JOSHUA 23 - Efik Old Bible With Sectional Headings

Joshua ɔnɔ Nditɔ Israel Akpatre Item

1EDIKEM ke ediwak usen ema ekebe nte Jehovah ɔkɔnɔ Israel nduɔk-odudu ebɔhɔ kpukpru mme asua mmɔ emi ekande mmɔ ekuk, Joshua ama okonyuŋ akabare edi akani-eren, onyuŋ ɔsɔŋ eti-eti.

2Ndien Joshua okot ofuri Israel ye mbiowo mmɔ, ye mme ikpɔ owo mmɔ, ye mme ekpe-ikpe mmɔ, ye mme andidaha mmɔ, edi, ndien ɔdɔhɔ mmɔ, ete, Ami mmakabare nyedi akani, mmonyuŋ nsɔŋ eti-eti:

3mbufo ema enyuŋ ekut kpukpru se Jehovah Abasi mbufo akanamde ye kpukpru mme idut emi ke iso mbufo: koro edi Jehovah Abasi mbufo akaŋwana ekɔŋ ɔnɔ mbufo.

4Sese, mmada afia ndeme mme idut emi esuhɔde nnɔ mbufo ke udeme mme esien mbufo, ɔtɔŋɔde ke Jordan, ye kpukpru mme idut emi ŋkasuande tutu osim Akwa Inyaŋ ke edem usop-utin.

5Ndien edi Jehovah Abasi mbufo eyebin mmɔ ke iso mbufo efep, eyenyuŋ osioŋo mmɔ ke iso mbufo efep; ndien mbufo eyeda isɔŋ mmɔ, kpa nte Jehovah Abasi mbufo ɔkɔdɔhɔde mbufo.

6Mbufo esɔŋ ubɔk eti-eti, ndien, etim enim kpukpru se ekewetde ke ŋwed ewuhɔ Moses, man mbufo ekuwaha ekpɔŋ enye eka nnasia, mme ufien;

7man mbufo ekuduk ke otu mme idut emi, kpa mme mmɔ emi esuhɔde ke otu mbufo, ekunyuŋ ekot enyiŋ mme abasi mmɔ, ekunyuŋ enam owo otomo (mmɔ), ekunyuŋ enam ŋkpɔ mmɔ,

8ekunyuŋ enuhɔ enɔ mmɔ: edi mbufo eyire ye Jehovah Abasi mbufo, kpa nte ŋkanamde tutu osim mfin emi;

9ndien Jehovah ama okosio ikpɔ ye mkpɔsɔŋ mme idut ke iso mbufo efep ndien ama edi mbufo, owo ndomo kiet ikadaha ke iso mbufo tutu osim mfin emi.

10Owo mbufo kiet eyebine tɔsin: koro edi Jehovah Abasi mbufo aŋwana ekɔŋ ɔnɔ mbufo, kpa nte enye ɔkɔdɔhɔde mbufo.

11Mbufo etim ekpeme idem mbufo, ndien, man mbufo ema Jehovah Abasi mbufo.

12Koro edieke mbufo efiakde, enyuŋ eyirede ye mme idut emi esuhɔde, kpa mmɔ emi esuhɔde ke otu mbufo, enyuŋ edɔ ndɔ ke otu mmɔ, enyuŋ eduk ke otu mmɔ, mmɔ eyenyuŋ eduk ke otu mbufo ŋko;

13mbufo etim efiɔk ete ke Jehovah Abasi mbufo idibinke aba mme idut emi ke iso mbufo ifep; edi mmɔ eyena ke afia ye ke mfine enɔ mbufo, ye nte ikpa ke ŋkaŋ mbufo, ye nte ŋkukim ke enyin mbufo, tutu esobo mbufo efep ke isɔŋ emi Jehovah Abasi mbufo ɔnɔde mbufo.

14Ndien sese, mfin emi ami mmɔŋ ŋka usuŋ ofuri ererimbot: ndien mbufo emefiɔk ke ofuri esit mbufo, ye ke ofuri ukpɔŋ mbufo, ete ke baba eti ikɔ kiet eke Jehovah Abasi mbufo ɔkɔdɔhɔde abaŋa mbufo, ikpuho: kpukpru ema esu enɔ mbufo, baba ikɔ kiet ikpuho ke esit.

15Ndien ama ekem, kpa nte kpukpru nti ikɔ eke Jehovah Abasi mbufo ɔkɔdɔhɔde abaŋa mbufo, esude enɔ mbufo; kpasuk ntre ŋko ke Jehovah edinam kpukpru mme idiɔk ikɔ esu enɔ mbufo, tutu enye osobo mbufo efep ke eti isɔŋ emi Jehovah Abasi mbufo ɔnɔde mbufo.

16Ke ini mbufo edibiatde ediomi Jehovah Abasi mbufo, emi enye okowukde mbufo, edinyuŋ ekade ekenam ŋkpɔ mme abasi efen, enyuŋ enuhɔ enɔ mmɔ; ndien Jehovah eyeyat esit ye mbufo, ndien eyewara esobo mbufo efep ke eti isɔŋ emi enye ɔkɔnɔde mbufo.