ŊWED MBON ROME 16 - Efik Old Bible With Sectional Headings

1MMƆNƆ ŋwed itoro esɔk mbufo mbaŋa Phoebe eyen-ete nnyin aŋwan, emi edide anam-utom ufɔk Abasi emi odude ke Cenchrea.

2Edara enye ke Ɔbɔŋ nte odotde ikɔt Abasi ndinam, enyuŋ eŋwam enye ke ŋkpɔ ekededi eke enye ediyomde mbufo; koro enye ke idemesie edi owo eke akaŋwamde ediwak owo, onyuŋ aŋwamde mi ŋko.

3Ekɔm Prisca ye Aquila, mme nsaŋa-utom mi ke Christ Jesus,

4emi ekenyimede ndiduɔk uwem mmɔ kabaŋa uwem mi: idige ami ikpɔŋ ndɔhɔ ekɔm mmɔ; edi kpukpru mme ufɔk Abasi ke otu mme Gentile etiene enɔ ekɔm nde: enyuŋ ekɔm ufɔk Abasi emi odude ke ebiet mmɔ.

5Ekɔm Epaenetus emi mmade, emi edide akpa mfri eke Asia oŋwumde ɔnɔ Christ.

6Ekɔm Mary, emi akanamde ɔkpɔsɔŋ utom ɔnɔ mbufo.

7Ekɔm Andronicus ye Junias, emi edide oruk mi ye nsaŋa-ŋkpɔkɔbi mi: mmɔ edi mme ɔwɔrɔ-etop ke otu mme apostle, mmɔ ekenyuŋ ebem mi iso edu ke Christ.

8Ekɔm Ampliatus emi mmade ke ɔbɔŋ.

9Ekɔm Urbanus emi edide nsaŋa-utom nnyin ke Christ ye Stachys emi mmade.

10Ekɔm Apelles emi edomode efiɔk ke Christ. Ekɔm mbon ufɔk Aristobulus.

11Ekɔm Herodion emi edide oruk mi. Ekɔm mbon ufɔk Narcissus emi edude ke Ɔbɔŋ.

12Ekɔm Tryphaena ye Tryphosa, emi enanam utom ɔkpɔsɔŋ ke Ɔbɔŋ. Ekɔm Persis emi mmade; enye akakpa utom eti-eti ke Ɔbɔŋ.

13Ekɔm Rufus emi Ɔbɔŋ emekde: enyuŋ ekɔm eka esie, emi akanamde ye ami nte eka.

14Ekɔm Asyncritus, Phlegon, Hermes, Patrobas, Hermas, ye nditɔ-ete emi edude ye mmɔ.

15Ekɔm Philologus ye Julia, Nereus ye eyen-eka esie aŋwan, ye Olympas, ye kpukpru ikɔt Abasi emi edude ye mmɔ.

16Eda edisana ntim-inua ekɔm kiet eken. Kpukpru mme ufɔk Abasi emi enyenede Christ enɔ ekɔm esɔk mbufo.

17Mmekpe mbufo ubɔk nditɔ-ete, ekama enyin ese mmɔ emi etɔde ubahare ke otu mbufo, enyuŋ enamde ŋkpɔ esin owo eduɔ, minyuŋ isaŋake ikekem ye erikpep eke ekekpepde mbufo ete enam.

18Edianare ekpɔŋ mmɔ. Koro mmɔ emi etiede ntre inamke utom inɔ Ɔbɔŋ nnyin Christ, edi enam enɔ mme idiɔk udɔŋ mmɔ: ndien mmɔ eda nnem-inua ye inem-inem ndutiŋ eyut mme ɔkɔi esit ekabare.

19Kpukpru owo ema ekop etop nsuk-ibuot mbufo; emi esin mi mbure mbure mbaŋa mbufo. Edi mmoyom mbufo edi mme ɔfiɔk-ŋkpɔ ke erinam eti, enyuŋ edi ɔkɔi ke erinam idiɔk.

20Ndien ibigike bigi Abasi emem eyedigi Satan anuak ke idak ikpat mbufo.

Mfɔn Ɔbɔŋ nnyin Jesus akpakam odu ye mbufo.

21Timotheus nsaŋa-utom mi ete ekɔm mbufo. Lucius ye Jason ye Sosipater, emi edide oruk mi, enyuŋ enɔ ekɔm.

22Ami Tertius, emi ŋwetde ŋwed emi, mmɔkɔm mbufo ke Ɔbɔŋ.

23Gaius emi edide ete-ufɔk mi, onyuŋ edide ete-ufɔk ɔnɔ ofuri ufɔk Abasi, ete ekɔm mbufo. Erastus akama-okuk obio ete ekɔm mbufo. Quartus eyen-ete nnyin onyuŋ ɔnɔ ekɔm ŋko.

24Yak mfɔŋ Ɔbɔŋ nnyin Jesus Christ odu ye kpukpru mbufo.

25Enɔ Enye, emi ekemede ndinam mbufo esɔŋɔ eda, nte gospel mi ye erikwɔrɔ emi ŋkwɔrɔde mbaŋa Jesus Christ etemede; nte asaŋade ekekem ye eriyarare ndibe-ŋkpɔ, emi okodibede ke nsinsi eyo, edi ke emi akayararede;

26Emi enyuŋ edade se mme prophet ekewetde, nte nsinsi Abasi ɔkɔnɔde uyo, enam kpukpru mme idut efiɔk, man mmɔ esuk ibuot ke mbuɔtidem:

27Enɔ Enye emi ikpɔŋ-ikpɔŋ edide Abasi ɔniɔŋ ubɔŋ oto ke Jesus Christ, ke nsinsi. Amen.