LEVITICUS 4 - Efik Old Bible With Sectional Headings

Uwa Idiɔk Ido

1NDIEN Jehovah ɔdɔhɔ Moses ete, Dɔhɔ nditɔ Israel, ete,

2Ke ini owo eduede mbet Jehovah ekededi, eke mikpanamke, mikoho koi, onyuŋ anamde mmɔ oro kiet:

3edi eke oku emi eyerede aran, abiatde mbet, esin mbio-obio edue isop, yak enye ada ndien abak eyen enaŋ eke ɔfɔnde ama, abaŋa ndudue emi enye eduede, ɔsɔk Jehovah ke uwa idiɔk ido.

4Ndien yak enye ada abak eyen enaŋ oro edi ke enyin-usuŋ efe esop ke iso Jehovah; onyuŋ ada ubɔk esie odori abak enaŋ ke ibuot, ndien owot abak enaŋ ke iso Jehovah.

5Ndien yak oku emi eyerede aran, ada ndusuk iyip enaŋ oro oduk ke efe esop:

6ndien oku oro edebi nnuenubɔk esie ke iyip; onyuŋ osime iyip utim ikatiaba ke iso Jehovah, ke iso ukara edisana ebiet.

7Oku onyuŋ ada iyip eyet ke nduk itie-ufɔp edinem incense emi odude ke efe esop ke iso Jehovah; onyuŋ ɔduɔk ofuri iyip enaŋ ke ukot itie-ufɔp uwa emi ekperede enyin-usuŋ efe esop.

8Ndien yak enye osio ofuri ikpɔŋ enaŋ uwa idiɔk ido ke esit efep; kpa ikpɔŋ emi ɔfuhɔde ke ŋkpɔ esit idibi, ye ofuri ikpɔŋ emi adianade nsia, ye ekput mbiba,

9ye ikpɔŋ emi adianade mmɔ, emi adianade isin, ye caul emi adianade esit; yak owo osio enye efep ekpere ekput,

10kpa nte emi esiode enye ke enaŋ uwa emem: ndien oku ɔfɔp mmɔ ke itie-ufɔp uwa.

11Ndien yak emen ikpa enaŋ oro, ye ofuri unam esie, edian ye ibuot esie, ye nnuk esie, ye ŋkpɔ esit idibi, ye ifuɔ esie,

12idem ofuri enaŋ, ewɔrɔ eka ke edem nna ke edisana ebiet, emi eduɔkde ntɔŋ, ndien efɔp enye ke ifia ikaŋ: yak efɔp enye ke ebiet emi eduɔkde ntɔŋ.

13Ndien edieke ofuri esop Israel eduede, mikoho koi, ŋkpɔ oro onyuŋ odibe esop, mmɔ enyuŋ edue mbet Jehovah ekededi, eke mikpanamke, ndien enyene isop;

14ke adaŋemi ndudue emi mmɔ eduede ke ŋkpɔ oro ayararede, yak esop eda ubak eyen enaŋ esɔk, ebaŋa ndudue oro, enyuŋ eda enye edi ke iso efe esop.

15Ndien mbiowo esop eda ubɔk mmɔ edori abak enaŋ oro ke ibuot ke iso Jehovah: ndien yak owo owot enaŋ ke iso Jehovah.

16Ndien oku emi eyerede aran, ada ndusuk iyip abak enaŋ okoduk ke efe esop:

17yak oku onyuŋ edebi nnuenubɔk esie ke iyip, osime utim ikatiaba ke iso Jehovah, ke iso ukara.

18Ndien yak enye ada ndusuk iyip eyet ke nduk itie -uwa emi odude ke iso Jehovah, emi odude ke efe esop, ndien aŋwaŋa kpukpru iyip ɔduɔk ke ukot itie-ufɔp uwa, emi ekperede enyin-usuŋ efe esop.

19Ndien yak enye onyuŋ osio ofuri ikpɔŋ esie efep, ada ɔfɔp ke itie-uwa.

20Yak enye onyuŋ anam enaŋ emi, kpa nte emi enye anamde enaŋ uwa idiɔk ido (eken); yak enye anam kpasuk ntre ye enye emi: ntem yak oku osio isop mmɔ, ndien eyefen mmɔ.

21Ndien yak owo emen enaŋ oro ɔwɔrɔ aka ke edem nna, onyuŋ ɔfɔp enye, kpa nte ɔfɔpde akpa enaŋ: enye edi uwa idiɔk ido ofuri esop.

22Adaŋemi ɔbɔŋ eduede, onyuŋ anamde ŋkpɔ ekededi eke Jehovah Abasi esie ebetde, eke mikpanamke, mikoho koi, ndien enyene isop;

23edieke ayararede ndudue esie emi enye eduede ke esit, enɔ enye; yak enye ada ndien enɔ esie edi, okpo ebot kiet eke ɔfɔnde ama:

24ndien yak enye ada ubɔk esie odori okpo ebot oro ke ibuot, ndien owot enye ke ebiet emi ekam ewotde edifɔp uwa ke iso Jehovah; enye edi uwa idiɔk ido.

25Ndien oku ada usuk iyip uwa idiɔk ido ke nnuenubɔk esie, eyet ke nduk itie-ufɔp uwa.

26Ndien yak enye ɔfɔp ofuri ikpɔŋ esie ke itie-uwa, kpa nte efɔpde ikpɔŋ uwa emem; oku onyuŋ osio isop idiɔk ido esie, ndien eyefen enye.

27Ndien edieke owo mbio-obio kiet eduede, mikoho koi, ke erinam ŋkpɔ ekededi eke Jehovah ebetde, eke mikpanamke, ndien enyene isop;

28edieke eyararede ndudue esie emi enye eduede, enɔ enye; yak enye ada ndien enɔ esie edi, uman ebot kiet eke ɔfɔnde ama, abaŋa ndudue esie emi enye eduede.

29Ndien enye ada ubɔk esie odori uwa idiɔk ido ke ibuot, onyuŋ owot uwa idiɔk ido oro ke ebiet edifɔp uwa.

30Ndien yak oku ada usuk iyip esie ke nnuen ubɔk esie, eyet ke nduk itie-ufɔp uwa, ndien aŋwaŋa ofuri iyip esie ɔduɔk ke ukot itie-uwa.

31Ndien yak enye osio ofuri ikpɔŋ esie efep, kpa nte esiode ikpɔŋ uwa emem; ndien oku ada enye ɔfɔp ke itie-uwa ɔnɔ Jehovah ke edinem utebe; ntre ke oku edisio isop esie, ndien eyefen enye.

32Ndien edieke enye adade eyen erɔŋ ke enɔ esie edi ke eke ndudue oro, yak enye ada uman eke ɔfɔnde ama ɔsɔk.

33Ndien ada ubɔk esie odori uwa idiɔk ido ke ibuot, onyuŋ owot enye ke uwa idiɔk ido, ke ebiet emi ewotde edifɔp uwa.

34Ndien yak oku ada usuk iyip uwa idiɔk ido ke nnuen-ubɔk esie, eyet ke nduk itie-ufɔp uwa, onyuŋ aŋwaŋa kpukpru iyip esie ɔduɔk ke ukot itie-uwa.

35Ndien enye osio ofuri ikpɔŋ esie, kpa nte esiode ikpɔŋ eyen erɔŋ uwa emem; ndien yak oku ɔfɔp mmɔ ke itie-uwa, adian ye uwa ikaŋ Jehovah: ntem ke oku edisio isop ndudue esie eke enye anamde, ndien eyefen enye.