MARK 1 - Efik Old Bible With Sectional Headings

Ukwɔrɔ ikɔ John(Mt 3.1-12; Lk 3.1-18; Jn 1.19-28)

1ERITƆŊƆ gospel Jesus Christ, Eyen Abasi.

2Kpa nte ewetde ke ŋwed prophet Isaiah, ete,

Sese, mmɔdɔŋ isuŋutom Mi ebem Fi iso,

Emi edinamde usuŋ Fo;

3Uyo andifiori ke desert, ete,

Mbufo ediɔŋ usuŋ Jehovah,

Eneŋere ɔkpɔusuŋ Esie;

4John oto edi edinim owo baptism ke desert, edinyuŋ ɔkwɔrɔ baptism erikabare esit, man efen mme idiɔk-ŋkpɔ.

5Ndien mbio ofuri edem Judea, ye kpukpru mme andiduŋ Jerusalem ewɔŋɔ etiene enye, enyuŋ ena baptism ke ubɔk esie ke akpa Jordan, ke eyararede mme idiɔk-ŋkpɔ mmɔ.

6John esine edisine-ŋkpɔ idet camel, onyuŋ ɔbɔbɔ mbɔbɔ ikpa-unam ke isin, onyuŋ adia ŋkukuŋkpɔyɔriyɔ ye aranɔkwɔk-ikɔt.

7Ndien enye ɔkwɔrɔ ete, Enye emi enyenede odudu akan mi etiene mi ke edem edi, emi mmendotke ndinuhɔ ntat uruk ikpa-ukot Esie.

8Ami nda mmɔŋ nnim mbufo baptism; edi Enye eyenim mbufo baptism ke Edisana Spirit.

(Mt 3.13—4.11; Lk 3.21-22; 4.1-13)

9Edikem ke mme usen oro, Jesus oto ke Nazareth obio Galilee, onyuŋ ana baptism ke ubɔk John ke akpa Jordan.

10Ndien kpa idaha oro Enye ɔwɔrɔde ke mmɔŋ ɔdɔk, Enye okut nte enyɔŋ asiahade, ye nte Spirit ɔsuhɔrede nte ibiom edidoro Enye ke idem:

11uyo onyuŋ oto ke enyɔŋ, ete, Afo edi edima Enyen Mi; mmenem esit eti-eti ye Afo.

12Ekem idaha oro Spirit ebin Enye esin ke desert.

13Ndien Enye odu ke desert usen aba, Satan onyuŋ odomo Enye; ndien Enye odu ye mme unam ikɔt; mme angel enyuŋ enam ŋkpɔ enɔ Enye.

14Edi ke ema ekayak John enɔ, Jesus aka ke Galilee ɔkɔkwɔrɔ gospel Abasi, ete,

15Ini emekem, Ubɔŋ Abasi ke ekpere: mbufo ekabare esit enyuŋ enim gospel ke akpanikɔ.

16Ekem nte Enye asaŋade ke mben Inyaŋ Galilee, Enye okut Simon ye Andrew eyen-eka Simon, nte eduɔŋɔde iyire ke inyaŋ; koro mmɔ edide mme ɔkɔ-iyak.

17Ndien Jesus ɔdɔhɔ mmɔ ete, Etiene Mi, ndien nyenam mbufo ekabare edi mme ɔkɔ-owo.

18Ndien ndo-ndo oro mmɔ edaha ekpɔŋ iyire, etiene Enye.

19Nte Enye ebede asaŋa ke iso esisit, Enye okut James eyen Zebedee ye John eyen-eka esie; mmɔ enyuŋ etie ke ubom ediɔŋ iyire mmɔ.

20Idaha oro Enye okot mmɔ; ndien mmɔ edaha ekpɔŋ ete mmɔ Zebedee ye mbio ukpe-utom ke ubom, etiene Enye.

21Ekem mmɔ eduk ke Capernaum: ndien idaha oro ke usen sabbath Jesus oduk ke synagogue ekpep owo ŋkpɔ.

22Ndien erikpep Esie enyene mmɔ ndyɔ; koro Enye ekpepde mmɔ nte owo emi enyenede odudu, idige nte mme scribe.

