JEREMIAH 2 - Efik Old Bible With Sectional Headings

Abasi Ekpe ye israel Ete Ewɔŋɔde Ekpɔŋ Ukwaŋ Ido Mmɔ

1NDIEN uyo Jehovah osim mi, ete, Ka kokot ke utɔŋ Jerusalem, ete,

2ntem ke Jehovah ɔdɔhɔ ete, Mmeti fi, mfɔnido uyen fo ye ima fo ke ini oro afo ekedide ŋwan ndɔ, nte afo akasaŋade mi ke edem, ke wilderness, ke isɔŋ eke mitɔhɔ ŋkpɔ ke esit.

3Israel ekedi edisana ikɔt Jehovah, akpa mfri ŋkɔri esie: kpukpru mmɔ eke ediade enye ekedue isop; idiɔk-ŋkpɔ okosim mmɔ; Jehovah ɔdɔhɔ.

4Mbufo ufɔk Jacob, ye kpukpru ubon ufɔk Israel, ekop uyo Jehovah:

5ntem ke Jehovah ɔdɔhɔ ete, Mme ete mbufo ekekut nso ukwaŋ-ŋkpɔ ye ami eke mmɔ ekpɔŋde mi anyan usuŋ, enyuŋ ebinede ikpikpu ŋkpɔ, enyuŋ ekabare edi oburobut? Inyuŋ idɔhɔke ite,

6Enye Jehovah emi akadade nnyin ke isɔŋ Egypt ɔdɔk? Emi akadade nnyin usuŋ ke wilderness, ke isɔŋ desert ye obube, ke edisat isɔŋ, ye isɔŋ mfut mkpa, ke isɔŋ eke baba owo kiet misaŋake ke esit ibe, eke owo minyuŋ iduŋke do?

7Ndien ŋkada mbufo nduk ke isɔŋ enyene eti iŋwaŋ, nte edia mfri esie ye mfɔn esie: ndien mbufo eduk edisabare isɔŋ mi, enyuŋ enim udeme mi ke ŋkpɔ mbubiam.

8Mme oku idɔhɔke ite, Enye Jehovah? Mmɔ eke ekamade ŋwed-mbet inyuŋ ifiɔkke mi: mme pastor enyuŋ edue mi, mme prophet enyuŋ eda Baal enam prophecy, enyuŋ ebine se midoroke udori.

9Jehovah ɔdɔhɔ ete, Oro esin nsuk ntɔhɔ ye mbufo, nyenyuŋ ntɔhɔ ye nditɔ nditɔ mbufo ŋko.

10Mbufo ebe ndien, eka ke mme isuo Kittim ekese; enyuŋ edɔŋ utom ke Kedar, enyuŋ etim ekere, enyuŋ ese mme oruk ŋkpɔ ntem mmɔdo.

11Nte idut ama ɔkpuhɔ mme abasi (mmɔ) eke midige Abasi? Edi ikɔt mi emeda se midoroke udori ekpuhɔ ubɔŋ mmɔ.

12Jehovah ɔdɔhɔ, ete, O enyɔŋ, mbufo eyik ŋkpɔ emi, enyuŋ edikhe, yak idem onyuŋ akpa mbufo eti-eti.

13Koro ikɔt mi emenam idiɔk ŋkpɔ iba; emekpɔŋ mi idim mmɔŋ uwem, enyuŋ etibi obube enɔ idem mmɔ, kpa ndisiaha obube eke mikamake mmɔŋ.

14Nte Israel edi ofin? Nte enye edi amana ke ufɔk?

15Nsinam ndien enye akabarede edi ŋkpɔ mbume? Mkparawa lion ke ekuni enye, emenere uyo mmɔ, enyuŋ enim isɔŋ esie ke ŋkpɔ nsobo: mme obio esie emenyuŋ eta ikaŋ, enana owo eke oduŋde.

16Nditɔ Noph ye Tahpanhes ŋko enyuŋ edia fi etiŋe ibuot.

17Nte afo unamke emi unɔ idem fo, koro afo ɔkɔkpɔŋde Jehovah Abasi fo, ke ini eke enye adade fi usuŋ?

18Afo asaŋa nso ndien, ke usuŋ Egypt ɔkɔŋwɔŋ mmɔŋ Shihor? Onyuŋ asaŋa nso ke usuŋ Assyria, ɔkɔŋwɔŋ mmɔŋ Akpa?

19Idiɔk ido fo eyetunɔ fi, mfiak-edem fo eyenyuŋ ɔnɔ fi ufen: fiɔk ndien, nyuŋ se ete ke ɔmɔdiɔk, ke onyuŋ odoro, koro afo ɔkɔkpɔŋde Jehovah Abasi fo, koro ndik mi minyuŋ iduhe fi ke idem. Emi edi uyo Ɔbɔŋ Jehovah mme udim.

