2 CHRONICLES 28 - Efik Old Bible With Sectional Headings

Ukara Ahaz ke Judah

1AHAZ osim isua edip ke ini enye adade ubɔŋ; ndien edi edidem ke Jerusalem ke isua efurekiet: edi inamke se inende ke iso Jehovah nte David ete esie:

2edi enye asaŋa ke usuŋ ndidem Israel, onyuŋ atara ŋkpɔ anam mbiet ɔnɔ Baalim.

3Enye onyuŋ ɔfɔp uwa ke itihere eyen Hinnom, onyuŋ ɔfɔp nditɔ esie ke ikaŋ, ekem ye mbubiam ido mme idut oro Jehovah ekebinde ke iso nditɔ Israel efep.

4Ndien enye awa uwa, onyuŋ ɔfɔp ke edikoŋ ebiet, ke enyɔŋ ikpɔ obot, ye ke idak kpukpru awawa eto.

5Ndien Jehovah Abasi esie ada enye esin edidem Syria ke ubɔk; ndien mmɔ esuan enye, enyuŋ etaŋ ediwak owo enyɔŋ eka ke Damascus. Enyuŋ eda enye esin edidem Israel ke ubɔk, ndien enye amia enye akwa ufen.

6Ndien Pekah enyen Remaliah owot tɔsin owo itie ikie ye edip ke Judah, ke usen kiet, kpukpru mmɔ mbon-uko: koro mmɔ ekekpɔŋde Jehovah Abasi mme ete mmɔ.

7Ndien Zichri, owo uko Ephraim, owot Maaseiah eyen edidem, ye Azrikam etubom ufɔk, ye Elkanah emi edide adiana edidem.

8Ndien nditɔ Israel etaŋ tɔsin nditɔ-ete mmɔ itie ikie iba, iban, ye nditɔ-iren, ye nditɔ-iban, efep, enyuŋ ebume mmɔ ediwak mbume, ndien eda mbume mmɔ edi ke Samaria.

9Ndien prophet Jehovah kiet, ekere Oded, odu do; ndien enye ɔwɔrɔ ɔkɔbiɔŋɔre mbon-ekɔŋ eke edide ke Samaria ke iso, onyuŋ ɔdɔhɔ mmɔ, ete, Sese, koro Jehovah Abasi mme ete mbufo ayatde esit ye Judah, anam enye ada mmɔ esin mbufo ke ubɔk, mbufo emenyuŋ ewot mmɔ, ke iyaresit emi osimde ikpa-enyɔŋ.

10Ndien ke emi mbufo edɔhɔ, ete imɔŋ idigi nditɔ Judah, ye Jerusalem nte ifin iren ye ifin iban mbufo. Nte mbufo ke idem mbufo inyeneke se eduede Jehovah Abasi mbufo?

11Mbufo ekop ndien enɔ mi, enyuŋ esana nditɔ-ete mbufo emi mbufo etaŋde efep, eyak: koro ikaŋ iyaresit Jehovah odorode mbufo ke idem.

12Ndien ndusuk mme etubom nditɔ Ephraim, Azariah eyen Johanan, ye Berechiah eyen Meshillemoth, ye Jehizkiah eyen Shallum, ye Amasa eyen Hadlai, edaha ke enyɔŋ esua enɔ mmɔ emi etode ekɔŋ,

13enyuŋ edɔhɔ mmɔ, ete, Mbufo ekuda mme mmɔ emi mbufo eketaŋde efep, eduk ken: koro man nnyin idue Jehovah isop, mbufo ekere ndinam idiɔk-ŋkpɔ nnyin ye isop nnyin edediɔŋ eka iso: koro isop nnyin okponde eti, ndien ikaŋ iyaresit odoro Israel ke idem.

14Ntre ke mbon-ekɔŋ esana mbuot-ekɔŋ oro ye mbume eyak ke iso mbɔŋ ye ofuri esop.

15Ndien mbon emi mmɔ esiakde enyiŋ edaha ke enyɔŋ, eda mbuot ekɔŋ oro, esioŋo edisine-ŋkpɔ ke mbume, esine kpukpru owo eke edide iferi ke otu mmɔ; ntem ke esine mmɔ edisine-ŋkpɔ ke idem, ye ikpa-ukot, enyuŋ enɔ mmɔ se ediade enyuŋ eŋwɔŋde, enyuŋ efiɔŋɔ mmɔ aran, enyuŋ ebiom kpukpru mbio mmeme ke ass, eda esɔk nditɔ-ete mmɔ ke Jericho, obio eyop: ndien mmɔ efiak ke Samaria.

16Ke ini oro Ahaz edidem ɔdɔŋ utom ke ɔtɔ ndidem Assyria, ete eŋwam imɔ.

17Ndien mme Edomite etɔŋɔ ntak edi edisuan Judah, enyuŋ etaŋ owo efep.

18Mme Philistine ŋko ema enyuŋ eda esin ke mme obio una-isɔŋ edem inyaŋ, ye ke edem usuk Judah, enyuŋ eda Beth-shemesh, ye Aijalon, ye Gederoth, ye Soco, ye mme obio iŋwaŋ mmɔ: ye Timnah ye mme obio iŋwaŋ mmɔ, ye Gimzo ye mme obio iŋwaŋ mmɔ, ndien mmɔ eduŋ do.

19Koro Jehovah ɔkɔsuhɔrede Judah onim, abaŋa Ahaz edidem Israel; koro enye akanamde oburobut ke Judah, okonyuŋ eduede Jehovah ŋkpɔ eti-eti.

20Ndien Tilgath-pilneser edidem Assyria edi ke ebiet esie, onyuŋ efik enye, edi iŋwamke enye.

21Koro Ahaz akabakharede ŋkpɔ ufɔk Jehovah, ye eke ufɔk edidem, ye eke mbɔŋ, ada ɔnɔ edidem Assyria: edi enye iŋwamke enye.

22Ekem ke ini emi efikde enye, enye ɔdɔdiɔŋ edue Jehovah, enye edidem Ahaz.

23Enye onyuŋ awa uwa ɔnɔ mme abasi Damascus emi esuande enye: onyuŋ ɔdɔhɔ ete, Koro mme abasi ndidem Syria eŋwamde mmɔ, nyewa uwa nnɔ mmɔ, man eŋwam mi. Edi mmɔ esin enye ye ofuri Israel eduɔŋɔ.

24Ndien Ahaz ataŋ mkpo-duoho ufɔk Abasi, onyuŋ okpok mkpoduoho ufɔk Abasi, onyuŋ eberi itim ufɔk Abasi, onyuŋ anam itie-uwa ke idem esie ke kpukpru inuk Jerusalem.

25Ndien ŋko enye anam edikoŋ ebiet ke kpukpru obio Judah kiet kiet, man ɔfɔp uwa ɔnɔ abasi efen, ndien ayat Jehovah Abasi mme ete esie esit.

26Ndien ama edi ikɔ esie eke esuhɔde, ye kpukpru usuŋ esie, mbemiso ye akpatre, sese, ekewet mmɔ esin ke ŋwed ndidem Judah ye eke Israel.

27Ekem Ahaz ɔsuhɔre ana ye mme ete esie ede, ndien mmɔ ebuk enye ke obio Jerusalem: edi isinke enye ke udi ndidem Israel. Ndien Hezekiah eyen esie ada ubɔŋ ke itie esie.