1EDIKEM ke ɔyɔhɔ isua usukkiet nte enye akada ubɔŋ, ke ɔyɔhɔ ɔfiɔŋ duop, ke ɔyɔhɔ usen ɔfiɔŋ duop, Nebuchadnezzar edidem Babylon, ye ofuri udim-ekɔŋ esie edi ekɔŋ ye Jerusalem, edikan enye ekuk.
2Ndien mmɔ ebɔp tower ekan enye ekuk. Ntem ke mmɔ ekan obio ekuk, tutu osim ke ɔyɔhɔ isua edidem Zedekiah duopekiet.
3Ndien ke ɔyɔhɔ usen usukkiet ke ɔyɔhɔ ɔfiɔŋ (inaŋ), akaŋ ɔsɔŋ ubɔk ke obio, udia eke mbio-obio ediade inyuŋ iduhe.
4Ekem ebuŋ obio, kpukpru mbon-ekɔŋ enyuŋ efeŋe ke okoneyo ke usuŋ inua-otop ke ufɔt ibibene mbiba emi ekperede iŋwaŋ-esa edidem: (koro mme Chaldean enyuŋ ekan obio ekuk:) ndien (edidem) efehe aka usuŋ una-isɔŋ.
5Ndien udim-ekɔŋ mme Chaldean ebine edidem, enyuŋ esim enye ke una-isɔŋ Jericho: ndien ofuri udim ekɔŋ esie esuana ekpɔŋ enye.
6Ndien mmɔ emum edidem, enyuŋ eda enye esɔk edidem Babylon ke Riblah; ndien mmɔ ekpe ikpe ye enye.
7Mmɔ enyuŋ ewot nditɔ-iren Zedekiah ke iso esie, enyuŋ etibi Zedekiah enyin, enyuŋ ekɔbi enye ŋkpɔkɔbi okpoho, eda enye enyɔŋ ke Babylon.
8Ekem ke ɔyɔhɔ ɔfiɔŋ ition, ke ɔyɔhɔ usen itiaba ke ɔfiɔŋ, emi edide ɔyɔhɔ isua edidem Nebuchadnezzar edidem Babylon efurenaŋ, Nebuzaradan etubom mbon-ukpeme edidem, owo edidem Babylon, edisim Jerusalem:
9ndien enye ɔfɔp ufɔk Jehovah, ye ufɔk edidem, ye kpukpru ufɔk Jerusalem, ye kpukpru ikpɔ ufɔk ke enye ɔfɔp ke ikaŋ.
10Ndien ofuri udim-ekɔŋ mme Chaldean emi edude ye etubom mbon-ukpeme ewuri ibibene Jerusalem ekan ekuk.
11Nebuzaradan etubom mbon-ukpeme edidem onyuŋ ataŋ mmɔ eken emi esuhɔde ke obio, ye mbon-itɔk emi ediande idem ye edidem Babylon, ye mbio-obio emi esuhɔde, ɔnyɔŋ.
12Edi etubom mbon-ukpeme ɔkpɔŋ mbon-ubuene isɔŋ, onim ke mme ɔdiɔŋ vine ye mme ofuŋ-isɔŋ.
13Mme Chaldean enyuŋ ebom mme adaha okpoho emi edude ke ufɔk Jehovah, ye mme udiɔhɔ-akpaŋkpaŋ, ye mkpɔdiɔhɔ-mmɔŋ okpoho emi edude ke ufɔk Jehovah, enyuŋ ebiom okpoho mmɔ enyɔŋ ke Babylon.
14Mmɔ enyuŋ eda mme eso, ye mme uwobi-ntɔŋ, ye udiɔŋ-utuenikaŋ, ye mme ikpaŋ-idaŋ, ye kpukpru ŋkpɔ okpoho eke edade enam utom, enyɔŋ.
15Etubom mbon-ukpeme onyuŋ ada censer, ye mme bowl, eke edide gold, gold, ye eke edide silver, silver.
16Mme adaha mbiba, ye mkpɔdiɔhɔ-mmɔŋ kiet, ye mme udiɔhɔ akpaŋkpaŋ oro Solomon akanamde ɔnɔ ufɔk Jehovah; okpoho kpukpru ŋkpɔ emi akan idomo.
