JUDE 1 - Efik Old Bible With Sectional Headings

Mme Andikpep Abiaŋa ye Ubiomikpe Emi Anade Ɔnɔ Mmɔ

1JUDAS emi edide owo Jesus Christ, ye eyen-eka James ewet ŋwed emi ɔnɔ esɔk mmɔ emi ekekotde, emi Abasi Ete amade, emi enyuŋ ekpemede mmɔ enɔ Jesus Christ.

2Mbɔm ye emem ye ima akpakam ɔdɔdiɔŋ etiene mbufo uwak-uwak.

3Ndima, ke ini nsinde ifik eti-eti ŋwet nnɔ mbufo mbaŋa erinyaŋa eke enyenede nnyin kpukpru, esit enyik mi ŋko ndiwet ŋkekpe ye mbufo nte, esɔŋɔ eŋwana kabaŋa ikɔ mbuɔtidem, emi ema ekeyak ini kiet ko esin nti ikɔt Abasi ke ubɔk.

4Koro ndusuk owo ema edɔŋ ikpat ndibe-ndibe eduk ke otu mbufo, kpa mmɔ emi ekenimde mmɔ enɔ ubiom-ikpe emi toto ke eset; owo eke miteŋeke Abasi, enyuŋ ewɔŋɔrede mfɔn Abasi nnyin esin ke obukpo uwem, enyuŋ ekaŋde Jesus Christ emi edide ukure Ete-ufɔk ye ɔbɔŋ nnyin.

5Edi mmonyom nditi mbufo se mbufo ema ekefiɔk ema, nte, ke adaŋemi Jehovah ama akanyaŋa ikɔt osio ke Egypt, ekem Enye osobo mmɔ emi minimke ke akpanikɔ.

6Mme angel ŋko, emi mikomumke itie-odudu eke mmɔ ikama, edi ekpɔŋde ebiet iduŋ idem mmɔ, ke Enye ama onyuŋ ɔkɔbi ke nsinsi ebuka onim ke ekim, ete, etie ebet ikpe Akwa Usen oro.

7Kpasuk ntre ŋko ke Enye ama osio Sodom ye Gomorrah ye ŋkpet-ŋkpet obio eken, emi ekonyuŋ etienede mmɔ esin idem ke use ye ido eke mikemke, onim nte uwut-ŋkpɔ, mmɔ enyuŋ ekut ufen nsinsi ikaŋ.

8Kpasuk ntre memmɔ oro ŋko esabare obukidem mmɔ ke ikpikpu ekikere mmɔ, enyuŋ esin mme andikara ke ndek, enyuŋ esuŋi mme akama ikpɔ itie.

9Edi Michael, akwa angel oro, ke eriŋwana emi enye aŋwanade ye Satan, ke adaŋemi enye enenide abaŋa okpo Moses, ikedehede isuŋi enye ke ikpe, edi ɔdɔhɔ ete, Ɔbɔŋ akpakam asua ɔnɔ fi.

10Edi memmɔ emi esuŋi se ededi eke mmɔ mifiɔkke; mme ŋkpɔ eke mmɔ enyuŋ efiɔkde ke nda-mana, nte ŋkpɔ uwem eke minyeneke ibuot, ewɔrɔ edi nsobo enɔ mmɔ.

11Idifɔnke fɔn inɔ mmɔ! koro mmɔ ekasaŋade ke afaŋ Cain, enyuŋ eduɔkde idem ke nduyo Balaam ke ntak udori, enyuŋ etak ke nsɔŋ-ibuot Korah.

12Mmɔ edi ndibe-ndibe itiat ke itie usɔrɔ-ima mbufo, ke ini mmɔ ediade udia ye mbufo; inamke mmɔ ndik ndibɔk idem mmɔ. Mmɔ edi idiɔk enyɔŋ eke misioŋoke edim, eke ofim onyuŋ ɔkpɔride ada ebe; mmɔ ebiet eto ndaeyo eke minyeneke mfri, eke ama akpa ama, owobere ɔduɔ;

13mmɔ ebiet aya inyaŋ ibom, esioŋo esuene mmɔ nte mmɔŋ osioŋode efot; mmɔ ebiet nyoŋ ntantafiɔŋ, eke enimde ata obubit ekim enɔ mmɔ ke nsinsi.

14Enoch, emi edide ɔyɔhɔ owo itiaba nte ekebot Adam, etiŋ ikɔ nte prophet abaŋa mmɔ, ete,

Sese, Ɔbɔŋ asaŋa ye ata ediwak ndisana ikɔt Esie edi,

15Ndikpe ikpe ye kpukpru owo,

ndinyuŋ mbiom kpukpru mmɔ emi mibakke Enye ikpe

Mbaŋa kpukpru mbukpo ido eke mmɔ enamde,

Ye kpukpru mkpɔsɔŋ ikɔ eke mmɔ emi mibakke Enye eketiŋde edian Enye.

16Mmɔ emi edi mbon nsuk-uyo; mmɔ esuk Abasi uyo ebaŋa itie emi Enye okonimde mmɔ; mmɔ esaŋa nte idiɔk itɔŋ mmɔ adade mmɔ aka, inua mmɔ onyuŋ etiŋ ikɔ iseri-iseri, mmɔ enyuŋ ekpek mme owo, eyom mfɔn enɔ idem.

17Edi ndima mi, mbufo eti ikɔ eke mme apostle Ɔbɔŋ nnyin Jesus Christ ekebemde iso etiŋ;

18nte mmɔ edɔhɔde mbufo ete, mbon nsahi eyedu ke ukperedem ini, emi edisaŋade ke idiɔk itɔŋ, midinyuŋ ibakke Abasi.

19Mmɔ emi edi owo eke esinde ubahare odu; mmɔ esaŋa ke obukidem, inyuŋ inyeneke Spirit.

20Edi ndima, mbufo ebɔp idem ke enyɔŋ edisana mbuɔtidem mbufo ekɔri, ebɔŋ akam ke Edisana Spirit; ntem ke edimum idem mbufo enim ke ima Abasi,

21enyuŋ etie ebet mbɔm Ɔbɔŋ nnyin Jesus Christ emi edisuŋɔde ke nsinsi uwem.

22Ndien etua ndusuk mmɔ emi edude ke iyikhe mbɔm; enyuŋ enyaŋa ndusuk mmɔ, edabare mmɔ esio ke ikaŋ;

23enyuŋ eda ndik etua ndusuk mmɔ mbɔm, esua kpa ɔfɔŋidem eke obukidem asabarede.

24Ama edi Enye emi ekemede ndikpeme mbufo, ete, ekuduɔ, ndinyuŋ nnam mbufo eda ke iso Ubɔŋ Esie ke akwa idaresit, enana ndo;

25kpa Enye emi edide Abasi kierakiet, Andinyaŋa nnyin, oto ke Jesus Christ Ɔbɔŋ nnyin; yak ubɔŋ, ye ubom, ye edikara, ye odudu enyene Enye, toto ke eritɔŋɔ, ye ke emi, ye ke nsinsi. Amen.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help