2 NDIDEM 20 - Efik Old Bible With Sectional Headings

Edidem Hezikiah Ɔdɔŋɔ

1KE ini oro Hezekiah ɔdɔŋɔ udɔŋɔ mkpa. Ndien prophet Isaiah eyen Amoz aka ke ɔtɔ esie, ɔkɔdɔhɔ enye, ete, Ntem ke Jehovah ɔdɔhɔ, ete, Tim ŋkpɔ ufɔk fo: koro afo eyekpa, ududuhe uwem.

2Ndien enye akabare iso ese ibibene, onyuŋ ekpe Jehovah ubɔk, ete,

3O Jehovah mbɔk, ti nte nsaŋade ke iso fo ke akpanikɔ, ye ke ofuri esit, mma nnyuŋ nnam se ifɔnde ke iso fo. Hezekiah onyuŋ atua eyet eti-eti.

4Edikem, ke Isaiah mika-iwɔrɔke isim ufɔt obio, Jehovah ɔdɔhɔ enye, ete,

5Fiak kɔdɔhɔ Hezekiah, etubom ikɔt mi, ete, Ntem ke Jehovah, Abasi David usɔ, ɔdɔhɔ, ete, Mmokop mkpe-ubɔk fo, mmokut mmɔŋ-eyet fo; sese, nyenam udoŋɔ okure fi: afo eyedɔk ke ufɔk Jehovah ke ɔyɔhɔ usen ita.

6Nyenyuŋ ŋkɔrɔ isua efut ke mme usen fo; nnyuŋ nnyaŋa fi ye obio emi nsio ke ubɔk edidem Assyria: nyenyuŋ ŋkpeme obio emi, mbaŋa idem mi, ye David owo mi.

7Isaiah onyuŋ ɔdɔhɔ, ete Mbufo eda ebok fig; ndien mmɔ eda edian ke oyo oro, ndien udɔŋɔ okure enye.

8Ndien Hezekiah obup Isaiah, ete, Nsidi idiɔŋɔ, ete ke Jehovah edinam udɔŋɔ, okure mi ami ndinyuŋ ndɔk ŋka ufɔk Jehovah ke ɔyɔhɔ usen ita?

9Ndien Isaiah ɔdɔhɔ, ete, Idiɔŋɔ emi eyeto Jehovah ɔnɔ fi, ete ke Jehovah edinam ŋkpɔ emi enye ɔkɔdɔhɔde; nte, afo oyom ete mfut aka iso ikpat duop, mme afiak edem ikpat duop?

10Ndien Hezekiah ɔdɔhɔ, ete, Emi mfut ɔsuhɔrede ikpat duop edi ekpri ŋkpɔ: Ih ih, edi yak mfut afiak edem ikpat duop.

11Ndien prophet Isaiah eseme ɔnɔ Jehovah, ndien enye anam mfut afiak edem ikpat duop, ekem ye ikpat emi enye ɔsuhɔrede ke dial Ahaz.

12Ke ini oro Berodach-baladan, eyen Baladan, edidem Babylon, ɔnɔ ŋwed ye enɔ esɔk Hezekiah; koro enye okokopde ete ke Hezekiah ɔkɔdɔŋɔ.

13Ndien Hezekiah okop uyo mmɔ, onyuŋ owut mmɔ ofuri ufɔk ŋkpɔ-uto esie, ye silver, ye gold, ye ufuɔŋkpɔ, ye edifɔn aran, ye ofuri ufɔk ŋkpɔ-ekɔŋ esie, ye kpukpru se ekutde ke ebiet unim-ŋkpɔ esie: ŋkpɔ baba kiet eke Hezekiah miwutke mmɔ, iduhe ke ufɔk esiemɔ, ye ke ofuri idut emi enye akarade.

14Ekem prophet Isaiah aka ke ebiet edidem Hezekiah, ɔkɔdɔhɔ enye, ete, Mbio emi ekedɔhɔ didie? Ekenyuŋ eto mmɔŋ etiene fi? Ndien Hezekiah ɔbɔrɔ, Mmɔ eto ke anyan idut, kpa ke Babylon.

15Ndien enye obup, ete, Mmɔ ekekut nso ke ufɔk fo? Ndien Hezekiah ɔbɔrɔ, ete, Mmɔ ekekut kpukpru se idude ke ufɔk mi: baba ŋkpɔ kiet eke mmeŋkowutke mmɔ iduhe ke ebiet unim-ŋkpɔ mi.

16Ndien Isaiah ɔdɔhɔ Hezekiah, ete, Kop uyo Jehovah.

17Sese, usen ke edi emi mmɔ editaŋde kpukpru se idude ke ufɔk fo, ye se mme usɔ ekenimde tutu osim mfin emi, eka Babylon: ŋkpɔ ndomo kiet idisuhɔke. Ke edi Jehovah ɔdɔhɔ.

18Mmɔ eyenyuŋ eda nditɔ fo eke editode fi ke idem, eke afo edibonde; ndien mmɔ eyedi eunuch ke ebiet edidem Babylon.

19Ndien Hezekiah ɔdɔhɔ Isaiah, ete, Uyo Jehovah emi afo ɔdɔhɔde ɔfɔn. Enye onyuŋ ɔdɔhɔ, ete, Ŋkɔm emem ye akpanikɔ eyedu ke ini mi?

20Ndien ama edi ikɔ Hezekiah eke esuhɔde, ye kpukpru uko esie, ye nte enye akanamde mkpɔdiɔhɔ - mmɔŋ, ye udiɔŋ mmɔŋ, onyuŋ anamde mmɔŋ oduk ke obio, nte iwetke mmɔ isin ke ŋwed ikɔ eyo ndidem Judah?

21Ekem Hezekiah osuhɔre ana ye mme ete esie ede: ndien Manasseh eyen esie ada ubɔŋ ke itie esie.