17Idaha adaha kiet edi ibio-idomo-okuk efureta, ibuot emi odorode enye ke enyɔŋ onyuŋ edi okpoho, idaha ibuot oro onyuŋ edi ibio-idomo-okuk ita: ye iyire, ye mme pomegranate emi ediande ke ibuot oro ekan ekuk, ofuri edi okpoho-okpoho; adaha eken onyuŋ ebiet emi ke usɔ-iyire.
18Etubom mbon ukpeme onyuŋ ada Seraiah akwa oku, ye Zephaniah, adiana-akpa oku, ye mme andikpeme - usuŋ ita:
19onyuŋ ada adidaha kiet emi edide etubom mbon-ekɔŋ, osio ke obio, ye owo ition ke otu mmɔ oro ekekutde edidem iso, emi edude ke obio, ye andiwet ŋwed etubom udim-ekɔŋ emi etemede mbio-obio ekɔŋ, ye mbon iŋwaŋ ata emi edude ke obio:
20ndien Nebuzaradan etubom mbon-ukpeme ada mme mmɔ emi edisɔk edidem Babylon ke Riblah:
21ndien edidem Babylon ɔtɔ mmɔ owot ke Riblah, ke idut Hamath: onyuŋ ataŋ Judah ke isɔŋ mmɔ efep.
22Ndien ama edi mmɔ eke esuhɔde ke isɔŋ Judah, emi Nebuchadnezzar edidem Babylon ɔkpɔŋde, enye odori Gedaliah, eyen Ahikam, eyen Shaphan, onim ete edi etubom mmɔ.
23Ekem adaŋemi kpukpru mme etubom ekɔŋ ye ikɔt mmɔ ekopde, ete ke edidem Babylon ama onim Gedaliah ke etubom. Ishmael eyen Nethanian, ye Johanan eyen Kareah, ye Seraiah eyen Tanhu-meth, Netophathite kiet, ye Jaazaniah eyen Maacathite kiet, kpa mmɔ ye ikɔt mmɔ eka ke ɔtɔ Gedaliah ke Mizpah.
24Ndien Gedaliah ɔŋwɔnɔ ɔnɔ mmɔ, ye ikɔt mmɔ, onyuŋ ɔdɔhɔ mmɔ, ete, Mbufo ekufehe ikɔt mme Chaldean; mbufo eduŋ ke edem emi, enyuŋ edi ikɔt edidem Babylon, ndien eyefɔn ye mbufo.
25Edikem ke ɔyɔhɔ ɔfiɔŋ itiaba, Ishmael eyen Nethaniah, eyen Elishama, emi otode ke ubon edidem ye owo duop ŋko, eka eketɔ Gedaliah ewot, ye mme Jew, ye mme Chaldean emi edude ye enye ke Mizpah.
26Ndien kpukpru owo, mbɔ ye mbuot, ye mme etubom mbon ekɔŋ, edaha ke enyɔŋ, eka ke Egypt: koro ndik mme Chaldean anamde mmɔ.
27Edikem ke ɔyɔhɔ isua edip ye efureba nte ekemen Jehoaichin edidem Judah efep, ke ɔyɔhɔ ɔfiɔŋ duopeba, ke ɔyɔhɔ usen edip ye itiaba ke ɔfiɔŋ, Evil-mero-dach edidem Babylon, ke isua oro enye adade ubɔŋ, emenere Jehoiachin edidem Judah ibuot, osio ke ufɔk ŋkpɔkɔbi:
28onyuŋ etiŋ ikɔ ufan-ufan ye enye, onyuŋ emenere ebekpo esie onim ke eyɔŋ akan ebekpo ndidem oro edude ye enye ke Babylon;
29onyuŋ ɔkpuhɔre enye edisine-ŋkpɔ ufɔk ŋkpɔkɔbi: ndien enye adia ŋkpɔ ke iso esie kpukpru ini, ke ofuri eyo uwem esie.
30Ndien udeme esie edi udeme emi edidem ɔnɔde enye kpukpru ini, kpa se ikemde ke usen, ke ofuri eyo uwem esie.
Who We AreWhat We EelieveWhat We Do
2025 by iamachristian.org,Inc All rights reserved.
