɔk ŋkpɔ ukan, kunyuŋ udi ndisime owo: afo edinam didie akpa ke mikemke kaŋa ke ini fo?

18Ɔfɔn nte afo ɔsɔŋɔde omum emi; kunyuŋ usio ubɔk ke ŋkpɔ emi ufep: koro owo eke abakde Abasi eyewɔrɔ ke mme mmɔ emi kpukpru ɔbɔhɔ.

19Eti ibuot anam enyene-ibuot owo ɔsɔŋ akan mbɔŋ duop eke edude ke obio.

20Koro baba eti owo kiet eke anamde eti ndien midiɔkke, iduhe ke ererimbot.

21Kunyuŋ unim ibuot ke kpukpru ikɔ eke etiŋde; mbak afo edikop ofin fo nte osuŋide fi:

22koro esit fo ŋko ɔfiɔkde, ete ke afo ŋko ama onyuŋ osuŋi owo efen ediwak ini.

23Mmada eti ibuot ndomo kpukpru ŋkpɔ emi nse: ndɔhɔ nte, Yak nnyene ibuot; edi eti ibuot oyom usuŋ ye ami.

24Anie ekeme nditim ŋkut ŋkpɔ eke anade oyom usuŋ, onyuŋ ɔtuŋɔde eti-eti?

25Ndien ami nda esit mi ŋkabare ndifiɔk, nnyuŋ nduŋɔ, nnyuŋ nyom eti ibuot ye asian, nnyuŋ mfiɔk idiɔk ido nte ke edi ndisime, ye ndisime nte ke edi idat:

26ndien mmokut nte ŋwan eke esit esie edide iyire ye afia, eke ubɔk esie onyuŋ edide ŋkpɔkɔbi, ododoro akan mkpa: owo eke enemde Abasi esit eyebɔhɔ enye; enye (ŋwan) eyemum anam-idiɔk.

27Ɔkwɔrɔ-ikɔ ɔdɔhɔ ntem, ete, Sese, mma ŋkut ŋkpɔ emi, ndian kiet kiet man ŋkut ibat:

28eke ukpɔŋ mi osuk oyomde kaŋa edi ŋkwe: mma ŋkut erenowo kiet ke otu tɔsin; edi ŋkekwe baba ŋwan kiet ke otu mmɔ emi kpukpru.

29Sese, mma ŋkut ŋkpɔ emi ikpɔŋ-ikpɔŋ, nte ke Abasi ama anam owo edinen; ndien mmɔ ema eyom ediwak idiɔk usuŋ.