EZEKIEL 30 - Efik Old Bible With Sectional Headings

Abasi Eyenɔ Isɔŋ Egypt Ufen

1NDIEN uyo Jehovah osim mi, ete, Eyen owo, tiŋ prophecy, nyuŋ dɔhɔ ete,

2Ntem ke Ɔbɔŋ Jehovah ɔdɔhɔ ete, Mbufo eseme, ete, Mbɔm usen emi!

3Koro usen emekpere, usen Jehovah omonyuŋ ekpere, usen idiɔk enyɔŋ; enye eyedi ini mme idut.

4Ndien ofut osim Egypt, akwa ndik onyuŋ odu ke Ethiopia, ke ini mme akpaŋa afai eduɔŋɔde ke Egypt, ndien mmɔ eyeda ŋkpɔ emi enye okonimde, enyuŋ ebiat ɔtɔ emi ibibene esie edade.

5Ethiopia, ye Put, ye Lud, ye ofuri mbuaha owo, ye Cub, ye nditɔ obio ediomi ŋko eyeduɔŋɔ ke ofut.

6Ntem ke Jehovah ɔdɔhɔ, ete, Mmɔ eke emumde Egypt ekama eyeduɔŋɔ ŋko; iseri odudu esie eyenyuŋ ɔsuhɔre; ɔtɔŋɔde ke Migdol tutu osim ke Syene, ke mmɔ ediduɔŋɔ ke esit ke ofut, Uyo Jehovah edi emi.

7Ndien eyesobo mmɔ ke otu mme obio eke esobode, mme obio esie eyenyuŋ edu ke otu mme obio eke ebiarade.

8Ndien mmɔ eyefiɔk ete ke ami ndi Jehovah, ke ŋkimde ikaŋ ke Egypt, ndien kpukpru mmɔ eke eŋwamde enye eyebuŋɔ.

9Ke usen oro mme isuŋ-utom eyeto ke iso mi ediere ke ubom, eka ndinam nditɔ Ethiopia ndue-idem edikhe, ndien akwa ndik eyenam mmɔ, kpa nte eke usen Egypt: koro, sese, ke edi.

10Ntem ke Ɔbɔŋ Jehovah ɔdɔhɔ, ete, Nyenyuŋ nda ubɔk Nebuchadrezzar edidem Babylon nnam akwa otu owo Egypt ekure.

11Eyeda enye ye ikɔt esie ŋko, kpa mme idut emi enyenede ndik, edi ndisobo idut oro. Mmɔ eyesioŋo ofut mmɔ eda enam Egypt enyuŋ eda mmɔ emi eduɔŋɔde afai eyɔhɔ ke idut oro.

12Nyenyuŋ nnam mme akpa mmɔŋ esat ŋko, nnyuŋ nnyam idut oro nsin mme idiɔk owo ke ubɔk, nnyuŋ nda isɔŋ ye se iyɔhɔde ke esit nsin ke ubɔk isen owo esobo. Edi ami Jehovah ndɔhɔ.

13Ntem ke Ɔbɔŋ Jehovah ɔdɔhɔ ete, Nyenyuŋ nsobo ibɔk, nnyuŋ nnam mbukpo ibɔk mmɔ etre ke Noph; ndien Ɔbɔŋ isɔŋ Egypt ididuhe aba; nyenyuŋ nda ndik ndori isɔŋ Egypt.

14Nyenyuŋ nsobo Pathros, nnyuŋ ŋkim ikaŋ ke Zoan, nnyuŋ nnam ikpe ke No.

15Ndien nyeŋwaŋa ifuresit mi ke Sin, odudu Egypt; nnyuŋ nsibe akwa otu owo No mfep.

16Ndien nyekim ikaŋ ke Egypt: Sin eyenyuŋ okop ubiak eti-eti; No eyenyuŋ edi se mmɔ ediwaide mbai-mbai; Noph eyenyuŋ okut ukut kpukpru ini.

17Mkparawa Aven ye eke Pibeseth eyeduɔŋɔ ke ofut: ndien mme obio emi eyenyɔŋɔ ke ntaŋ-mfep.

18Usen eyekim ke Tehaphnehes ŋko, ke ini mbuŋde ɔkpɔnɔ Egypt do: ndien iseri odudu esie eyetre ke esit: ama edi enye, idiɔk enyɔŋ eyefuk enye, eyenyuŋ etaŋ nditɔ-iban esie enyɔŋɔ.

19Ndien nyenam ikpe ke Egypt: ndien mmɔ eyefiɔk ete ke ami ndi Jehovah.

20Edikem ke ɔyɔhɔ isua duopekiet, ke akpa ɔfiɔŋ, ke ɔyɔhɔ usen ɔfiɔŋ itiaba, uyo Jehovah osim mi, ete,

21Eyen owo, mmobuŋ Pharaoh edidem Egypt ubɔk; ndien, sese, ibɔpke enye, isinke ibɔk, inyuŋ idianke ɔfɔŋ, man ebɔp enye enyuŋ esɔŋ enye man omum ofut.

22Mmɔdo ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye Pharaoh edidem Egypt, ndien nyebuŋ enye ubɔk emi ɔsɔŋɔde onyuŋ ɔbuŋɔde; ndien nyenam ofut oto enye ubɔk ɔduɔ ke isɔŋ.

23Ndien nyesuan Egypt ke otu mme idut, nnyuŋ ŋwari mmɔ ke otu mme obio.

24Nyenyuŋ nsɔŋ edidem Babylon ubɔk, nnyuŋ nda ofut mi nsin enye ke ubɔk: ndien nyebuŋ Pharaoh ubɔk, ndien enye eyemum mmum owo eke akpade afai ke iso esie.

25Nyenyuŋ nsɔŋ edidem Babylon ubɔk, ndien ubɔk Pharaoh eyeduɔŋɔ; ndien mmɔ eyefiɔk ete ke ami ndi Jehovah, ke ini ndidade ofut mi nsin edidem Babylon ke ubɔk, nnyuŋ nnyanarede enye ndori ke isɔŋ Egypt.

26Nyesuan Egypt ke otu mme idut ŋko-ŋko; nnyuŋ ŋwari mmɔ ke otu mme obio; ndien mmɔ eyefiɔk ete ke ami ndi Jehovah.