EZEKIEL 3 - Efik Old Bible With Sectional Headings

Abasi Emek Ezekiel Ete Edi Owo-Ukpeme Ɔnɔ Ufɔk Israel

1NDIEN Enye ɔdɔhɔ mi, ete, Eyen owo, dia se afo okutde; dia ikpa-ŋwed emi, ndien ka ketiŋ nɔ ufɔk Israel.

2Ndien ntat inua mi, ndien enye anam mi ndia ikpa-nwed oro.

3Ndien enye ɔdɔhɔ mi, ete, Eyen owo, nam idibi fo adia ikpa-ŋwed emi ami nnɔde fi, nyuŋ sin enye ke nsia fo yɔhɔ. Ndien ami ndia, ndien ŋwed akabare eniŋe mi ke inua nte aran-ɔkwɔk.

4Ndien enye ɔdɔhɔ mi, ete, Eyen owo, ka ketiene ufɔk Israel, nyuŋ men ikɔ emi tiŋ nɔ mmɔ.

5Koro midɔŋke fi utom ke ɔtɔ idut eke inua ɔtuŋɔde, eke edeme mmɔ onyuŋ ododibe, edi ke ɔtɔ ufɔk Israel;

6idige ke ɔtɔ ediwak mme idut, eke esemde usem, eke edeme mmɔ onyuŋ odobide, emi afo mukopke uyo mmɔ. Ŋkɔm mma ŋkpɔdɔŋ fi utom ke ɔtɔ mmɔ, mmɔ ikpetreke ndikop uyo fo.

7Edi ufɔk Israel inyimeke ndikop uyo fo: koro mmɔ minyimeke ndikop uyo mi; koro ofuri ufɔk Israel esɔŋɔde ɔkpɔ-iso enyuŋ etunde esit.

8Sese, mmanam iso fo ɔsɔŋ ekem ye iso mmɔ, ye ɔkpɔ-iso fo ɔsɔŋ ekem ye ɔkpɔ-iso mmɔ.

9Mmanam ɔkpɔ-iso fo etie nte adamant ɔsɔŋ akan afransi: kubak mmɔ, kunyuŋ udikhe ubaŋa iso mmɔ: koro mmɔ edide ufɔk nsɔŋ-ibuot.

10Ndien enye ɔdɔhɔ mi, ete, Eyen owo, da kpukpru ikɔ mi emi nditiŋde nnɔ fi sin ke esit fo, nyuŋ kop mmɔ ke utɔŋ fo.

11Ndien ka ketiene mbon ntaŋ-mfep, kpa nditɔ oruk fo, nyuŋ neme ye mmɔ, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ke mmɔ ekopde, ye ke mmɔ etrede ndikop.

12Ndien spirit emenere mi ke enyɔŋ, ndien ŋkop uyom akwa mkpo ke edem mi, ete, Mbufo etoro ubɔŋ Jehovah emi otode ke ebiet esie.

13Nnyuŋ ŋkop uyom mba ŋkpɔ-uwem oro eyide kiet ye kiet, ye uyom mme wheel oro ekemde ye mmɔ, ye uyom akwa mkpo.

14Ntem ke spirit emenere mi, onyuŋ ada mi efep, ndien nsaŋa ke idot ye ke ufiop spirit mi; ubɔk Jehovah onyuŋ odoro mi ɔkpɔsɔŋ.

15Ekem ndisim mbon ntaŋ-mfep Tel-abib, emi eduŋde mben akpa Chebar, nnyuŋ ŋkut mmɔ etiede do; ndien ntie do usen itiaba, idem onyuŋ akpa mi ke otu mmɔ.

16Edikem ke utit usen itiaba oro, uyo Jehovah osim mi, ete, Eyen owo, mmonim fi ke owo-ukpeme nnɔ ufɔk Israel:

17kop ndien ikɔ emi otode mi ke inua, nyuŋ da uyo mi teme mmɔ.

18Ke adaŋemi ndɔhɔde idiɔk owo, nte, Afo udutreke ndikpa: ndien afo mutemeke enye, munyuŋ udɔhɔke, man ɔnɔ idiɔk owo item, ete enye ɔkpɔŋ idiɔk usuŋ esie, man onim enye uwem: enye idiɔk owo oro eyekpa ke mme idiɔk ido esie; ndien nyekpak iyip esie ke ubɔk fo.

19Ndien edieke afo etemede idiɔk owo oro, ndien enye mikabakede ikpɔŋ mme idiɔk ido esie, ye idiɔk usuŋ esie, enye eyekpa ke idiɔk ido esie; edi afo amanyaŋa ukpɔŋ fo.

20Ndien ke adaŋemi eti owo akabarede ɔkpɔŋ eti ido esie, onyuŋ anamde ukwaŋ-ŋkpɔ, ndien ami nda ŋkpɔ iduɔ nnim enye ke iso, enye eyekpa: koro afo munɔŋɔ enye item, enye eyekpa ke idiɔk ido esie, ndien iditihi edinen ido eke enye akanamde; ndien nyekpak iyip esie ke ubɔk fo.

21Edi koro afo ɔnɔde edinen owo item, ete edinen owo okunam idiɔk ido, ndien enye minamke idiɔk, enye eyedu uwem, koro afo ɔnɔde enye item; afo omonyuŋ anyaŋa ukpɔŋ fo.

22Ekem ubɔk Jehovah odoro mi ke idem do: enye onyuŋ ɔdɔhɔ mi, ete, Daha ke enyɔŋ wɔrɔ ka ke ebedeŋ, ndien nyedɔhɔ fi ikɔ do.

23Ndien ndaha ke enyɔŋ, nnyuŋ ŋwɔrɔ ŋka ke ebedeŋ oro: ndien, sese, ubɔŋ Jehovah ke ada do ebiet ubɔŋ oro ŋkokutde ke mben akpa Chebar: ndien nduɔ ke isɔŋ ŋkubi iso mi.

24Ndien spirit oduk mi ke idem, onyuŋ emenere mi owuk ke ukot mi, onyuŋ eneme ye ami, onyuŋ ɔdɔhɔ mi, ete, Duk ke ufɔk fo, baha idem fo ke esit.

25Ndien afo, eyen owo, sese, eyeda uruk edori fi, enyuŋ ebɔp fi ke esit, ndien afo uduwɔrɔke ke otu mmɔ;

26ndien nyenam edeme fo adiana fi ke nsiŋ, afo eyenyuŋ odop uyo, udunyuŋ udige owo eke edisuade ɔnɔ mmɔ: koro mmɔ edide ufɔk nsɔŋ-ibuot.

27Ndien ke adaŋemi ndɔhɔde ye afo, nyetat fi inua, ndien afo eyedɔhɔ ye mmɔ, ete, Ntem ke Ɔbɔŋ Jehovah ɔdɔhɔ, ete, Yak owo eke okopde okop; nyuŋ yak owo eke etrede etre; koro mmɔ edide ufɔk nsɔŋibuot.