2 CHRONICLES 7 - Efik Old Bible With Sectional Headings

Edidem Solomon Ayak Temple Ɔnɔ Abasi

1EKEM ke ini Solomon ɔbɔŋde akam ama, ikaŋ oto ke enyɔŋ ɔsuhɔre, edita mme edifɔp uwa, ye mme uwa emem; ubɔŋ Jehovah onyuŋ ɔyɔhɔ ke ufɔk.

2Ndien mme oku ikwe nte edukde ke ufɔk Jehovah, koro ubɔŋ Jehovah ɔyɔhɔde ke ufɔk Jehovah.

3Ndien ke adaŋemi kpukpru nditɔ Israel ekutde nte ikaŋ ɔsuhɔrede, nte ubɔŋ Jehovah onyuŋ odorode ke ufɔk, mmɔ etuk iso ke isɔŋ ke pavement, enyuŋ ebɔŋ akam, enyuŋ ekɔm Jehovah, koro enye ɔfɔnde, koro mbɔm esie ebigide ke nsinsi.

4Ndien edidem ye kpukpru owo ewa uwa ke iso Jehovah.

5Edidem Solomon onyuŋ awa uwa tɔsin enaŋ ke itie edip ye iba, ye tɔsin ŋkpri ufene ke itie ikie ye edip. Ntre ke edidem ye kpukpru owo ediɔŋ ufɔk Abasi enim.

6Ndien mme oku eda ke mme itie unam-ŋkpɔ mmɔ: mme Levite enyuŋ ekama ŋkpɔ ikwɔ Jehovah oro David edidem akanamde ndikɔm Jehovah, koro ima esie ebigide ke nsinsi, ke ini David adade ubɔk mmɔ otoro; mme oku enyuŋ esak iso ese mmɔ, efuri ukorowo, ofuri Israel enyuŋ eda.

7Solomon onyuŋ anam ufɔt okure emi odude ke iso ufɔk Jehovah, asana: koro do ke enye awa edifɔp uwa, ye ikpɔŋ uwa emem, koro itie-uwa okpoho oro Solomon akanamde mikekemeke ndiduk edifɔp uwa, ye inuak-udia, ye ikpɔŋ unam.

8Ntre ke Solomon anam usɔrɔ ke ini oro ke ofuri usen itiaba, ye ofuri Israel ŋko, ata akwa esop eti-eti, ɔtɔŋɔde ke ebiet uduk Hamath, tutu osim ke akpa Egypt.

9Ndien ke ɔyɔhɔ usen itiaita mmɔ enam usɔrɔ: koro mmɔ ediɔŋde itie-uwa ke ofuri usen itiaba enim, enyuŋ enam usɔrɔ ke usen itiaba.

10Ekem ke ɔyɔhɔ usen edip ye ita, ke ɔyɔhɔ ɔfiɔŋ itiaba, enye ayak kpukpru owo enyɔŋ ke tent mmɔ, ke edara enyuŋ enem esit ke mfɔn emi Jehovah ɔkɔfɔnde ɔnɔ David, ye Solomon, ye Israel ikɔt esie.

11Ekem, Solomon ama ufɔk Jehovah, ye ufɔk edidem: ndien kpukpru se idukde Solomon esit ndinam ke ufɔk Jehovah, ye ke ufɔk esiemɔ, enye otim anam ɔfɔn.

12Ekem Jehovah owut Solomon idem ke okoneyo, onyuŋ ɔdɔhɔ enye, ete, Mma ŋkop akam fo, mma nnyuŋ mmek ebiet emi ke idemmi nnim ke ufɔk uwa.

13Edieke nsiride enyɔŋ, man edim okudep, edieke nditemede ŋkukuŋkpɔyɔriyɔ, nte eta isɔŋ, edieke ndinyuŋ ndɔŋde idiɔk udɔŋɔ ke otu ikɔt mi;

14ndien edieke ikɔt mi emi esiode mmɔ enyiŋ mi, editukde idem mmɔ, enyuŋ ekpe mi ubɔk, enyuŋ eyom mi iso, enyuŋ ekabare ekpɔŋ mme idiɔk ido mmɔ; ndien ami nyetie ke enyɔŋ ŋkop, nnyuŋ ndahado ke mme idiɔk ido mmɔ, nnyuŋ nnam ufen okure ke isɔŋ mmɔ.

15Ke emi mmetat enyin mi, mmonyuŋ ŋkpaŋ utɔŋ mi nnɔ mkpe-ubɔk ebiet emi.

16Ke emi mmonyuŋ mmek ufɔk emi, nnyuŋ nnam enye asana, man enyiŋ mi okpodu do ke nsinsi; enyin mi ye esit mi eyenyuŋ edu do kpukpru usen.

17Ndien afo ama asaŋa ke iso mi, nte David usɔ akasaŋade, ama onyuŋ anam kpukpru se ntemede fi, ama onyuŋ onim mme ewuhɔ mi ye ido mi;

18ndien nyenam ebekpo ubɔŋ fo ɔsɔŋ ada, nte emi ŋkodiomide ye David usɔ, nte, Idisibeke owo fo ifep ke erida ubɔŋ Israel.

19Edieke mbufo ema ewɔŋɔre, enyuŋ ekpɔŋ mme ewuhɔ mi ye ibet mi, emi nnimde ke iso mbufo, ema enyuŋ eka ekenam ŋkpɔ mme abasi efen, enyuŋ etuak ibuot enɔ mmɔ:

20ndien nyedibere mmɔ mfep ke isɔŋ emi ŋkɔnɔde mmɔ; nyenyuŋ mmen ufɔk emi nnamde nnɔ enyiŋ mi, ke iso mi mfep nduɔk, nnyuŋ nnam enye akabare edi ikwɔ ye ufiet ke otu kpukpru mme idut.

21Ndien ufɔk emi okoŋde, eyedi se kpukpru owo eke esaŋade ebe enye eyikde; ndien mmɔ eyedɔhɔ ete, Nsinam Jehovah akanamde isɔŋ emi, ye ufɔk emi ntem?

22Ndien eyebɔrɔ, ete, Edi koro mmɔ ekekpɔŋde Jehovah Abasi mme ete mmɔ emi okosiode mmɔ ke isɔŋ Egypt, ekenyuŋ efatde abasi eŋwen, enyuŋ etuakde ibuot enɔ mmɔ, enyuŋ enam ŋkpɔ mmɔ: oro esin enye akadade kpukpru ufen emi odori mmɔ.