NEHEMIAH 8 - Efik Old Bible With Sectional Headings

Ezra Okot Ibet Ɔnɔ Kpukpru Owo

1EKEM kpukpru owo esop idem ɔtɔ kiet, nte owo kiet, ke aŋwa emi odude ke iso inua-otop mmɔŋ; ndien mmɔ edɔhɔ Ezra, ɔfiɔk-ŋwed, ete enye ada ŋwed mbet Moses, emi Jehovah okowukde Israel, edi.

2Ndien Ezra oku ada ŋwed mbet edi ke iso esop iren-owo ye iban, ye eke kpukpru owo eke enyenede ibuot ndikop, ke akpa usen ɔyɔhɔ ɔfiɔŋ itiaba.

3Ndien enye okot ke esit ke iso aŋwa emi odude ke iso inua-otop mmɔŋ, ɔtɔŋɔde ke usiere tutu osim ufɔt uwemeyo, ke iso iren-owo ye iban, ye mmɔ eke enyenede ibuot: ndien kpukpru owo ekpaŋ utɔŋ enɔ ŋwed mbet.

4Ndien Ezra ɔfiɔk-ŋwed ada ke enyɔŋ okpokoro obukpɔk, emi ekenamde ebaŋa ŋkpɔ emi; ndien Mattithiah, ye Shema, ye Anaiah, ye Uriah, ye Hilkiah, ye Maaseiah, eda enye ke ŋkaŋ ke ubɔk nnasia; Pedaiah, ye Mishael, ye Malchijah, ye Hashum, ye Hashbad-danah, ye Zechariah, ye Meshullam, enyuŋ eda enye ke ubɔk ufien.

5Ndien Ezra ɔkubɔre ŋwed ke iso kpukpru owo; (koro enye okoŋde akan kpukpru owo) ndien adaŋemi enye ɔkubɔrede ŋwed

6kpukpru owo edaha eda: ndien Ezra ɔkɔm Jehovah akwa Abasi. Kpukpru owo enyuŋ ebɔrɔ ete, Amen, Amen, enyuŋ emenere ubɔk mmɔ ke enyɔŋ: ndien mmɔ enuhɔ, enyuŋ etuak ibuot enɔ Jehovah, etuk iso ke isɔŋ.

7Ndien Jeshua, ye Bani, ye Sherebiah, ye Jamin, ye Akkub, ye Shabbethai, ye Hodiah, ye Maaseiah, ye kelita, ye Azariah, ye Jozabad, ye Hanan, ye Pelaiah, ye mme Levite, esian mbon oro ŋwed ibet ndien kpukpru owo edu ke itie mmɔ.

8Ntre ke mmɔ etim ekot ŋwed mbet Abasi, enyuŋ esiak, enyuŋ eda se mmɔ ekotde, esian enɔ mmɔ.

9Ndien Nehemiah, emi edide Tirshatha, ye Ezra oku, ɔfiɔk-ŋwed, ye mme Levite, emi esiande mbon oro, edɔhɔ kpukpru owo, ete, Mfin emi edi edisana usen Jehovah Abasi mbufo; mbufo ekuseme, ekunyuŋ etua eyet. Koro kpukpru owo etuade eyet, adaŋemi mmɔ ekopde ikɔ mbet oro.

10Ndien enye ɔdɔhɔ mmɔ, ete, Mbufo eka eketa isek, enyuŋ eŋwɔŋ iniŋe, enyuŋ enɔ enɔ esɔk owo eke mitimke baba ŋkpɔ kiet ibeŋe enye: koro mfin emi edide edisana usen Ɔbɔŋ nnyin: mbufo ekufuhɔ ndien; koro idaresit Jehovah edide odudu mbufo.

11Ntre ke mme Levite enam kpukpru owo eda suŋ, ete, Mbufo edop, koro mfin emi edide edisana; mbufo ekunyuŋ efuhɔ.

12Ndien kpukpru owo eka ndidia ŋkpɔ, nnyuŋ ŋŋwɔŋ, nnyuŋ nnɔ enɔ esɔk owo, nnyuŋ nnam akamba idara: koro mmɔ etimde efiɔk ikɔ emi esiakde enɔ mmɔ.

13Ndien ke udiana-akpa usen mme etubom mme ete ofuri obio, ye mme oku, ye mme Levite esop idem ke ɔtɔ Ezra ɔfiɔk-ŋwed, man mmɔ etim efiɔk ikɔ ŋwed mbet.

14Ndien mmɔ ekut nte ewetde ke ŋwed mbet oro Jehovah okowukde ke ubɔk Moses, ete, Yak nditɔ Israel eduŋ ke ataya ke usɔrɔ ɔyɔhɔ ɔfiɔŋ itiaba:

15yak mmɔ enyuŋ ekwɔrɔ, enyuŋ enɔ ntɔt ke kpukpru obio mmɔ, ye ke Jerusalem, ete, Mbufo ewɔŋɔ eka obot, ekeda ŋkɔk olive, ye ŋkɔk eto aran, ye ŋkɔk myrtle, ye mkpabap eyop, ye ŋkɔk ŋkim-ŋkim eto, man enam ataya nte ekewetde.

16Ndien kpukpru owo ewɔŋɔ ekeda mmɔ edi, enyuŋ enam ataya ke idem mmɔ, kpukpru owo ke ɔkɔm ufɔk mmɔ, ye ke okure ufɔk Abasi, ye ke aŋwa inua-otop mmɔŋ, ye ke aŋwa inua-otop Ephraim.

17Ndien ofuri esop oro eketode ke itie mbuot-ekɔŋ efiak edi enam ataya, enyuŋ eduŋ ke ataya oro: koro nditɔ Israel mikanamke ntre toto ke eyo Joshua eyen Nun, tutu osim mfin emi ndien ata akamba idaresit odu:

18Ndien enye etiŋ ŋwed ibet Abasi kpukpru usen, toto ke akpa usen tutu osim ke akpatre usen, ndien mmɔ enim usɔrɔ ke ofuri usen itiaba; ndien ke ɔyɔhɔ usen itiaita, mmɔ enim akamba esop nte ekam esinamde.