MATTHEW 25 - Efik Old Bible With Sectional Headings

Mbuk Nditɔ-iban duop

1 ADAŊORO eyeda Obio Ubɔŋ Heaven edomo ye nditɔ-iban duop, eke emende utuenikaŋ mmɔ ewɔŋɔ eka ekosobo ye ɔdɔ-ndɔ.

2Ndien owo ition ke otu mmɔ edi ndisime, ition enyuŋ edi asian.

3Koro mme ndisime emen utuenikaŋ mmɔ, edi idaha aran idian ye mmɔ;

4edi mme asian eda aran ke ekpeme ye mme utuenikaŋ mmɔ.

5Edi ke adaŋemi ɔdɔ-ndɔ ebigide edidi, kpukpru mmɔ eyet idap ede.

6Edi ke ufɔt okoneyo efiori ete, Sese, ɔdɔ-ndɔ! mbufo ewɔŋɔ eka ekosobo ye enye.

7Ekem kpukpru nditɔ-iban oro edaha ke enyɔŋ, ediɔŋ utuenikaŋ mmɔ.

8Edi mme ndisime edɔhɔ mme asian ete, Enɔ nnyin aran mbufo esisit; koro mme utuenikaŋ nnyin emɔŋ enime.

9Edi mme asian ebɔrɔ ete, Ndusuk aran idikemke nnyin ye mbufo: ekam eka ke ɔtɔ mme anyam-aran ekedep ke idem mbufo.

10Edi ke ini mmɔ ekade ekedep, ɔdɔ-ndɔ edi; ndien mmɔ emi ebeŋede idem etiene enye eduk ke udia ndɔ: ndien eberi usuŋ.

11Edikem nditɔ-iban eken edi edidɔhɔ ete, Ɔbɔŋ, Ɔbɔŋ, sio usuŋ nɔ nnyin.

12Edi enye ɔbɔrɔ ete, Ke akpanikɔ ke ndɔhɔ mbufo, Ndiɔŋɔke mbufo.

13Ekpeme ndien koro mbufo mifiɔkke usen mme hour.

14 Koro obio ubɔŋ heaven etie nte emi owo oyomde ndika idut efen, ndien enye okot ikɔt esie, ayak inyene esie ɔnɔ mmɔ.

15Ndien enye ɔnɔ owo kiet talent ition, ɔnɔ owo efen iba, ɔnɔ owo efen kiet; ɔnɔ owo kiet kiet nte ukeme esie edide; ndien enye aka idut efen.

16Idaha oro owo emi ɔkɔbɔde talent ition adaha akada mmɔ anyam urua, aŋwana talent ition efen odori.

17Kpasuk ntre ŋko owo emi ɔkɔbɔde iba aŋwana iba efen odori.

18Edi owo emi ɔkɔbɔde kiet aka okotibi isɔŋ, odip okuk ete esie.

19Ekem ke anyan ini ama ekebe, ete ikɔt oro edi edibat ibat ye mmɔ.

20Ndien owo emi ɔkɔbɔde talent ition: ada talent ition efen, edi edidɔhɔ ete, Obɔŋ, afo ɔkɔnɔ mi talent ition: sese, mmodori talent ition efen ke esit.

21Ɔbɔŋ esie ete, Omotim anam, afo eti asaŋutom ye owo akpanikɔ: akanam akpanikɔ ke se miwakke; nyenim fi ekpeme ediwak ŋkpɔ; duk ke idara ɔbɔŋ fo.

22Owo emi okonyuŋ ɔbɔde talent iba edi edidɔhɔ ete, Ɔbɔŋ, afo ɔkɔnɔ mi talent iba: sese, mmodori talent iba efen ke esit.

23Ɔbɔŋ esie ete, Omotim anam, afo eti asaŋutom ye owo akpanikɔ: afo akanam akpanikɔ ke se miwakke; nyenim fi ekpeme ediwak ŋkpɔ; duk ke idara ɔbɔŋ fo.

24Ndien owo emi ɔkɔbɔde talent kiet edi edidɔhɔ ete, Ɔbɔŋ, mmɔfiɔk fi, nte afo edi owo nsɔŋido, ɔdɔdɔk ke ɔtɔ nte mukɔtɔhɔ, onyuŋ atataŋ ke ɔtɔ nte mukasuanke;

25ndien ndik anam mi, nnyuŋ ndaha ŋkodip talent fo ke isɔŋ: se, enyene se inyenede fi do.

