1 SAMUEL 15 - Efik Old Bible With Sectional Headings

Saul Aka Ekɔŋ ye Mbon Amalek

1EKEM Samuel ɔdɔhɔ Saul, ete, Jehovah ɔkɔdɔŋ mi, ete nyet fi aran nnim ke edidem ikɔt esie, Israel: kop, ndien, uyo ikɔ Jehovah.

2Ntem ke Jehovah mme udim ɔdɔhɔ, ete, Ŋkese se Amalek ekenamde ye Israel, nte mmɔ ekenade ke usuŋ ekpeme enye ke ini enye otode ke Egypt ɔdɔk.

3Ka, ndien kasuan Amalek, mbufo enyuŋ esobo kpukpru se mmɔ enyenede, kufen mmɔ: edi wot eren, ye ŋwan, ye eyen-ɔwɔŋ, ye nsek-eyen, ye enaŋ, ye ŋkpri ufene, ye camel, ye ass.

4Ndien Saul okot kpukpru owo edi, ndien otim mmɔ esin ke udim ke Telaim, tɔsin mbon-ekɔŋ ke itie ikie iba eke esaŋade ke ikpat, ye tɔsin nditɔ Judah duop.

5Ekem Saul edisim obio Amalek, onyuŋ onim mbon-udibe ke ebedeŋ.

6Ndien Saul ɔdɔhɔ mme Kenite, ete, Mbufo ewɔŋɔ ke otu mme Amalekite esuhɔre, mbak ndisobo fi ye mmɔ: koro mbufo ekefɔnde ido ye kpukpru nditɔ Israel ke ini oro mmɔ etode ke Egypt edɔk. Ntre ke mme Kenite edaŋa ke otu mme Amalekite.

7Ndien Saul asuan Amalek, ɔtɔŋɔde ke Havilah tutu osim ke Shur, emi asakde iso ese Egypt.

8Enye onyuŋ omum Agag edidem Amalek ye uwem, onyuŋ osobo ofuri obio ke iso ofut.

9Ndien Saul ye kpukpru owo eyak Agag, ye ŋkpri ufene, ye enaŋ eke edide nti, ye eke oruk efen, ye nditɔ-erɔŋ, ye kpukpru se ifɔnde, inyuŋ inyimeke ndisobo mmɔ: edi mmɔ esobo kpukpru ufene eke edide mbukkpo ye mfum-mfum.

10Ekem uyo Jehovah osim Samuel,ete,

11Mmatua mkpɔfiɔk koro ŋkonimde Saul ke edidem: koro enye ama akabare ɔkpɔŋ mi, inyuŋ inamke uyo mi. Ndien Samuel ayat esit, onyuŋ eseme ɔnɔ Jehovah ke ofuri okoneyo.

12Ekem Samuel abak adaha ke enyɔŋ ke usenubɔk, ete ikosobo ye Saul. Ndien etiŋ enɔ Samuel, ete, Saul ama edi ke Carmel, ndien, sese, enye ama owuk ŋkpɔ eriti ke idemesie, ama onyuŋ ɔwɔŋɔre ebe, ɔsuhɔre aka ke Gilgal.

13Ekem adaŋemi Samuel osimde Saul, Saul ɔdɔhɔ enye, ete, Jehovah osuk ɔdiɔŋ fi: mma nnam ke uyo Jehovah.

14Ndien Samuel ɔdɔhɔ, ete, Uyo mmai ŋkpri ufene ye eke enaŋ emi ŋkopde ke utɔŋ mi edi nso?

15Ndien Saul ɔdɔhɔ ete, Ekeda mmɔ ke Amalek edi: koro mbon-ekɔŋ ekekpɔŋde ŋkpri ufene ye enaŋ eke efɔnde, man ewa enɔ Jehovah Abasi fo; edi nnyin ima isobo mmɔ eken.

16Ndien Samuel ɔdɔhɔ Saul, ete, Bet kaŋa, nyesian fi se Jehovah ɔkɔdɔhɔde mi ke okoneyo emi. Ndien enye ɔdɔhɔ enye, ete, Tiŋ.

17Ndien Samuel ɔdɔhɔ ete, adaŋoro afo esede idemfo ke ekpri, nte inimke fi ke etubom mme esien Israel? Ndien Jehovah eyet fi aran onim ke edidem Israel.

