1EDIKEM ke ini oro mme Philistine ebon mbon-ekɔŋ mmɔ, ete iwɔŋɔ ika ekɔŋ ye Israel. Ndien Achish ɔdɔhɔ David, ete, Tim fiɔk ete ke afo ye ikɔt fo eyewɔrɔ ye ami ke otu mbon-ekɔŋ.
2Ndien David ɔbɔrɔ Achish, ete, Mmɔdo afo eyefiɔk se owo fo edinamde. Ndien Achish ɔdɔhɔ David, ete, Mmɔdo nyenim fi ke andikpeme ibuot mi kpukpru ini.
3Ndien Samuel ama akakpa, ofuri Israel ema enyuŋ etuaŋa enye, enyuŋ ebuk enye ke Ramah, ke obio esie. Saul ama okonyuŋ ebin mmɔ eke enyenede nsaŋa ekpo, ye mbia-idiɔŋ, ke isɔŋ efep.
4Ekem, mme Philistine ebono edi ndinam nna-ekɔŋ ke Shunem: Saul onyuŋ obon ofuri Israel ɔtɔ kiet, mmɔ enyuŋ enam nna-ekɔŋ ke Gilboa.
5Ndien adaŋemi Saul okutde nna-ekɔŋ mme Philistine, enye edikhe, nsia onyuŋ oyomo enye eti-eti.
6Ndien adaŋemi Saul obupde Jehovah, Jehovah ibɔrɔke enye ke ndap, ye ke Urim, ye ke mme prophet.
7Ndien Saul ɔdɔhɔ ikɔt esie, ete, Mbufo eyom ŋwan eke enyenede nsaŋa ekpo, enɔ mi, man ŋka ke ɔtɔ esie ŋkobup enye. Ndien ikɔt esie edɔhɔ enye, ete, Sese, ŋwan kiet emi enyenede nsaŋa ekpo odu ke En-dor.
8Ndien Saul oforo owo efen, onyuŋ esine edisine-ŋkpɔ efen, onyuŋ ada owo iba aka, ndien mmɔ esim ɔtɔ ŋwan oro ke okoneyo: ndien enye ɔdɔhɔ ete, Mbɔk, da nsaŋa ekpo bre ɔnɔ mi, nyuŋ nam owo eke ndidɔhɔde fi ɔdɔk nɔ mi.
9Ndien ŋwan oro ɔdɔhɔ enye, ete, Sese, afo ɔmɔfiɔk se Saul akanamde, nte enye okosibede mme nsaŋa ekpo, ye mbia-idiɔŋ ke isɔŋ efep: afo anam didie, ndien, ɔkɔk afia ɔnɔ uwem mi ete owot mi?
10Ndien Saul otomo Jehovah ɔnɔ enye, ete, Ma uwem Jehovah, ufen idisimke fi ibaŋa ikɔ emi.
11Ndien ŋwan obup ete, Anie ke ndinam ɔdɔk nnɔ fi? Ndien enye ɔbɔrɔ ete, Nam Samuel ɔdɔk nɔ mi.
12Ekem, adaŋemi ŋwan oro okutde Samuel, enye ofiori ke ɔkpɔsɔŋ uyo: ndien ŋwan ɔdɔhɔ Saul, ete, Nsinam afo abiaŋade mi?
13Ŋkɔm afo edi Saul. Ndien edidem ɔbɔrɔ enye, ete, Kufehe: afo okut nso ŋkpɔ ndien? Ndien ŋwan oro ɔdɔhɔ Saul, ete, Mmokut ata akwa owo nte otode ke isɔŋ ɔdɔk.
14Ndien enye obup ŋwan, ete, Enye ebiet nso? Ndien ŋwan ɔdɔhɔ ete, Akani eren ke ɔdɔk, enye onyuŋ esine ekura ke idem. Ndien Saul ɔdiɔŋɔ ete ke edi Samuel. Ndien enye otuk iso esie ke isɔŋ, onyuŋ ɔnuhɔ.
15Ndien Samuel ɔdɔhɔ Saul, ete, Afo anam didie otimere mi ke edinam mi ndɔk ndi? Ndien Saul ɔbɔrɔ ete, Mmetie ke ata itie ukut: ndien mme Philistine ke eŋwana ekɔŋ ye ami, Abasi ama onyuŋ akabare ɔkpɔŋ mi, inyuŋ ibɔrɔke aba mi ke ubɔk mme prophet, ye ke ndap: mmɔdo ŋkotde fi, man afo eteme mi se ndinamde.
16Ndien Samuel ɔdɔhɔ ete, Nsinam afo obupde mi, sia Jehovah ama ɔkɔkpɔŋ fi, onyuŋ akabare edi asua fo?
17Jehovah omonyuŋ anam ɔnɔ idem esie kpa nte enye ɔkɔdɔhɔde ke inua mi: Jehovah omonyuŋ awabare fi itie edidem ke ubɔk ɔbɔ, ada, enye ɔnɔ mbɔhiduŋ fo, kpa David:
18koro afo mukokopke uyo Jehovah, mukonyuŋ unamke Amalek nte ekemde ke ifiopesit esie, mmɔdo Jehovah anamde fi ntem mfin emi.
19Jehovah eyenyuŋ ada Israel ŋko ye afo esin mme Philistine ke ubɔk: ndien mkpɔŋ afo ye nditɔ-iren fo eyedu ye ami: Jehovah eyenyuŋ ada mbon-ekɔŋ Israel esin mme Philistine ke ubɔk.
20Ndien ndo-ndo oro Saul anyanare ɔduɔ ke isɔŋ, onyuŋ edikhe ikɔ Samuel eti-eti: odudu inyuŋ iduhe aba enye ke idem: koro enye mikadiaha ŋkpɔ ke ofuri uwemeyo, ye ke ofuri okoneyo.
21Ndien ŋwan oro etiene Saul, onyuŋ okut nte idem akpade enye eti-eti, ndien ŋwan ɔdɔhɔ enye, ete, Sese ofin aŋwan fo ama okop uyo fo, mma nnyuŋ nda uwem mi nsin fi ke ubɔk, nnyuŋ ŋkop ikɔ fo oro afo ɔkɔdɔhɔde mi.
22Mbɔk, ndien, afo ŋko-ŋko nyuŋ kop uyo ofin aŋwan fo, nyuŋ yak nda udia esisit nnim fi ke iso; ndien dia, man idem ɔsɔŋ fi ke ini afo asaŋade ke usuŋ.
23Edi enye esin, onyuŋ ɔdɔhɔ ete, Ndiaha. Edi ikɔt esie ye ŋwan oro eyire enye; ndien enye okop uyo mmɔ; ndien adaha ke enyɔŋ etie ke bed.
24Ndien ŋwan oro enyene eyen enaŋ eke ekukde ke ufɔk ndien enye awara aka okowot enye, onyuŋ ada ndom obuen, asaŋ uyo,
25isinke leaven; onyuŋ emen enye edi ke iso Saul, ye ikɔt esie; ndien mmɔ edia ŋkpɔ; ndien edaha ke enyɔŋ, enyɔŋɔ ke okoneyo oro.
Who We AreWhat We EelieveWhat We Do
2025 by iamachristian.org,Inc All rights reserved.
