1EKEM mmɔ etiŋ enɔ Joab ete, Sese, edidem ke atua onyuŋ eseme abaŋa Absalom.
2Ndien erinyaŋa usen oro akabare edi ŋkpɔ ntua-eyet ye kpukpru owo: koro ke usen oro kpukpru ekop ete ke esit ayat edidem abaŋa eyen esie.
3Kpukpru owo enyuŋ eduk ke obio nte inɔ ke usen oro, kpa nte owo esaŋade inɔ-inɔ, ke ini but anamde mmɔ ke efeŋede ekpɔŋ itie ekɔŋ.
4Edi edidem ɔfuhɔ ŋkpɔ ke iso esie, edidem onyuŋ eseme ke ɔkpɔsɔŋ uyo, ete, O eyen mi Absalom! O Absalom, eyen mi, eyen mi!
5Ekem Joab etienede edidem ke ufɔk, onyuŋ ɔdɔhɔ ete, Mfin afo amanam but ɔyɔhɔ ke iso kpukpru ikɔt fo, emi enyaŋade uwem fo mfin, ye uwem nditɔ fo iren ye iban, ye uwem iban fo, ye uwem iban-esa fo;
6emi afo amade mme asua fo, onyuŋ asuade mme ufan fo: koro afo omowut mfin emi, ete ke afo ukereke mbɔŋ ye mme asaŋutom: koro mmɔfiɔk mfin emi, nte, edieke Absalom okpodude uwem, kpukpru nnyin ikpenyuŋ ikpaŋa mfin emi, ke ekpenem fi esit.
7Kam daha ke enyɔŋ kɔdɔhɔ eti ikɔ ye ikɔt fo: koro mmɔŋwɔŋɔ ma Jehovah, nte ke mmuwɔrɔke, baba owo kiet iditiehe ye afo ke okoneyo emi; ndien oro eyediɔk fi akan kpukpru mme idiɔk-ŋkpɔ eke ekananam enamde fi, toto ke ini uyen fo tutu osim emi.
8Ekem edidem adaha ke enyɔŋ eketie ke inua-otop Ndien mmɔ etɔt kpukpru owo, ete, Sese, edidem ke etie ke inua-otop. Ndien kpukpru owo edi ke iso edidem. Ofuri Israel enyuŋ efeŋe eka ke tent mmɔ.
9Ekem kpukpru owo etɔhɔ utɔk ke otu kpukpru mme esien Israel, ete, Edidem akanyaŋa nnyin osio ke ubɔk mme asua nnyin, enye okonyuŋ anam nnyin ibɔhɔ mme Philistine ke ubɔk: ndien ke emi enye emefehe ɔkpɔŋ edem emi abaŋa Absalom.
10Absalom emi nnyin ikeyetde aran inim ke etubom nnyin omonyuŋ akpa ke ekɔŋ. Ke didie ndien ke mbufo etre ndida edidem mfiak?
11Edidem David onyuŋ ɔdɔŋ ekedɔhɔ Zadok ye Abiathar mme oku, ete, Mbufo edɔhɔ mbiowo Judah, ete, Nsinam mbufo edide ekpere edem ke ndida edidem mfiak ke ufɔk esie? sia uyo ofuri Israel ama osim edidem, kpa ke ufɔk esie?
12Mbufo edi nditɔ-ete mi, mbufo edi ɔkpɔ mi ye obuk-idem mi: ke didie ndien ke mbufo edi ekperedem ke ndida edidem mfiak?
13Mbufo enyuŋ edɔhɔ Amasa, ete, Nte afo udige ɔkpɔ mi, ye obukidem mi? Yak Abasi anam ntre ye ami, onyuŋ anam ntre aka iso, edieke afo mududige etubom mbon-ekɔŋ ke iso mi kpukpru ini ke ibuot Joab.
