1 PETER 3 - Efik Old Bible With Sectional Headings

Ata Uyai Emi Ŋwan Ndɔ Ekpenyenede ye Enyene-Ibuot Ebe ke Ufɔk Ndɔ

1KPASUK ntre mbufo iban, esuk idem enɔ ebe eke mbufo, man edieke ndusuk mmɔ minimke ikɔ Abasi ke akpanikɔ, ekpedudi mmɔ eda, itoho ke ukwɔrɔ-ikɔ, edi oto ke edu iban mmɔ;

2ke adaŋemi mmɔ ekutde nte mbufo iban enyenede edisana ido ye ndik.

3Ekubana idem enyɔŋ-enyɔŋ ke eridɔk idet, ye erikɔŋɔ ŋkpɔ mbana gold, ye erisine ediye ɔfɔŋidem;

4edi eda edisine-ŋkpɔ eke midibiarake, kpa suŋ-suŋ spirit eke enyenede iso but, ebana idem ke esit-esit uwem mbufo; koro oro edi se isɔŋde urua ke enyin Abasi.

5Koro ntem ke nti iban, emi ekedoride enyin ye Abasi, ekam esibana idem ke eyo oko;

6mmɔ enyuŋ esuk idem enɔ ebe mmɔ; kpa nte Sarah okosukde idem ɔnɔ Abraham, onyuŋ okotde enye ete, Ɔbɔŋ mi. Mbufo emakabare edi nditɔ esie iban, edieke mbufo enamde se ifɔnde, minyuŋ iyakke baba ŋkpɔ kiet esin mbufo edikhe.

7Kpasuk ntre, mbufo mme ebe edu uwem ye iban mbufo nte mme enyene-ibuot owo; enɔ iban ukpono, nte mmɔ emi ememde ekan mbufo, sia mmɔ enyuŋ etienede mbufo, ebuana ke ufɔn uwem; mbak ŋkpɔ edibiɔŋɔ akam mbufo.

8Ke akpatre itie, mbufo kpukpru enyene esit kiet, ekop mbɔm ye kiet eken, etie ima-ima nte nditɔ-ete, enyene mfefere esit, enyuŋ esuhɔre idem.

9Ekuda idiɔk esio usiene idiɔk; ekunyuŋ esuŋi owo ke ini esuŋide mbufo; edi ekam ediɔŋ mmɔ. Koro ekekot mbufo ete edinam emi, man mbufo eda eridiɔŋ enyene.

10Koro,

Owo emi edimade uwem,

Edinyuŋ oyomde ndikut edifɔn ini,

Yak enye afara edeme esie ke idiɔk,

onyuŋ ekpeme mkpɔk-inua esie okubiaŋa abiaŋa.

11Yak enye ɔwɔŋɔre ɔkpɔŋ idiɔk, onyuŋ anam eti;

Yak enye oyom emem, onyuŋ ebine enye.

12Koro enyin Jehovah ke esese ndinen owo,

Utɔŋ Esie onyuŋ ɔbiɔŋɔ eseme mmɔ;

Edi Jehovah asasak iso ese mmɔ emi enamde idiɔk.

13Ndien anie edinam mbufo ibak, edieke mbufo enyenede ɔkpɔsɔŋ udɔŋ ndinam eti ido?

14Edi edieke mbufo ekutde ndutuhɔ ŋko ke ntak edinen ido, osuk ɔfɔfɔn ɔnɔ mbufo. Ekufehe se mmɔ etiŋde ndidikhe mbufo, ekunyuŋ eyak esit otimere mbufo;

15edi eteŋe Christ ke esit mbufo nte Ɔbɔŋ. Kpukpru ini ebeŋe idem ndibɔrɔ kpukpru owo eke edibupde mbufo ntak idori-enyin emi mbufo enyenede; edi ekpeme ndibɔrɔ ke suŋ-suŋ ido ye ke ido uteŋe;

16etiŋ enyin enyene esit eke asanade, man ke nde eke etiŋde ŋkpɔ edian mbufo, mmɔ eke esuede eti uwem mbufo ke Christ ekpadia but.

17Koro ɔfɔn mbufo ndikut ndutuhɔ mbaŋa erinam eti ido ke Abasi onyimede, akan ndikut mbaŋa erinam se idiɔkde.

18Koro Christ ŋko-ŋko ama akpa kabaŋa mme idiɔk-ŋkpɔ ini kiet, Edinen owo ke ibuot mmɔ emi minenke, man Enye ada nnyin ɔsɔk Abasi: ewot Enye ke obukidem, edi enam Enye edidu uwem ke Spirit.

19Ke Spirit ke Enye okonyuŋ aka ɔkɔkwɔrɔ ikɔ ɔnɔ mme spirit ke itie-ŋkpɔkɔbi,

20kpa mmɔ emi eketutde utɔŋ ke eyo oko, ke adaŋemi anyan ime Abasi etiede ebet ke eyo Noah, tutu ema ebɔp ark, eke owo emi miwakke, oro edi owo itiaita, esaŋade ke esit ebe ke mmɔŋ ekut erinyaŋa;

21mmɔŋ eke ebietde mmɔŋ oro ke eda enyaŋa mbufo ke emi, oro edi baptism, emi midige eriyet ɔkɔp ikpɔhidem mfep, edi edide eribeŋe eke nnyin ibeŋede Abasi anam nnyin inyene edisana esit ke iso Esie, oto ke eriset Jesus Christ;

22emi ama ɔnyɔŋ ke heaven eketie ke ubɔk nnasia Abasi, ke ema ekosuk mme angel ye mme andikara ye mme odudu esin ke idak Esie.