1 CHRONICLES 5 - Efik Old Bible With Sectional Headings

Mme Nditɔ Reuben

1NDIEN nditɔ Reuben akpan Israel, (koro enye edide akpan; edi koro enye asabarede mbri ete esie, eda itie-akpan esie enɔ nditɔ Joseph eyen Israel; ndien ŋwed ubon isaŋake ye itie-akpan;

2koro Judah akande nditɔ-ete esie, ndien akpan ɔbɔŋ oto enye ke idem; edi itie-akpan enyene Joseph:)

3nditɔ Reuben akpan Israel edi Hanoch, ye Pallu, ye Hezron, ye Carmi.

4Nditɔ Joel; Shemaiah eyen esie, Gog eyen esie, Shimei eyen esie.

5Micah eyen esie Reaiah eyen esie, Baal eyen esie, Beerah eyen esie,

6emi Tilgath-pilneser edidem Assyria akadade ɔnyɔŋ: enye ekedi ɔbɔŋ nditɔ Reubenite.

7Nditɔ-ete esie ŋko ke ubon mmɔ, nte ekewetde emana mmɔ, edi Jeiel etubom mmɔ, ye Zechariah, ye Bela eyen Azaz,

8eyen Shema, eyen Joel, emi okoduŋde ke Aroer, tutu osim ke Nebo, ye Baal-meon:

9ndien enye oduŋ ke edem usiaha-utin, ɔtɔŋɔde ke akpa Euphrates tutu osim ebiet emi edukde wilderness; koro ufene mmɔ ewakde ke isɔŋ Gilead.

10Ekem ke eyo Saul, mmɔ eŋwana ekɔŋ ye mme Hagrite, enyuŋ ekan mmɔ ubɔk; ndien eduŋ ke tent mmɔ ke iso ofuri edem usiaha-utin Gilead.

11Ndien nditɔ Gad eduŋ mmɔ ke edem oko, ke isɔŋ Bashan tutu osim ke Salecah:

12Joel etubom mmɔ, ye Shapham ke udiana, ye Janai, ye Shaphat ke Bashan:

13ye nditɔ ete mmɔ ke ufɔk mme ete mmɔ, Michael, ye Meshullam, ye Sheba, ye Jorai, ye Jacan, ye Zia, ye Eber, itiaba.

14Mme mmɔ emi edi nditɔ Abihail, eyen Huri, eyen Jaroah, eyen Gilead, eyen Michael, eyen Jeshishai, eyen Jahdo, eyen Buz:

15Ahi, eyen Abdiel, eyen Guni, etubom ufɔk mme ete mmɔ.

16Ndien mmɔ eduŋ ke Gilead, ke Bashan, ye ke obio mmɔ, ye ke kpukpru mben-isɔŋ Sharon, tutu osim adaŋa mmɔ.

17Ekebat kpukpru mmɔ esin ke ŋwed emana ke eyo Jotham, edidem Judah, ye ke eyo Jeroboam edidem Israel.

18Nditɔ Reuben, ye mme Gadite, ye ibio esien Manasseh, emi edide mbon-uko, owo emi ekamade otu ekɔŋ ye ofut, enyuŋ etopde utiga, enyuŋ efiɔkde ekɔŋ, eti-eti edi tɔsin, tɔsin, ke itie aba ye inaŋ, ye ikie itiaba ye ata emi ewɔrɔde udim ekɔŋ.

19Ndien mmɔ eŋwana ekɔŋ ye mme Hagrite, ye Jetur, ye Nephish, ye Nodab.

20Ndien enyaŋa mmɔ ke eriŋwana ye mmɔ eken, enyuŋ eda mme Hagrite, ye kpukpru mmɔ eke edude ye mmɔ, esin mmɔ ke ubɔk: koro mmɔ esemede enɔ Abasi ke ekɔŋ, ndien enye okop uyo mmɔ: koro mmɔ ebuɔtde idem mmɔ ye enye.

21Ndien mmɔ etaŋ ufene mmɔ enyɔŋɔ: tɔsin camel mmɔ aba ye duop, ye tɔsin ŋkpri ufene mmɔ ikie iba, ye tɔsin aba ye duop, ye tɔsin ass iba, ye tɔsin owo ikie.

22Koro ediwak owo ekedade unan eduɔŋɔ: koro ekɔŋ oro otode Abasi. Ndien mmɔ eduŋ ke itie mmɔ tutu osim ini ntaŋ-mfep.

23Nditɔ ibio esien Manasseh enyuŋ eduŋ ke edem oro, ɔtɔŋɔde ke Bashan tutu osim ke Baal-hermon, ye Senir ye obot Hermon: mmɔ ekewak.

24Mme mmɔ emi ŋko edi mme etubom ufɔk mme ete mmɔ, kpa Epher, ye Ishi, ye Eliel ye Azriel, ye Jeremiah, ye Hodaviah, ye Jahdiel, mbon uko, mbon etop, mme etubom ufɔk mme ete mmɔ.

25Ndien mmɔ enam idiɔk ye Abasi mme ete mmɔ, enyuŋ enam use ebine mme abasi mbio idut oro Abasi okosobode ke iso mmɔ efep.

26Ekem Abasi Israel edemere esit Pul edidem Assyria, ye spirit Tilgath-pilneser edidem Assyria, ndien enye ataŋ mmɔ efep, kpa mme Reubenite, ye mme Gadite, ye ibio esien Manasseh, onyuŋ ada mmɔ aka ke Halah, ye ke Habor, ye ke Hara, ye ke mben akpa Gozan, tutu osim mfin emi.