1 SAMUEL 4 - Efik Old Bible With Sectional Headings

Mbon Philistine Ebɔ Nditɔ Israel Ekebe Ediomi Abasi

1NDIEN uyo Samuel osim ofuri Israel.

Ekem Israel ewɔŋɔ eka ekɔŋ ye mme Philistine, enyuŋ enam nna ekɔŋ ke mben Eben-ezer: mme Philistine enyuŋ enam nna ke Aphek.

2Ekem mme Philistine etim udim-ekɔŋ ndiŋwana ye Israel: ndien ekɔŋ eyi; Israel enyuŋ esuana ke iso mme Philistine; ndien mmɔ ewot esim tɔsin owo inaŋ ke udim ke ɔtɔ oro.

3Ndien adaŋemi mmɔ edukde ke nna - ekɔŋ, mbiowo Israel edɔhɔ ete, Nsinam Jehovah asuande nnyin mfin emi ke iso mme Philistine? Eyak nnyin idɔŋ ekeda ekebe ediomi Jehovah ke Shiloh esɔk nnyin, man enye edi ke otu nnyin, onyuŋ anyaŋa nnyin osio mme asua nnyin ke ubɔk.

4Ndien mbon-ekɔŋ edɔŋ owo eka Shiloh ekemen ekebe ediomi Jehovah mme udim, emi etiede do ke ufɔt mme cherubim: nditɔ Eli mbiba, Hophni ye Phinehas, enyuŋ edu do ye ekebe ediomi Abasi.

5Edikem adaŋemi ekebe Jehovah osimde nna-ekɔŋ, ofuri Israel efiori akwa mkpo, ndien isɔŋ enyek.

6Ndien adaŋemi mme Philistine ekopde uyo mkpo oro, mmɔ edɔhɔ ete, Nso isin akwa mkpo emi ke nna-ekɔŋ mme Hebrew? Ndien mmɔ edifiɔk ete ke edi ekebe Jehovah oduk ke nna.

7Ndien mme Philistine edikhe: koro mmɔ edɔhɔde ete, Abasi omoduk ke nna-ekɔŋ. Mmɔ enyuŋ edɔhɔ ete, Ɔdiɔk ye nnyin! koro oruk ŋkpɔ emi akanam miduhe.

8Ɔdiɔk ye nnyin! anie edisio nnyin ke ubɔk mkpɔsɔŋ abasi emi? Mme mmɔ emi edi abasi oro akamiade nditɔ Egypt kpukpru ufen ke wilderness.

9Mbufo mme Philistine, esɔŋɔ idem, enyuŋ edi iren-owo, mbak edikabare edi ifin mme Hebrew, kpa nte mmɔ ekedide ifin mbufo: edi iren-owo, ndien, enyuŋ eŋwana ekɔŋ.

10Ndien mme Philistine eŋwana ekɔŋ; ndien Israel esuana; kpukpru owo enyuŋ efeŋe itɔk eka ke tent mmɔ: mmɔ enyuŋ ewot ata ediwak owo; ndien tɔsin nditɔ Israel edip ye duop eke esaŋade ke ikpat, eduɔŋɔ.

11Mmɔ enyuŋ eda ekebe Abasi: nditɔ Eli mbiba, Hophni ye Phinehas, enyuŋ ekpa.

12Ekem eyen Benjamin kiet oto ke udim-ekɔŋ ɔsɔp itɔk okosim ke Shiloh ke usen oro, ye ŋwaha ɔfɔŋ-idem, ntan onyuŋ odoro enye ke ibuot.

13Ndien adaŋemi enye edide, sese, Eli ke etie ke ebekpo esie ke mben ɔkpɔ-usuŋ, ekpeme: koro nsia oyomode enye abaŋa ekebe Abasi. Ndien adaŋemi owo oro odukde ke obio eketiŋ,ofuri obio osio mkpo.

14Ndien adaŋemi Eli okopde uyom mkpo oro, enye obup ete, Nso esin uyom mkpo emi? Ndien owo oro ɔsɔp oduk eketiŋ ɔnɔ Eli.

15Ndien Eli osim isua anaŋ ye efureta; enyin onyuŋ ekim enye, iyakke enye okut ŋkpɔ.

16Ndien owo oro ɔdɔhɔ Eli, ete, Edi ami ŋkoto ke udim-ekɔŋ, ami nto ke udim-ekɔŋ mfehe ndi mfin emi. Ndien enye (Eli) obup ete, Nso okotibe do,eyen mi?

17Ndien isuŋutom ɔbɔrɔ, ete, Israel emefehe ke iso mme Philistine, ema enyuŋ ewot ediwak owo ke otu ikɔt nnyin; nditɔ fo mbiba, Hophni ye Phinehas, ema enyuŋ ekpa ŋko; ema enyuŋ eda ekebe Abasi.

18Edikem adaŋemi enye ɔdɔhɔ ekebe Abasi, enye (Eli) ebehede ke ebekpo esie ɔduɔ edem-edem ke isɔŋ, ke mben inua-otop, atuak itɔŋ obuŋ, akpa: koro enye edide akani eren, onyuŋ odobide. Enye ama onyuŋ ekpe ikpe Israel ke isua aba.

19Ndien ŋwan eyen esie Phinehas oyomo idibi, oyom ndiman: ndien adaŋemi enye okopde etop, ete ke ema eda ekebe Abasi, ye nte ete ebe esie, ye ebe esie ema enyuŋ ekpa, enye ɔnuhɔ, onyuŋ aman eyen: koro uman otukde enye.

20Ekem ke idaha mkpa esie, iban emi edade ekpere enye, edɔhɔ enye ete, Kufehe: koro afo amaman eyen-eren.

21Edi enye ibɔrɔke bɔrɔ, inyuŋ ikereke kere. Ndien enye osio eyenɔwɔŋ oro enyiŋ Ichabod (ubɔŋ iduhe aba), ete, Ubɔŋ amadaha ke Israel: koro ema ekeda ekebe Abasi: kabaŋa ete ebe esie ye ebe esie ŋko.

22Ndien enye ɔdɔhɔ ete, Ubɔŋ amadaha ke Israel: koro ema ekeda ekebe Abasi.