2 CHRONICLES 25 - Efik Old Bible With Sectional Headings

1AMAZIAH osim isua edip ye ition ke ini enye adade ubɔŋ, enye onyuŋ edi edidem ke Jerusalem ke isua edip ye usukkiet. Ndien enyiŋ eka esie ekere Jehoaddan ŋwan Jerusalem.

2Ndien enye anam se inende Jehovah ke enyin, edi inamke ke ofuri esit.

3Edikem adaŋemi enye ɔsɔŋɔde etie ke itie ubɔŋ, enye owot ikɔt esie oro ekewotde ete esie edidem.

4Edi enye iwotke nditɔ mmɔ, edi anam nte ewetde ke mbet ke ŋwed Moses, emi Jehovah eketemede, ete, Yak mme ete ekukpa ebaŋa nditɔ, nditɔ ekunyuŋ ekpa ebaŋa mme ete, edi yak kpukpru kiet kiet ekpa ke mme idiɔk ido mmɔ.

5Ekem Amaziah obon Judah ɔtɔ kiet, onyuŋ otim mmɔ ke ufɔk ete, ke ufɔk ete, onim ke mme etubom mme tɔsin, ye mme etubom mme ikie, ke ofuri Judah ye Benjamin: onyuŋ abat mmɔ, ɔtɔŋɔde ke owo isua edip, ye mmɔ eke ebede oro, ndien okut nte mmɔ ewɔrɔde tɔsin edimek owo ikie ita eke ewɔrɔde eka ekɔŋ, ekama eduat ye otu-ekɔŋ.

6Enye onyuŋ ada talent silver ikie, ekpe tɔsin mkpɔsɔŋ owo uko itie ikie, eke etode Israel.

7Edi owo Abasi kiet edi ke ɔtɔ esie edidɔhɔ, ete O edidem, kuyak mbon-ekɔŋ Israel esaŋa ye afo: koro Jehovah midaha ye Israel, kpa ofuri nditɔ Ephraim.

8Edi afo ama aka, nam sɔŋ esit ke ekɔŋ: Abasi eyenam fi ɔduɔ ke iso mme asua: koro Abasi emekeme ndinyaŋa, nnyuŋ mmen nduɔk.

9Ndien Amaziah obup owo Abasi oro, ete, Ndinam didie ke talent ikie oro ŋkɔnɔde udim Israel? Ndien owo Abasi oro ɔdɔhɔ, ete, Jehovah emekeme ndinɔ fi eke awakde akan emi.

10Ndien Amaziah adianare mmɔ efep, kpa udim oro okotode ke Ephraim etiene enye, ete enyɔŋ ebiet mmɔ: ndien mmɔ eyat esit ye Judah eti-eti, ndien efiak ke ebiet mmɔ ke ɔkpɔsɔŋ ifiopesit.

11Ekem Amaziah ɔsɔŋ esit, onyuŋ ada ikɔt esie ɔwɔrɔ aka ke itihere inuŋ, okowot tɔsin nditɔ Seir duop.

12Ndien nditɔ Judah emum tɔsin duop eŋwen ye uwem, eda mmɔ eka ke ibuot akwa itiat kiet, eda ke ibuot itiat oro eduɔŋɔ mmɔ, ndien mmɔ enuaha kpukpru.

13Ndien mbon udim oro Amaziah akakpande, ete mmɔ efiak ekutiene imɔ edi ekɔŋ, eda esin ke obio Judah, ɔtɔŋɔde ke Samaria, tutu osim ke Beth-horon, enyuŋ ewot tɔsin owo ita, enyuŋ ebume ediwak mbume.

14Edikem adaŋemi Amaziah otode ndisuan mme Edomite, enye ada mme abasi nditɔ Seir, edi edinim ke abasi esiemɔ, onyuŋ ɔnuhɔ ke iso mmɔ, onyuŋ ɔfɔp uwa ɔnɔ mmɔ.

15Ndien Jehovah ayat esit ye Amaziah, onyuŋ ɔdɔŋ prophet utom ke ɔtɔ esie, ete enye, Nsinam afo etienede mme abasi idut oro mikanyaŋake ikɔt mmɔ, isio fi ke ubɔk?

16Edikem ke ini enye osuk ɔdɔhɔde ye enye, edidem obup enye, ete, Nte nnyin imenim fi ke andinɔ edidem item? Tre; edinam didie ewot fi? Ndien prophet oro etre, onyuŋ ɔdɔhɔ ete, Mmɔfiɔk nte ke Abasi amaduak ndisobo fi, koro afo anamde emi, ndien mukopke item mi.

17Ekem Amaziah edidem Judah ekere, ndien ɔdɔŋ ekedɔhɔ Joash eyen Jehoahaz eyen Jehu, edidem Israel, ete, Di man kiet ese kiet iso.

18Ndien Joash edidem ɔdɔŋ ekedɔhɔ Amaziah edidem Judah, ete, Mbarekpe emi odude ke Lebanon ɔdɔŋ ekedɔhɔ cedar emi odude ke Lebanon, ete, Da eyen fo aŋwan nɔ eyen mi ɔdɔ: ndien unam ikɔt kiet emi odude ke Lebanon, asaŋa ebe edigi mbarekpe.

19Afo ke ɔdɔhɔ, ete, Sese, imɔ imakan Edom; nsinam afo oyomde nditibi eŋwan ye idiɔk-ŋkpɔ nnɔ idem fo? ndien afo ye Judah ŋko eduɔ?

20Edi Amaziah ikopke; koro oro otode Abasi, man enye ayak mmɔ esin (Joash) ke ubɔk, koro mmɔ eketienede mme abasi Edom.

21Ekem Joash edidem Israel ɔdɔk; ndien enye ye Amaziah edidem Judah kiet okut kiet iso, ke Beth-shemesh emi enyenede Judah.

22Ndien Judah asuana ke iso Israel, kpukpru owo enyuŋ efeŋe enyɔŋ ke tent mmɔ.

23Ndien Joash edidem Israel omum Amaziah edidem Judah, eyen Joash, eyen Jehoahaz, ke Beth-shemesh, ndien ada enye edi ke Jerusalem, onyuŋ owuri ibibene Jerusalem, ɔtɔŋɔde ke enyin-usuŋ Ephraim, tutu osim ke inua-otop inuk, ibio-idomo-okuk ikie inaŋ.

24Ndien enye ada ofuri gold, ye silver, ye kpukpru mkpoduoho eke ekutde ke ufɔk Abasi ke ubɔk Obed-edom, ye ŋkpɔ-uto ufɔk edidem, ye nditɔ ubiɔŋ, ndien ɔnyɔŋ ke Samaria.

25Ndien Amaziah eyen Joash edidem Judah odu uwen isua efut, ke Joash eyen Jehoahaz edidem Israel ama akakpa.

26Ndien ama edi mbemiso ye akpatre ikɔ Amaziah emi esuhɔde, sese, nte ikewetke mmɔ isin ke ŋwed ndidem Judah ye Israel?

27Ndien toto ke ini oro Amaziah akakabarede etre nditiene Jehovah, mmɔ eduk odu ebaŋa enye ke Jerusalem; ndien enye efehe aka Lachish: edi mmɔ edɔŋ ebine enye ke Lachish, ekewot enye do.

28Ndien mmɔ edori enye ke horse, ebiom edibuk ye mme ete esie ke obio Judah.