ISAIAH 19 - Efik Old Bible With Sectional Headings

Abasi Eyemia Egypt Ufen

1UYO Abasi emi abaŋa Egypt. Sese, Jehovah ke odoro ke obubit enyɔŋ, awara oduk ke Egypt: ndien mme ibɔk Egypt enyek idem ke iso esie, esit Egypt onyuŋ akpa enye ke idem.

2Ndien nyedemere Egypt aŋwana ye Egypt: ndien owo eyeŋwana ye eyen-ete esie, owo ye mbɔhɔ-iduŋ esie; obio ye obio, idut ye idut.

3Ndien eyeŋwaŋa Egypt spirit esie ke idem efep; nyeyuŋ mmen uduak esie nsin ke idibi: ndien mmɔ eyebine mme ibɔk, ye mbia-inuen, ye mme nsaŋa ekpo, ye mbia-idiɔŋ.

4Ndien nyeda Egypt nsin ke ubɔk ɔsɔŋ-ido ete; ɔsɔŋ-ubɔk edidem eyenyuŋ akan mmɔ; emi edi uyo Ɔbɔŋ Jehovah mme udim.

5Ndien mmɔŋ eyesat ke inyaŋ, akpa mmɔŋ eyenyuŋ asat okure.

6Mme akpa mmɔŋ eyenyuŋ etebe; mme akpa mmɔŋ Egypt eyekabare ukpɔk enyuŋ esat: nnyanyaŋa ye mkpɔŋ-isɔŋ ekpaŋa.

7Mme iŋwaŋ isɔŋ inyaŋ ye ke mben akpa, ye kpukpru se etɔde ke isɔŋ inyaŋ eyesat, eyesuana, ndien ididuhe aba.

8Ndien mme ɔkɔ-iyak eyetuaŋa, kpukpru mmɔ eke esinde uwam ke akpa mmɔŋ eyetuaŋa, mmɔ eke eduɔkde iyire ke enyɔŋ mmɔŋ eyenyuŋ etie mba-mba.

9Ndien but eyenam mme anam ata eti flax, ye mmɔ eke edɔkde afia ɔfɔŋ.

10Ndien mme adaha obio emenuaha; esit abiak kpukpru mmɔ eke enamde utom ke okuk.

11Mbɔŋ Zoan ekabare edi ata ndisime, ama edi mme ɔfiɔkŋkpɔ owo ke otu mme ɔnɔ-item Pharaoh, mme item mmɔ etie ndisime ndisime: mbufo edinam didie edɔhɔ Pharaoh, ete, Ami ndi eyen mbon eti ibuot, eyen ndidem eyo oko? Mmɔ edu mmɔŋ?

12Enye mbon eti ibuot fo? Yak mmɔ esian fi ndien, enyuŋ efiɔk se Jehovah mme udim aduakde abaŋa Egypt.

13Mbɔŋ Zoan ke edama; ke ebiaŋa mbɔŋ Noph; ikpɔ owo mme esien Egypt enyuŋ enam enye oyo.

14Jehovah amada spirit ndutime abuak enye ke esit: ndien mmɔ enam Egypt oyo ke kpukpru se enye anamde, kpa nte owo mmin asaŋade oyo ke ikpɔhi esie.

15Ndien Egypt idikwe aba utom eke ibuot, ye isim, ye mkpabak, ye mkpɔŋ-isɔŋ edinamde.

16Ke usen oro Egypt eyebiet iban: eyenyuŋ enyek, onyuŋ edikhe abaŋa mfuŋ-ubɔk Jehovah mme udim emi Enye ofuŋde ese enye.

17Ndien isɔŋ Judah eyedi se Egypt edidikhede, ndik eyenam kpukpru owo eke edade mbuk esie etiŋ enɔ enye, oto ke uduak Jehovah mme udim, emi enye aduakde abaŋa enye.

18Ke ini oro obio ition eke edisemde usem Canaan, enyuŋ eŋwɔŋɔde enɔ Jehovah mme udim, eyedu ke isɔŋ Egypt; kiet eyenyuŋ ekere obio nsobo.

19Ke usen oro, itie-uwa eyeda ɔnɔ Jehovah ke ufɔt isɔŋ Egypt, adaha eyenyuŋ ada ɔnɔ Jehovah mme udim ke edem adaŋa esie.

20Ndien enye eyeda nte ŋkpɔ idiɔŋɔ ye ntiense ɔnɔ Jehovah mme udim ke isɔŋ Egypt: koro mmɔ esemede enɔ Jehovah ebaŋa mmɔ eke etukde mmɔ, ndien enye eyedɔŋ andinyaŋa eke edide akamba, onyuŋ anyaŋade mmɔ.

21Ndien Jehovah eyenam Egypt efiɔk enye, nditɔ Egypt eyenyuŋ efiɔk Jehovah ke usen oro, ndien mmɔ eyewa uwa emem ye inuak-udia; enyuŋ ekaŋa akaŋa enɔ Jehovah, enyuŋ enam enye.

22Jehovah eyenyuŋ amia Egypt; amia, onyuŋ ɔkɔk: ndien mmɔ eyekabare etiene Jehovah, ndien enye eyekop ɔnɔ mmɔ, onyuŋ ɔkɔk mmɔ.

23Ke usen oro ɔkpɔ-usuŋ eyetɔŋɔ ke Egypt ana tutu osim ke Assyria, ndien Assyria eyeduk ke Egypt, Egypt eyenyuŋ oduk ke Assyria, ndien Egypt ye Assyria eyenam ŋkpɔ (Jehovah).

24Ke usen oro Israel eyenam ita ye Egypt ye Assyria, edi ŋkpɔ eke ɔdiɔŋde owo ke ufɔt ererimbot:

25emi Jehovah mme udim ɔdiɔŋɔde, ete, Ɔfɔn ɔnɔ ikɔt mi Egypt, ye Assyria emi ubɔk mi akanamde, ye Israel udeme mi.