JUDGES 13 - Efik Old Bible With Sectional Headings

Ini Samson Amanade

1EKEM nditɔ Israel etɔŋɔ ntak enam idiɔk ke iso Jehovah; ndien Jehovah ada mmɔ ɔnɔ mme Philistine ke ubɔk ke ofuri isua aba.

2Ndien eyen Zorah kiet odu ekere Manoah, oto ke ubon Dan; ndien ŋwan esie edi ada, inyuŋ imanke eyen.

3Ekem angel Jehovah owut ŋwan oro idem, onyuŋ ɔdɔhɔ enye, ete, Sese, afo edi ada, uka-unyuŋ umanke eyen: edi afo eyeyomo, onyuŋ aman eyen eren.

4Mbɔk, tim kpeme idem fo, ndien, kunyuŋ uŋwɔŋ wine ye mmin; kunyuŋ udia edidehe ŋkpɔ baba kiet:

5koro, sese, afo eyeyomo, onyuŋ aman eyen-eren; baba akaraŋ kiet okunyuŋ otuk enye ibuot: koro eyen oro eyedi Nazarite Abasi toto ke emana esie: ndien enye eyetɔŋɔ ndinyaŋa Israel nsio mme Philistine ke ubɔk.

6Ndien ŋwan oro aka eketiŋ ɔnɔ ebe esie, ete, Owo Abasi kiet okosim mi, ndien iso esie ebiet iso angel Abasi, enyene ndik eti-eti: edi ŋkobupke enye ebiet emi enye okotode, enye inyuŋ isiakke enyiŋ esie inɔ mi:

7enye onyuŋ ɔdɔhɔ mi, ete, Sese, afo eyeyomo, onyuŋ aman eyen-eren; kuŋwɔŋ wine, ndien, ye mmin, kunyuŋ udia edidehe ŋkpɔ baba kiet: koro eyen oro eyedi Nazarite Abasi toto ke emana esie, tutu osim usen mkpa esie.

8Ndien Manoah ekpe Jehovah ubɔk, onyuŋ ɔdɔhɔ ete, O Ɔbɔŋ mi, mbɔk, yak owo Abasi oro afo ɔkɔdɔŋde utom, ɔtɔŋɔ ntak edi ke ɔtɔ nnyin, editeme nnyin se nnyin idinamde ye eyen emi edimanade.

9Ndien Abasi okop uyo Manoah; angel Abasi onyuŋ ɔtɔŋɔ ntak osim ŋwan oro, nte enye etiede ke iŋwaŋ: edi Manoah ebe esie iduhe ye enye.

10Ndien ŋwan ɔsɔp itɔk efehe eketiŋ ɔnɔ ebe esie, onyuŋ ɔdɔhɔ enye, ete, Sese, owo oro okosimde mi ke usen oro omowut mi idem.

11Ndien Manoah adaha ke enyɔŋ, etiene ŋwan esie edem, okosim owo oro, onyuŋ obup enye, ete, Nte afo edi owo oro ɔkɔdɔhɔde ye ŋwan emi?

12Ndien enye ete, Edi ami. Ndien Manoah ɔdɔhɔ ete, Ama osu ke uyo fo, nso ididi ido eyen, ye se ekpenamde ye eyen?

13Ndien angel Jehovah ɔdɔhɔ Manoah, ete, Yak ŋwan osio idem esie efep ke kpukpru se ŋkɔdɔhɔde enye.

14Enye okudia baba ŋkpɔ kiet eke otode ke vine, okunyuŋ ɔŋwɔŋ wine ye mmin, okunyuŋ adia baba edidehe ŋkpɔ kiet: yak enye etiŋ enyin ke kpukpru se ŋketemede enye.

15Ndien Manoah ɔdɔhɔ angel Jehovah, ete, Mbɔk, yak nnyin inim fi mi esisit, tutu nnyin item eyen ebot idinim fi ke iso.

16Ndien angel Jehovah ɔdɔhɔ Manoah, ete, Afo okposuk ononim mi, nditaha uyo fo: edi ama awa edifɔp uwa, fɔp enye nɔ Jehovah. Koro Manoah mikɔfiɔkke ite ke enye edi angel Jehovah.

17Ndien Manoah ɔdɔhɔ angel Jehovah, ete, Enyiŋ fo ekere didie? Koro nnyin iyekpono fi, adaŋemi mme ikɔ fo ediwɔrɔde.

18Ndien angel Jehovah ɔdɔhɔ enye, ete, Nsinam afo obupde enyiŋ mi? ŋkɔm enye edi utibe.

19Ekem Manoah ada eyen ebot oro ye inuak-udia ɔfɔp ɔnɔ Jehovah ke enyɔŋ itiat oro: ndien enye anam utibe ŋkpɔ; ndien Manoah ye ŋwan esie ese.

20Ndien edikem adaŋemi ikaŋ obuberede ke itie-uwa ɔdɔk ke enyɔŋ, angel Jehovah asaŋa ke edeme-ikaŋ itie-uwa ɔdɔk. Ndien Manoah ye ŋwan esie ese, ndien eduɔ ke isɔŋ ekubi iso mmɔ.

21Ndien Manoah ye ŋwan esie itɔŋɔke aba ntak ikut angel Jehovah, Ndien Manoah ɔfiɔk ete ke angel Jehovah edi oro.

22Ndien Manoah ɔdɔhɔ ŋwan esie, ete, Nnyin iditreke ndikpa:

23koro nnyin imokut Abasi. Edi ŋwan esie ɔdɔhɔ enye, ete, Ekpedi nte Jehovah akpamade ndiwot nnyin, enye ikpɔbɔhɔ nnyin edifɔp uwa ye inuak-udia ke ubɔk, ikponyuŋ iwutke nnyin kpukpru ŋkpɔ emi, ikponyuŋ isianke oruk ŋkpɔ ntem inɔ nnyin ke ini emi.

24Edikem ŋwan esie aman eyen eren, onyuŋ osio enye enyiŋ Samson: eyen onyuŋ ɔkɔri, Jehovah onyuŋ ɔdiɔŋ enye ŋko.

25Ndien spirit Jehovah ɔtɔŋɔ ndidemere enye ndien-ndien ke nna-ekɔŋ Dan ke ufɔt Zorah ye Eshtaol.