20Koro ŋkobuŋde fi ɔkpɔnɔ tutu ko, ŋkonyuŋ ŋkibide fi ŋkpɔkɔbi: ndien afo ɔdɔhɔ ete Ndinamke ŋkpɔ; koro afo ɔsuhɔrede ana nte akpara ke enyɔŋ kpukpru edikoŋ obot, ye ke idak kpukpru awawa eto.

21Ndien ami ŋkɔtɔ fi ata vine, ata akpan mkpasip: nsinam ndien afo akabarede edi idiɔk eyen vine idut ɔnɔ mi?

22Okposuk edi nte afo adade soda eyet idem, onyuŋ ada ediwak soap ke idem fo, idiɔk ido fo etie ndek-ndek ke iso mi; Ɔbɔŋ Jehovah ɔdɔhɔ.

23Afo edinam didie ɔdɔhɔ, ete “Ndeheke, mbineke Baalim?” Se usuŋ fo ke itihere: fiɔk se afo anamde: (afo) ɔsɔp-ukot dro-medary eke ɔyɔrɔde ke usuŋ esie;

24uman ass ikɔt eke emehede ye wilderness, udɔŋ esit esie esin enye oŋwine ofum: anie edikabare enye ke oyomde ayara? Yak kpukpru mmɔ eke eyomde enye ekukpa ndinam ŋkpɔ mkpamba; mmɔ eyekut enye ke ɔfiɔŋ esie.

25Kuyak ukot fo ana iferi, kuyak itɔŋ asat fi: ndien afo ɔdɔhɔ, ete: mbut: Ih ih: koro mmama isen owo, ndien nyesuk ntiene mmɔ.

26Kpa nte but anamde inɔ, koro emumde enye, kpa ntre ke but edinam ufɔk Israel, mmɔ, ye ndidem mmɔ, ye mbɔŋ mmɔ, ye mme oku mmɔ, ye mme prophet mmɔ.

27Ke edɔhɔ eto, ete, Afo edi ete mi; enyuŋ edɔhɔ itiat, ete, Afo ekaman mi: koro mmɔ emekabare ekɔt enɔ mi, ikabakede iso: ndien ke ini ukut mmɔ, mmɔ eyedɔhɔ, ete, Daha ke enyɔŋ di nyaŋa nnyin.

28Ndien mme abasi fo oro afo akanamde ɔnɔ idem fo edu mmɔŋ? Yak mmɔ edaha ke enyɔŋ, edieke mmɔ edikemede ndinyaŋa fi ke ini ukut fo: koro mme abasi fo ekemde ibat mme obio fo, O Judah.

29Jehovah ɔdɔhɔ, ete, Mbufo edinam didie etɔhɔ ye ami?

30Kpukpru mbufo emedue mi. Mmamia nditɔ mbufo ikpikpu; mmɔ ikopke item: ofut mbufo amadia mme prophet mbufo, nte lion eke osobode.

31O emana, mbufo ekut uyo Jehovah. Nte ami ŋkedi wilderness nnɔ Israel? Nte ŋkedi isɔŋ ekim? Nsinam ikɔt mi ekedɔhɔde, ete, Nnyin imɔŋ iyɔrɔ kpukpru ebiet; nnyin ididige aba ke ɔtɔ fo?

32Nte eyen-aŋwan edifre ŋkpɔ mbana esie? Nte ŋwan ndɔ edifre ubɔp-isin esie? Edi ikɔt mi emefre mi usen inyeneke ibat.

33Afo anam didie otim anam usuŋ fo man ebine ima? Mmɔdo afo emekpep mme idiɔk iban usuŋ fo ŋko.

34Owo enyuŋ ekut iyip ukpɔŋ mme ubuene eke miduehe, ke ekura fo ŋko. Idige ke eriduŋɔre ke ŋkut mmɔ, edi ŋkut ke kpukpru mme mmɔ emi.

35Ndien afo ɔdɔhɔ, ete, Koro mmennyeneke se nduede, ŋkɔm enye eyemen mi iyaresit esie ke idem efep. Sese, ami nyekpe ikpe ye afo: koro afo ɔdɔhɔde, ete, nnamke idiɔk.

36Nsinam afo oyoŋde ntem eti-eti, onyuŋ ɔkpuhɔrede usuŋ fo? Afo eyeda but abaŋa Egypt, kpa nte akadade abaŋa Assyria.

37Afo eyenyuŋ ɔwɔrɔ ke esit ŋko, ubɔk fo eyenyuŋ odoro fi ke ibuot: koro Jehovah emesin ŋkpɔ mbuɔt-idem fo, ndien afo udukwe unen ke esit.