14Ntem ke enye onuk esit kpukpru mbio Judah nte owo kiet; ndien mmɔ edɔŋ ekedɔhɔ edidem, ete, Fiak di ye kpukpru ikɔt fo. Ekem edidem afiak edisim ke Jordan.
15Judah enyuŋ eka ke Gilgal, ndika ŋkosobo ye edidem, man eda edidem ebe Jordan.
16Ndien Shimei eyen Gera, Benaamite kiet, emi otode ke Bahurim, awara ɔsuhɔre ye nditɔ Judah, aka okosobo ye edidem David.
17Tɔsin owo eke etode ke Benjamin enyuŋ esaŋa ye enye, ye Ziba owo ufɔk Saul, ye nditɔ-iren esie efut, ye ikɔt esie edip ŋko: mmɔ enyuŋ ebem edidem iso ebe Jordan.
18Ubom kiet onyuŋ ebe ndida ufɔk edidem mbe, nnyuŋ nnam se enye amade. Ndien Shimei eyen Gera ɔduɔ ke isɔŋ ke iso edidem ke ini enye eyomde ndibe Jordan;
19onyuŋ ɔdɔhɔ edidem, ete, Yak ɔbɔŋ mi okubat oburobut ido ɔnɔ mi, kunyuŋ uti se owo fo ɔkɔdiɔkde ndinam ke usen oro ɔbɔŋ mi akadahade ke Jerusalem, ke edidem ndida enye nsin ke esit esie.
20Koro owo fo ɔfiɔkde ete ke ami mma ndue: ndien, sese, ami ndi akpa owo ofuri ufɔk Joseph eke ɔsuhɔrede ndisobo ye ɔbɔŋ mi edidem.
21Ndien Abishai eyen Zeruiah ɔbɔrɔ ete, Nte Shimei idikpaha ibaŋa emi? koro okosuŋide enye emi Jehovah ekeyetde aran onim ke edidem?
22Ndien David ɔdɔhɔ ete, Ami nsaŋa nso ye mbufo, nditɔ Zeruiah! Koro mbufo edide mme asua mi mfin emi. Nte owo eyekpa mfin ke Israel? Koro nte mfiɔkke mfin emi nte ke edi ami ndi edidem ke Israel?
23Ndien edidem ɔdɔhɔ Shimei ete, Afo udukpaha: edidem onyuŋ ɔŋwɔŋɔ ɔnɔ enye.
24Ndien Mephibosheth eyen Saul ɔsuhɔre edi ndisobo ye edidem, ndien enye ikeyetke ukot esie, ikonyuŋ idiɔŋke ntaŋebek esie, ikonyuŋ iyetke edisine-ŋkpɔ esie, toto usen oro edidem akadahade, tutu osim usen emi enye afiakde ke ifure.
25Edikem adaŋemi Jerusalem edide ndisobo ye edidem edidem obup enye, ete, Nsinam afo mutieneke mi uka, Mephibosheth?
26Ndien enye ɔbɔrɔ ete, Ɔbɔŋ mi, O edidem, owo mi akabiaŋa mi: koro owo fo ɔkɔdɔhɔde ete, Yak ndiɔŋ ass mi ndoro enye ntiene edidem; koro owo fo edide mbuŋɔ.
27Enye okonyuŋ odori owo fo ikɔ ke iso ɔbɔŋ mi edidem; edi ɔbɔŋ mi edidem ebiet angel Abasi: nam ndien se ifɔnde fi ke enyin.
28Koro ofuri ufɔk ete mi mikedige baba ŋkpɔ kiet ke mibɔhɔke mbon mkpa ke iso ɔbɔŋ mi edidem: ndien afo ekesin owo fo ke otu mme andidia ŋkpɔ ke okpokoro fo. Ami nnyene nso ukeme ndien kaŋa nte ŋkpɔtɔŋɔde ntak nseme nnɔ edidem?
