2 SAMUEL 6 - Efik Old Bible With Sectional Headings

David Emen Ekebe Ediomi Abasi Ɔnyɔŋ Edi Jerusalem

1EKEM David ɔtɔŋɔ ntak obon kpukpru edimek owo Judah,

2tɔsin edip ye duop. Ndien David ye kpukpru owo eke edude ye enye edaŋa ke Baale Judah, eka ndida ekebe Abasi do, emi enyiŋ esie ekerede enyiŋ Jehovah mme udim, emi oduŋde ke ufɔt mme Cherubim, nda ndɔk.

3Ndien mmɔ edori ekebe Abasi ke obufa ukpat-ŋkpɔ, enyuŋ eda enye edaha ke ufɔk Abinadab emi odude ke Gibeah ewɔrɔ: ndien Uzzah ye Ahio, nditɔ Abinadab, ebin obufa ukpat-ŋkpɔ oro.

4Ntre ke mmɔ eda enye ke ufɔk Abinadab emi odude ke Gibeah, edaha ye ekebe Abasi: ndien Ahio ebem ekebe iso asaŋa.

5Ndien David ye ofuri ufɔk Israel ebre ke iso Jehovah ke kpukpru oruk ŋkpɔ eto cypress, kpa ke harp, ye psaltery, ye ekɔmɔ, ye nsak, ye cymbal.

6Ekem adaŋemi mmɔ esimde ke ebiet ubek ibokpot Nacon, Uzzah anyan ubɔk esie otuk ekebe Abasi, omum enye akama; koro enaŋ oro eyomde ndiduɔk enye.

7Ndien Jehovah ayat esit ye Uzzah; Abasi onyuŋ ɔtɔ enye do abaŋa ndudue esie; enye onyuŋ akpa do ke ŋkaŋ ekebe Abasi.

8Ndien esit ayat Daivd koro Jehovah ɔkɔtɔde Uzzah: enye onyuŋ osio ɔtɔ oro enyiŋ Perez-uzzah, tutu osim mfin emi.

9Ndien David abak Jehovah ke usen oro, onyuŋ ɔdɔhɔ ete, Ekebe Jehovah edinam didie oduk ke ɔtɔ mi?

10David inyuŋ inyimeke ndida ekebe Jehovah ŋka ŋkonim ke ebiet esiemɔ ke obio David: edi David ada enye awaha onim ke ufɔk Obed-edom Gittite.

11Ndien ekebe Jehovah etie do ke ufɔk Obed-edom Gittite ke ɔfiɔŋ ita: Jehovah onyuŋ ɔdiɔŋ Obed-edom, ye ofuri ufɔk esie.

12Ekem esian David, ete, Jehovah ɔmɔdiɔŋ ufɔk Obed-edom, ye kpukpru se inyenede enye, abaŋa ekebe Abasi. Ndien David aka akada ekebe Abasi ke ufɔk Obededom ɔdɔk ke obio David ke idaresit.

13Edikem adaŋemi mme andibiom ekebe Jehovah ekesaŋade ikpat itiokiet ema, enye awa enaŋ ye ikpɔ nditɔ enaŋ.

14David onyuŋ enek unek ke ofuri odudu esie ke iso Jehovah; David onyuŋ esine ephod linen.

15Ntre ke David ye ofuri ufɔk Israel eda ekebe Jehovah edɔk ke mkpo idara, ye ke uyom ukorowo.

16Ekem nte ekebe Jehovah odukde ke obio David, Michal eyen Saul aŋwan etie ke window ese, ndien enye okut David edidem nte ɔyɔrɔde enek ke iso Jehovah: ndien ese enye ke ndek ke esit esie.

17Ntre ke mmɔ emen ekebe Jehovah eduk, ekediɔk enye ke ɔtɔ esie, ke ufɔt tent emi David akanamde ɔnɔ enye: ndien David awa edifɔp uwa emem ke iso Jehovah.

18Ekem David etre ndiwa edifɔp uwa emem, ndien enye ɔkɔm kpukpru owo ke enyiŋ Jehovah mme udim.

19Enye onyuŋ edeme kpukpru owo ŋkpɔ, kpa ofuri otu Israel, ye eren ye ŋwan, ɔnɔ kpukpru owo obukpa uyo kiet, ye ŋwa unam, ye ebok edisat grape. Ndien kpukpru owo enyɔŋɔ ufɔk mmɔ.

20Ndien David afiak aka ndikɔm nditɔ ufɔk esiemɔ. Ndien Michal uduŋwan Saul ɔwɔrɔ ndisobo ye David, onyuŋ ɔdɔhɔ, ete, Ŋkɔm edidem Israel akanam ubɔŋ mfin, emi ɔkɔfuhɔrede idemesie mfin ke iso ifin iban ikɔt esie, kpa nte kiet ke otu mme oburobut owo ɔfuhɔrede idemesie ke aŋwa!

21Ndien David ɔdɔhɔ Michal, ete, Ke iso Jehovah emi ɔkɔkpɔŋde usɔ, ye ofuri ufɔk esie, emek mi onim ke etubom ikɔt Jehovah, kpa Israel: oro esin mbre mbre ke iso Jehovah.

22Nyenyuŋ nsuk ntie ndek-ndek ŋkan emi, nnyuŋ ŋkpri ke enyin mi: edi ama edi ifin iban oro afo ɔdɔhɔde, mmɔ eyekpono mi.

23Ndien Michal eyen Saul aŋwan imanke eyen, tutu osim usen mkpa esie.