1 ŊWED CORINTH 10 - Efik Old Bible With Sectional Headings

Nduri Utɔŋ Kabaŋa Ukpono Ndem

1KORO mmaŋa mbufo etre ndifiɔk, nditɔ-ete, ete kpukpru mme ete nnyin ema edu ke idak obubit enyɔŋ, mmɔ kpukpru enyuŋ esaŋa ke ufɔt inyaŋ ebe;

2kpukpru mmɔ ema enyuŋ ena baptism ediere ye Moses ke obubit enyɔŋ ye inyaŋ oro;

3kpukpru enyuŋ edia oruk udia eke spirit kiet, enyuŋ eŋwɔŋ ediŋwɔŋkpɔ eke spirit kiet;

4koro mmɔ ekeŋwɔŋ mmɔŋ eke otode ke itiat eke spirit, emi akasasaŋa ye mmɔ; ndien itiat oro ekedi Christ.

5Edi ediwak owo ke otu mmɔ ikenemke Abasi esit; koro Enye asuan mme okpo mmɔ eduɔŋɔ ke desert.

6Mme ŋkpɔ emi edi uwut-ŋkpɔ enɔ nnyin, ndikpep nnyin ete, ikudiɔk itɔŋ ibine se idiɔkde, nte mmɔ ekanamde.

7Mbufo ekunyuŋ edi mme okpono ndem, nte ndusuk mmɔ ekedide; nte ewetde ete, Mbio oro esuhɔre etetie edia enyuŋ eŋwɔŋ, enyuŋ edaha ke enyɔŋ ekebre mbre.

8Nnyin ikunyuŋ inam use, nte ndusuk mmɔ ekenamde, enyuŋ ekpaŋade, thousand owo edip ye ita ke usen kiet.

9Nnyin ikunyuŋ idomo Ɔbɔŋ, nte ndusuk mmɔ ekedomode Enye, ndien eda urukikɔt esobo mmɔ.

10Mbufo ekunyuŋ esuk uyo, nte ndusuk mmɔ ekesukde, enyuŋ etakde ke ubɔk andisobo.

11Mme ŋkpɔ emi ekɔwɔrɔ mmɔ, man edi uwut-ŋkpɔ enɔ owo; ekenyuŋ ewet mmɔ ndida nteme nnyin, emi utit mme eyo ama osim nnyin.

12Mmɔdo yak owo eke esede ete imɔ imɔsɔŋɔ ida ekpeme mbak enye ediduɔ.

13Idomo ikosimke mbufo ibɔhɔke se inade owo ndibiom; edi Abasi edi akpanikɔ, idinyuŋ iyakke edomo mbufo ebe se ukeme mbufo edide; edi Enye eyesiak usuŋ ubɔhɔ ɔnɔ mbufo ke ufɔt idomo, man mbufo ekeme ndibiom enye.

14Mmɔdo, ndima mme ufan mi, efehe ekpɔŋ ido ndem. Ntiŋ emi nte owo etetiŋ ŋkpɔ ye mme enyene-ibuot owo;

15edomo se ndɔhɔde ese.

16Cup eridiɔŋ eke nnyin idiɔŋde, nte oro idige eribuana iyip Christ? Uyo eke nnyin ibuŋde, nte oro idige eribuana ikpɔhidem Christ?

17Sia uyo edide kiet, nnyin, emi iwakde, idi ikpɔhidem kiet; koro kpukpru nnyin ibuanade uyo kiet oro.

18Mbufo ese Israel eke obukidem. Nte mmɔ emi ediade se ewade ibuanake ŋkpɔ ye itie-uwa?

19Ndɔhɔ ndien didie? Nte se ewade enɔ ndem edi ŋkpɔ? mme, nte ndem edi ŋkpɔ? Baba.

20Ndɔhɔ ntem nte, se mme Gentile ewade, ke ewa enɔ mme demon, iwaha inɔ Abasi; ndien nyomke mbufo eduk ebuana ye mme demon.

21Mbufo ikemeke ndiŋwɔŋ cup Ɔbɔŋ ye cup mme demon. Mbufo ikemeke nditiene ndiaŋkpɔ ke okpokoro Ɔbɔŋ, nnyuŋ ndia ke okpokoro mme demon.

22Mme, nte nnyin inanam Ɔbɔŋ ofibe ufup? Nte imenyene odudu ikan Enye?

23Kpukpru ŋkpɔ enenen ndinam, edi idige kpukpru ŋkpɔ efɔn. Kpukpru ŋkpɔ enenen ndinam, edi idige kpukpru ŋkpɔ enam owo ekɔri ke nti ido.

24Owo okuyom ufɔn esie, edi oyom ufɔn owo eŋwen.

25Se ededi eke enyamde ke urua, edia, ekubup mbume, mbak esit edifina mbufo:

26koro isɔŋ ye se iyɔhɔde ke esit enyene Ɔbɔŋ.

27Edieke owo eke minimke ke akpanikɔ okotde mbufo udia, onyuŋ etiede mbufo nte eka, edia ŋkpɔ ekededi eke enimde mbufo ke iso, ekunyuŋ ebup mbume, mbak esit edifina mbufo.

28Edi edieke owo ɔdɔhɔde mbufo ete, Ema ewa unam emi enɔ ndem, ekudia, kabaŋa owo emi ɔfɔide mbufo owut, ye kabaŋa mfina esit; ndɔhɔke mbaŋa mfina esit mbufo, edi kabaŋa mfina esit owo eken.

29Nsidi ntak eke ekpadade mfina esit owo efen edomo ewut se minenke mi ndinam?

30Edieke mbɔde udia ndia ye esit ekɔm, nsinam etiŋde idiɔk edian mi ke ŋkpɔ eke nnɔde ekɔm mbaŋa?

31Mmɔdo mme mbufo ediade, mme eŋwɔŋde, mme enamde ŋkpɔ ekededi, enam kpukpru enɔ Abasi ubɔŋ.

32Ekunam ŋkpɔ edi ntak iduɔ, edide ye mme Jew, onyuŋ edide ye mme Greek, onyuŋ edide ye ufɔk Abasi:

33kpa nte ami ŋko nnenem kpukpru owo esit ke kpukpru ŋkpɔ; nyomke ufɔn idem mi, edi uyom ufɔn uwak owo, man enyaŋa mmɔ.