18Ndien Jehovah ɔdɔŋ fi utom, ete, Ka kosobo mme idiɔk owo oro kpa mme Amalekite, nyuŋ ŋwana ekɔŋ ye mmɔ tutu ama mmɔ.

19Nsinam ndien afo mukopke uyo Jehovah, edi obumere ebine mbume, onyuŋ anam se idiɔkde ke enyin Jehovah?

20Ndien Saul ɔdɔhɔ Samuel, ete, Ŋkɔm mma ŋkop uyo Jehovah, nnyuŋ ŋka ke usuŋ emi Jehovah ɔkɔdɔŋde mi, mma nnyuŋ nda Agag edidem Amalek ndi, nnyuŋ nsobo Amalek fap.

21Edi mbon emi ekeda ubak ŋkpri ufene ye enaŋ eke efɔnde, kpa akpan ŋkpɔ nsobo, ete iwa uwa inɔ Jehovah Abasi fo ke Gilgal.

22Ndien Samuel ɔdɔhɔ ete, Nte edifɔp uwa ye uwa emem enem Jehovah esit nte edikop uyo Jehovah? Sese ŋkopuyo ɔfɔn akan uwa, mkpaŋutɔŋ onyuŋ ɔfɔn akan ikpɔŋ okukim.

23Koro emiom ebietde idiɔŋ, itun onyuŋ ebiet idiɔk ido ye mkpono-idem. Koro afo emesin uyo Jehovah, enye ŋko esin fi idaha edidem.

24Ndien Saul ɔdɔhɔ Samuel, ete, Mmanam idiɔk: koro mmeŋ ŋkokpe uyo Jehovah, ye ikɔ fo: koro ŋkefehede mbon emi, nnyuŋ ŋkop uyo mmɔ.

25Edi, mbɔk, dahado ke idiɔk ido mi, nyuŋ tiene mi fiak, man ntuak ibuot nnɔ Jehovah.

26Ndien Samuel ɔdɔhɔ Saul, ete, Nditieneke fi mfiak: koro afo ekesinde uyo Jehovah, Jehovah omonyuŋ esin fi, ete okudi edidem Israel.

27Ekem adaŋemi Samuel ɔwɔŋɔrede ete inyɔŋ, enye (Saul) omum enye mben ekura, ndien ekura ewaha.

28Ndien Samuel ɔdɔhɔ enye, ete, Jehovah ama awai fi ubɔŋ Israel ke ubɔk osio mfin emi, ama onyuŋ ada enye ɔnɔ mbɔhiduŋ fo emi ɔfɔnde akan fi.

29Ndien ŋko Odudu Israel idisuhe nsu, idinyuŋ ikabakere esit: koro enye midige owo eke akabarede esit.

30Ndien enye ɔdɔhɔ ete, Mma nnam idiɔk ido: edi kam kpono mi, mbɔk, ke iso mbiowo ikɔt mi, ye ke iso Israel, nyuŋ tiene mi fiak edem, man ntuak ibuot nnɔ Jehovah Abasi fo.

31Ntre ke Samuel afiak etiene Saul ke edem, ndien atuak ibuot ɔnɔ Jehovah.

32Ndien Samuel ɔdɔhɔ ete, Mbufo eda Agag edidem Amalek esɔk mi. Ndien Agag edi ke ndaresit. Agag onyuŋ ɔdɔhɔ ŋko, ete, Kakpan ke idot mkpa emebe.

33Ndien Samuel ɔdɔhɔ ete, Kpa nte ofut fo ama ɔkɔbɔ iban nditɔ, kpa ntre ŋko ke uka edinana eyen akan iban. Ndien Samuel okpok Agag mbio-mbio ke iso Jehovah ke Gilgal.

34Ndien Samuel aka Ramah; Saul onyuŋ ɔdɔk ke ufɔk esie ke Gibeah Saul.

35Ndien Samuel itɔŋɔke aba ntak ikut Saul tutu osim usen mkpa esie: edi Samuel atua Saul: Jehovah onyuŋ atua mkpɔfiɔk koro enye okonimde Saul ke edidem Israel.