29Ndien edidem ɔdɔhɔ enye, ete, Nsinam afo ɔtɔŋɔde ntak ɔdɔhɔ ikɔ fo? Mma ndɔhɔ nte, Yak afo ye Ziba ebahare iŋwaŋ oro.
30Ndien Mephibosheth ɔdɔhɔ edidem, ete, Yak enye ada kpukpru, sia ɔbɔŋ mi edidem amakabare edi ke ebiet esie ke ifure.
31Ekem Barsillai eyen Gilead oto ke Rogelim ɔsuhɔre, ndien etiene edidem ebe Jordan, man ada enye akayak ke edem Jordan oko.
32Barzillai onyuŋ edi ata akani owo, osim isua anaŋ: enye okoyuŋ ɔbɔk edidem ke adaŋoro enye etiede ke Mahanaim; koro enye edide ata akamba owo.
33Ndien edidem ɔdɔhɔ Barzillai, ete, Saŋa ye ami be, ndien nyebɔk fi ke ɔtɔ mi ke Jerusalem.
34Edi Barzillai ɔbɔrɔ edidem, ete, Isua uwem mi edi ifaŋ, eke ŋkpetienede edidem ndɔk ke Jerusalem?
35Ami ndi owo isua anaŋ mfin emi: nte mmɔfiɔk se idide eti, ye se inyuŋ idide idiɔk? Nte owo fo okop inem ke se ndiade, ye ke se nnyuŋ ŋŋwɔŋde? Nte mmekeme ndikop ŋko uyo iren ye iban eke ekwɔde ikwɔ? Ke didie ndien ke owo fo okpobiomo ɔbɔŋ mi edidem?
36Yak owo fo etiene edidem ebe Jordan esisit: edi edidem anam didie oyom ndisio mi oruk usiene emi?
37Yak owo fo akam afiak, man ŋkpa ke obio mi, ŋkpere udi ete mi ye eka mi. Edi, sese, yak Chimham owo fo etiene ɔbɔŋ mi edidem ebe; nyuŋ nam ye enye se afo amade.
38Ndien edidem ete, Chimham eyetiene mi ebe, ndien ami nyenam enye se idinemde fi esit: nyenyuŋ nnam fi kpukpru se afo amade ndisiak nnɔ mi. Ekem kpukpru owo ebe Jordan, edidem onyuŋ ebe.
39Ekem edidem otim Barzillai inua, ndien enye ɔdiɔŋ edidem, onyuŋ afiak ke ebiet esie.
40Ntre ke edidem ebe aka ke Gilgal, Chimham onyuŋ etiene enye ebe; ndien kpukpru nditɔ Judah ye ubak nditɔ Israel ŋko eda edidem ebe.
41Ekem, sese, kpukpru nditɔ Israel edi ke ɔtɔ edidem, edidɔhɔ ye edidem, ete, Nsinam nditɔ ete nnyin, nditɔ Judah, eyipde fi, enyuŋ edade edidem ye ufɔk esie ebe Jordan, ye kpukpru ikɔt David ŋko?
42Ndien kpukpru nditɔ Judah ebɔrɔ nditɔ Israel, ete, Koro edidem edide oruk nnyin: nsinam ndien esit ayatde mbufo ntem abaŋa ikɔ emi? Nte nnyin ikedia ŋkpɔ edidem? Nte ekebɔ enye ŋkpɔ enɔ nnyin?
43Ndien nditɔ Israel ebɔrɔ nditɔ Judah, ete, Nnyin imenyene ubak idem edidem duop, nnyin ime-nyuŋ inyene David ikan mbufo: nsinam mbufo esede nnyin ndien ke ndek? Nte uyo nnyin ikedige mbemiso ŋko ke ndida edidem mfiak ndi? Edi uyo nditɔ Judah ɔsɔŋ akan uyo nditɔ Israel.
Who We AreWhat We EelieveWhat We Do
2025 by iamachristian.org,Inc All rights reserved.