23Ndien idaha oro owo emi enyenede edidehe spirit odu ke synagogue mmɔ:

24enye onyuŋ ofiori ete, Isaŋa nso ye Afo, Jesus eyen Nazareth? Nte emedi ndisobo nnyin? mmɔdiɔŋɔ owo eke Afo edide, Edisana Eyen Abasi.

25Edi Jesus asua ɔnɔ enye, ete, Kibi inua, nyuŋ wɔrɔ enye ke idem.

26Ndien ke edidehe spirit ama akawai enye, ofiori ke ɔkpɔsɔŋ uyo, onyuŋ ɔwɔrɔ enye ke idem.

27Idem akpa mmɔ kpukpru, tutu ebup kiet eken ete, Nso ŋkpɔ edi emi? Obufa ukpep-ŋkpɔ! Enye ada odudu owuk ndidehe spirit, ndien mmɔ ekop uyo Esie.

28Idaha oro etop Esie asuana ke kpukpru ebiet ke ŋkan-ŋkuk Galilee.

29Ekem idaha oro, ke ini mmɔ ewɔrɔde ke synagogue, mmɔ esaŋa ye James ye John eduk ke ufɔk Simon ye Andrew.

30Edi eka ŋwan Simon ana ɔdɔŋɔ ufiop-idem; ndien idaha oro mmɔ esian Jesus ebaŋa enye.

31Ndien Jesus edi edimum enye ke ubɔk, emenere enye; ndien ufiop-idem ɔkpɔŋ enye, enye onyuŋ anam ŋkpɔ ɔnɔ mmɔ.

32Ekem ke mbubreyo, ke ini utin ama okosop, eda kpukpru mbon udɔŋɔ ye mmɔ emi enyenede demon esɔk Enye.

33Ofuri obio enyuŋ ebono ɔtɔ kiet ke enyin-usuŋ.

34Ndien Enye anam ediwak owo emi edɔŋɔde nsio-nsio udɔŋɔ, ekop nsɔŋidem, onyuŋ ebin ediwak demon ɔduɔk; inyuŋ iyakke mme demon esioro uyo, koro mmɔ ediɔŋɔde Enye.

35Ekem ke ŋkim-ŋwaŋa usen-ubɔk, Enye adaha ke enyɔŋ ɔwɔrɔ aka ke ebiet desert, onyuŋ ɔbɔŋ akam do.

36Edi Simon ye mmɔ emi edude ye enye ebine Enye; ndien mmɔ ekut Enye,

37enyuŋ edɔhɔ Enye ete, Kpukpru owo ke eyom Fi.

38Edi Enye ɔdɔhɔ mmɔ ete, Eyak nnyin ika ebiet eŋwen iduk ke mme obio eke ekperede, man ŋkwɔrɔ ikɔ do ŋko; koro ŋkɔwɔrɔ ndi ke ntak emi.

39Ndien Enye asaŋa oduk ke mme synagogue mmɔ ke ofuri Galillee, ɔwɔrɔ ikɔ, onyuŋ ebin demon ɔduɔk.

40Ekem owo akpa-mfia edi edikpe Enye ubɔk, onyuŋ ɔtɔŋɔ edɔŋ, ete Enye, ke Afo onyimede, emekeme ndinam mi nsana.

41Ndien mbɔm anam Jesus, Enye onyuŋ anyanare ubɔk otuk enye ete, Mmonyime, sana.

42Ndien ndo-ndo oro akpamfia ɔkpɔŋ enye, enye onyuŋ akabare asana.

43Edi Jesus ɔsɔŋɔ owuk enye, anam enye ɔnyɔŋ ini kiet, onyuŋ ɔdɔhɔ enye ete,

44Kpeme, kutiŋ baba ikɔ kiet unɔ ndomo owo kiet: edi nyɔŋ kowut oku idem fo, nyuŋ wa se Moses eketemede baŋa erinam fi asana, man edi ŋkpɔ-ntiense ɔnɔ owo.

45Edi enye ɔwɔrɔ ɔtɔŋɔ nditaŋa ŋkpɔ emi eti-eti, ndinyuŋ nsuan ikɔ emi, tutu Jesus ikemeke aba ndiduk ke obio aŋwa-aŋwa, edi odu ke edem ke ebiet desert: ndien mmɔ eto ke kpukpru edem etiene Enye.