26Edi ɔbɔŋ esie ɔbɔrɔ ete, Afo idiɔk asaŋutom ifu, afo ɔkɔfiɔk ete ndɔdɔk ke ɔtɔ nte mmeŋkɔtɔhɔ, nnyuŋ ntataŋ ke ɔtɔ nte mmeŋkasuanke;

27afo akpakam emen okuk mi naŋa esin ke ubɔk mme akama-okuk, ndien ke ndide, ŋkpɔtɔŋɔ ntak mbɔ se inyenede mi ye udori.

28Mbufo ebɔ enye talent oro ndien, emen enɔ owo emi enyenede talent duop.

29Koro eyenɔ kpukpru owo eke enyenede, ndien enye eyenyene awak akan: edi ama edi owo eke minyeneke, eyebɔ enye kpa se enye enyenede.

30Mbufo enyuŋ eduɔk asaŋutom emi midorike mi udori ke ekim ke esien: do ke eritua eyet ye erita edet eyedu.

31 Ke ini Eyen Owo edidide ke ubɔŋ Esie, asaŋa ye kpukpru mme angel, adaŋaro ke Enye eyetie ke ebekpo ubɔŋ Esie.

32Ndien eyebon kpukpru mme idut ke iso Esie: Enye eyenyuŋ abahare mmɔ kiet ye eken, nte emi ekpemerɔŋ abaharede erɔŋ ye ebot;

33ndien eyenim erɔŋ ke ubɔk nnasia Esie, ye ebot ke ufien.

34Ekem Edidem eyedɔhɔ mmɔ emi edude ke ubɔk nnasia, ete, Edi, mbufo emi Ete Mi ɔdiɔŋde, edida ubɔŋ emi ekonimde enɔ mbufo toto ke eritɔŋɔ ererimbot.

35Koro Ami ŋkokopde biɔŋ, ndien mbufo enɔ Mi udia; itɔŋ akasat Mi, ndien mbufo enɔ Mi mmɔŋ; ŋkedi esen, ndien mbufo eda Mi eka ufɔk;

36ŋkedi iferi, ndien mbufo esine Mi ɔfɔŋ; ŋkɔdɔdɔŋɔ, ndien mbufo edi edise Mi; ŋkodu ke ufɔk-ŋkpɔkɔbi, ndien mbufo edi ke ɔtɔ Mi.

37Ekem ndinen owo eyebup Enye ete, Ɔbɔŋ, ini ewe ke ikokut Fi etiede biɔŋ, ndien inɔ Fi udia; me nte itɔŋ asatde Fi, ndien inɔ Fi mmɔŋ?

38Ini ewe ke ikonyuŋ ikut Fi edide esen, ndien ida Fi ika ufɔk? mme iferi, ndien isine Fi ɔfɔŋ?

39Ini ewe ke ikonyuŋ ikut Fi ɔdɔŋɔde, mme ke ufɔk-ŋkpɔkɔbi, ndien idi idise Fi?

40Ndien Edidem eyebɔrɔ mmɔ ete, Ke akpanikɔ ke ndɔhɔ mbufo, Adaŋa nte mbufo ekanamde ŋkpɔ emi enɔ kiet ke otu nditɔ-ete Mi, kpa ata ŋkpri emi, mbufo ekanam enɔ Mi.

41Ekem Enye eyedɔhɔ mmɔ emi edude ke ubɔk ufien, ete, Edianare Mi, mbufo emi edide mbon nsobo, ekoduk ke nsinsi ikaŋ, emi ekonimde enɔ Satan ye mme angel esie.

42Koro Ami ŋkokopde biɔŋ, ndien mbufo inɔŋɔ Mi udia;

43itɔŋ akasat Mi, ndien mbufo inɔŋɔ Mi mmɔŋ: ŋkedi esen, ndien mbufo idaha Mi ika ufɔk; ŋkedi iferi, ndien mbufo isineke Mi ɔfɔŋ; ŋkɔdɔdɔŋɔ, nnyuŋ ntie ke ufɔk-ŋkpɔkɔbi, ndien mbufo idige idise Mi.

44Ekem mmɔ ŋko eyebup Enye ete, Ɔbɔŋ, ini ewe ke nnyin ikokut Fi etiede biɔŋ, me nte itɔŋ asatde Fi, me nte edide esen, me iferi, me nte ɔdɔŋɔde, me nte etiede ke ufɔk-ŋkpɔkɔbi, ndien nnyin itre ndinam ŋkpɔ nnɔ Fi?

45Edi Enye eyebɔrɔ mmɔ ete, Ke akpanikɔ ke ndɔhɔ mbufo, Adaŋa nte mbufo mikanamke ŋkpɔ emi inɔ kiet ke otu ata ŋkpri emi, mbufo inamke inɔ Mi.

46Ekem mmɔ oro eyedaha ekoduk ke nsinsi ufen; edi ndinen owo eyeduk ke nsinsi uwem.