2 SAMUEL 16 - Efik Old Bible With Sectional Headings

David ye Ziba

1ADAŊEMI David ama ekebe ibuot obot esisit, sese, Ziba owo Mephiboshet edisobo ye enye, asaŋa ye ass iba emi ebɔpde ŋkpɔ-udori, emi enyuŋ ebiomde uyo ikie iba, ye ebok edisat grape ikie, ye ebok fig ikie, ye wine ke ikpa.

2Ndien edidem ɔdɔhɔ Ziba, ete, Afo ada mme mmɔ emi edi nso? Ndien Ziba ɔbɔrɔ ete, Mme ass edi se ufɔk edidem edidade edoro ke esit; mme uyo ye mme fig edi se mkparawa fo editade; wine emi onyuŋ edi se mme akpa-mba ke wilderness eŋwɔŋde.

3Ndien edidem obup ete, Enye eyen usɔ ŋko? Ndien Ziba ɔbɔrɔ edidem, ete, Sese, enye ke etie ke Jerusalem: koro enye ɔdɔhɔde ete, Mfin emi ufɔk Israel eyeyak ubɔŋ ete mi ɔnɔ mi.

4Ndien edidem ɔdɔhɔ Ziba, ete, Sese, kpukpru se inyenede Mephibosheth akabare enyene fi. Ndien Ziba ɔdɔhɔ ete, Mmowuk ubɔk, yak ŋkut mfɔn ke iso fo, O ɔbɔŋ mi edidem.

5Ekem edidem David osim ke Bahurim, ndien sese, owo kiet oto do emi edide oruk ufɔk Saul, ekere Shimei, eyen Gera: enye ɔwɔrɔ, ke asaŋa ɔtɔk.

6Enye onyuŋ emen itiat otop David, ye kpukpru ikɔt edidem David: ndien kpukpru owo ye kpukpru mbon uko edu enye ke nnasia ye ke ufien.

7Shimei onyuŋ ɔdɔhɔ ntem, nte enye osuŋide, ete Wɔrɔ, wɔrɔ, afo owo iyip, ye oburobut owo:

8Jehovah anam ofuri iyip ufɔk Saul, emi afo adade ubɔŋ ke ibuot esie, ɔsɔp fi; Jehovah omonyuŋ ɔbɔ fi ubɔŋ esin ke ubɔk Absalom eyen fo: ndien, sese, afo emeyire ke ibak fo, koro afo edide owo iyip.

9Ndien Abishai eyen Zeruiah ɔdɔhɔ edidem, ete, Okpo ebua emi anam didie osuŋi ɔbɔŋ mi edidem? mbɔk, yak mbe ŋka ŋkebigi enye ibuot.

10Ndien edidem ete, Nsaŋa nso ye mbufo, nditɔ Zeruiah? Edieke enye osuŋide, edieke Jehovah onyuŋ ɔdɔhɔde ete, Yak enye osuŋi David, anie edidɔhɔ ndien, ete,

11Ke nso ke afo anam ntre? David onyuŋ ɔdɔhɔ Abishai, ye kpukpru ikɔt esie, ete, Sese, eyen mi, emi okotode mi ke idem, ke oyoyom uwem mi: ŋwaŋwa-ediso owo Benjamin emi? Mbufo ekukere enye: yak enye osuŋi: koro edi Jehovah ɔkɔdɔhɔ enye.

12Ndusuk Jehovah eyese idiɔk ido mi, Jehovah eyenyuŋ ɔnɔ mi se ifɔnde ke ibuot isuŋi esie mfin emi.

13Nte David ye ikɔt esie esaŋade ke usuŋ, Shimei onyuŋ asaŋa ke ŋkaŋ obot oko ye enye, ke osuŋi asaŋa, onyuŋ otomo enye ke itiat, ekem ye enye, onyuŋ owobi ntan asuan.

14Ekem edidem, ye kpukpru mmɔ eke edude ye enye enyuŋ ekpa mba, edi ediduɔk odudu do.

15Ekem Absalom ye kpukpru nditɔ Israel edisim Jerusalem; Ahithophel onyuŋ odu ye enye.

16Edikem, adaŋemi Hushai Arkite, ufan David, edide ke ɔtɔ Absalom, Hushai ɔdɔhɔ Absalom, ete, Yak edidem osuk odu uwem! yak edidem osuk odu uwem!

17Ndien Absalom ɔdɔhɔ Hushai, ete, Nte emi edi ima fo emi afo amade ufan fo? Nsinam afo mukasaŋake ye ufan fo?

18Ndien Hushai ɔdɔhɔ Absalom, ete, Ih ih, koro owo emi Jehovah, ye obio emi, ye kpukpru nditɔ Israel emekde, ke nnyene enye, nnyuŋ ndu ye enye.

19Ndien ŋko-ŋko ami ndinam ŋkpɔ nnɔ anie? Ndinamke ke iso eyen esie? Kpa nte ŋkanamde ŋkpɔ ke iso usɔ, kpasuk ntre ke ndidu ke iso fo.

20Ekem Absalom ɔdɔhɔ Ahithophel, ete, Mbufo eteme se nnyin idinamde.

21Ndien Ahithophel ɔdɔhɔ Absalom, ete, Duk tiene iban-esa usɔ emi enye ɔkɔkpɔŋde, ete ekpeme ufɔk; ndien ofuri Israel eyekop ete ke usɔ asasua fi: ndien ubɔk eyesɔŋ kpukpru mmɔ emi edude ye afo.

22Ndien mmɔ ewuk tent enɔ Absalom ke enyɔŋ ufɔk; ndien Absalom okot iban-esa ete esie ke iso ofuri Israel.

23Ndien item Ahithophel eke enye eketemede ke eyo oro, etie nte ŋkpɔ eke owo obupde uyo Abasi; ofuri item Ahithophel eketie ntem ye David ye Absalom nde.