JEREMIAH 41 - Efik Old Bible With Sectional Headings

Efeŋe Eka ke Egypt

1EDIKEM ke ɔyɔhɔ ɔfiɔŋ itiaba, Ishmael eyen Nethaniah, eyen Elishama, emi otode oruk edidem, ye ikpɔ owo edidem, ye owo duop ŋko, edi edisim Gedaliah, eyen Ahikam, ke Mizpah; ndien mmɔ edia ŋkpɔ do ɔtɔ kiet ke Mizpah.

2Ndien Ishmael eyen Nethaniah, ye owo duop oro edude ye enye, edaha ke enyɔŋ ekpi Gedaliah eyen Ahikam, eyen Shaphan, ke ofut, ewot enye, emi edidem Babylon okonimde ke etubom isɔŋ.

3Ishmael onyuŋ owot kpukpru mme Jew emi edude ye enye, kpa ye Gedaliah ke Mizpah, ye mme Chaldean kpa mbon-ekɔŋ emi ekutde do.

4Edikem ke udiana-akpa usen nte enye okowot Gedaliah, ndien baba owo kiet ifiɔkke,

5ndusuk owo eto ke Shechem, ye ke Shiloh, ye ke Samaria, owo anaŋ, emi ekporode ntaŋ-ebek, enyuŋ ewaide edisine-ŋkpɔ mmɔ, enyuŋ ekpide idem mmɔ, edi ye inuak-udia ye frankincense ke ubɔk, ke eyom ndida mmɔ nsɔk ke ufɔk Jehovah.

6Ndien Ishmael eyen Nethaniah oto ke Mizpah aka okosobo ye mmɔ, asaŋa atua eyet: ndien edikem adaŋemi enye osimde mmɔ, enye ɔdɔhɔ ete, Mbufo edi ke ɔtɔ Gedaliah eyen Ahikam.

7Edikem adaŋemi mmɔ esimde ufɔt obio, ndien Ishmael eyen Nethaniah owot mmɔ, esin ke ufɔt obube, enye ye mmɔ eke edude ye enye.

8Ndien ekut owo duop ke otu mmɔ, ndien mmɔ edɔhɔ Ishmael, ete, Kuwot nnyin: koro nnyin inyenede ŋkpɔ eke edibede ke iŋwaŋ, kpa wheat, ye barley, aran, ye aran-ɔkwɔk. Ndien enye ayak etie, inyuŋ iwotke mmɔ ke otu nditɔ-ete mmɔ.

9Ndien obube oro Ishmael ɔduɔŋɔde do kpukpru mme okpo owo oro enye okowotde, mmɔ oro ekedude Gedaliah ke ubɔk, edi oro Asa edidem akanamde abak Baasha edidem Israel; enye ke Ishmael eyen Nethaniah emen owo oro enye okowotde ɔyɔhɔ ke esit.

10Ndien Ishmael ataŋ kpukpru owo oro esuhɔde ke Mizpah, nditɔ edidem iban, ye kpukpru owo oro esuhɔde ke Mizpha, mmɔ oro Nebuzaradan etubom mbon ukpeme edidem ekesinde Gedaliah eyen Ahikam ke ubɔk: ndien Ishmael eyen Nethaniah ataŋ mmɔ ɔnyɔŋ, ndien aka, ete ibe inyɔŋ ke ɔtɔ mme Ammonite.

11Ekem Johanan eyen Kareah ye kpukpru mme etubom mbon-ekɔŋ oro edude ye enye, edikop ofuri idiɔk-ŋkpɔ oro Ishmael eyen Nethaniah akanamde.

12Ndien mmɔ eda kpukpru owo, enyuŋ eka ndiŋwana ekɔŋ ye Ishmael eyen Nethaniah, ndien mmɔ esim enye ke ɔtɔ akwa mmɔŋ emi odude ke Gibeon.

13Ediken adaŋemi kpukpru mmɔ eke edide ye Ishmael, ekutde Johanan eyen Kareah, ye kpukpru mme etubom mbon-ekɔŋ oro edude ye enye, mmɔ edat esit.

14Ndien kpukpru mmɔ oro Ishmael akataŋde efep ke Mizpah ekabare efiak edem, enyuŋ etiene Johanan eyen Kareah.

15Edi Ishmael eyen Nethaniah ada owo itiaita ɔbɔhɔ Johanan, ndien aka ke ɔtɔ mme Ammonite.

16Ndien Johanan eyen Kareah ye kpukpru mme etubom mbon-ekɔŋ oro edude ye enye, eda kpukpru owo oro esuhɔde, emi enye ɔkɔbɔde Ishmael eyen Nethaniah afiak edi, mmɔ oro eketode ke Mizpah, ke adaŋemi enye okowotde Gedaliah eyen Ahikam, kpa mkpɔsɔŋ mbon-ekɔŋ, ye iban ye nditɔwɔŋ ye mme eunuch oro enye akadade ke Gibeon afiak edi:

17ndien mmɔ eka eketie ke Geruth Chimham emi, ekperede Bethlehem, ete isaŋa ika Egypt;

18ebak mme Chaldean, koro efehede mmɔ, koro Ishmael eyen Nethaniah okowotde Gedaliah eyen Ahikam, emi edidem Babylon okonimde ke etubom isɔŋ.